Assyrian Forums
 Home  |  Ads  |  Partners  |  Sponsors  |  Contact  |  FAQs  |  About  
 
   Holocaust  |  History  |  Library  |  People  |  TV-Radio  |  Forums  |  Community  |  Directory
  
   General  |  Activism  |  Arts  |  Education  |  Family  |  Financial  |  Government  |  Health  |  History  |  News  |  Religion  |  Science  |  Sports
   Greetings · Shläma · Bärev Dzez · Säludos · Grüße · Shälom · Χαιρετισμοί · Приветствия · 问候 · Bonjour · 挨拶 · تبریکات  · Selamlar · अभिवादन · Groete · التّحيّات

I masale du ëšmo aw dan ëšmone d këtlan mënyo w mën l...

    Previous Topic Next Topic
Home Forums Government Topic #169
Help Print Share

Jan Bet Sawocemoderator

 
Send email to Jan Bet SawoceSend private message to Jan Bet SawoceView profile of Jan Bet SawoceAdd Jan Bet Sawoce to your contact list
 
Member: Sep-14-2011
Posts: 305
Member Feedback

I masale du ëšmo aw dan ëšmone d këtlan mënyo w mën latyo? (Surayt)

Jun-22-2013 at 08:38 PM (UTC+3 Nineveh, Assyria)

I masale du ëšmo aw dan ëšmone d këtlan mënyo w mën latyo?
Jan Beṯ-Şawoce

Alert   IP Print   Edit        Reply      Re-Quote Top

 
Forums Topics  Previous Topic Next Topic

Jan Bet Sawocemoderator

 
Send email to Jan Bet SawoceSend private message to Jan Bet SawoceView profile of Jan Bet SawoceAdd Jan Bet Sawoce to your contact list
 
Member: Sep-14-2011
Posts: 305
Member Feedback

1. I masale du ëšmo aw dan ëšmone d këtlan mënyo w mën latyo? - Part 1

Jun-22-2013 at 08:41 PM (UTC+3 Nineveh, Assyria)

In reply to message #0
 
I masale du ëšmo aw dan ëšmone d këtlan mënyo w mën latyo?
Më Jan Beṯ-Şawoce

1

Hawulli darbo hama mu rišo d huweno haškara bi masalaṯe…

Bu cëlmo kul camo hawile w këtle krizat camuqe. Ucdo ste kito hawxa krizat, bu mëstaqbël ste gëd howe hawxa krizat. Hano latyo mede cëjbo w cajobo!...

Ţrawu d šuraẖnolxun i masale du AIDS i naqla d nafiqo li ẖolo… I naqla d nafëq u kewo, layimi at tëxetër du cëlmo b ǧalabe dëkoṯo. Yatiwi mfatašše. Zabno fayët bi ẖolo: Kobi w kšuqli më ẖḏoḏe. Hani latwën ẖa w tre, ǧalabewën.

Gëd mbašarnolxun baynoṯayye kohne yatiwe latwo. W lo ẖa mat tëxetër ste referans kuhno lë mëdle bu mede dë mqadamle.

Zëd mawxa ste wlo taxtor, lë yatëw lašan d bocëj taxtor ẖreno ya ste d soyëm caksiye w mqarrasiye. Hul l adyawma ste hawxa kyëtwi cam ẖḏoḏe w heš darmono d manëẖ u kewo du AIDS lë ẖzalle. Bas këmdawmi bu cwodo w bu šroẖo lan noše mënyo? Šato cal šato ste u maḏco kayis kowe.

Xëd ǧalabe came d këtte kriz aẖna ste këtlan, latyo lo caybo w lo ẖţiṯo. Ucdo këtlan šëwole w krizat, ramẖel ste w lu ẖreno ste gëd huwelan hawxa šëwole.

Hani aydarbo šurenalle? Bi aẖmaqiye? Bi caksiye? Bi mqarrasiye? Bi barbariye? Bu bëcojo d bëcjina ẖḏoḏe? Aydarbo?

Hani 40 šne. I masale du ëšmo mën šëkël mnaqšolan? A mnaqšone, mën amţalle lašan d yëlfina? Maḏco, kṯowe, yaḏoce, fahome, yalife…

Mu yawmo d yawma, w hul ucdo kmaydina ak kuhne referans, qayo? Nošo lë këmfatëš?! Ak kuhnani ayko, mën qralle? Yacni mën maḏco këtte bu tarix, bu arkeoloji, bi joǧrafya, bu teoloji, bal lišone,… w ǧer.

Bi dawle d Kamal, mi šato 1924 mnic kul mede d latyo tërk. Ak kuhne du Ţuro ayko qralle w mën yalifi? Haka yalifi ”Olaf-Beṯ” w ”Abën d ba šmayo”, ma hani kẖowën kul mede?

Cayni mede ak kuhne d qayimi bu Cëraq, b Suriya, b Lëbnan,.. ǧer mëd këmmi ”aẖna carabna!...” mën yalifi? Ëno kumarno lo mede!

Harke, u nëqošo mawxa kumarno marẖequlle mi caksiye w mi mqarrasiye. Hwawu šaroẖe lu šëwolo. Haka kit mede šroloyo, latyo caybo maqbëlinale. Haka layto mede šrolo latyo caybo mnaqšinale. Lë şuxrina tarco d nëqošo qëm ẖḏoḏe. Lë maylina kṯawyoṯo dë ẖḏoḏe. Cayboyo ǧalabe!

Qreli ëno ste. Kul ẖa bi kṯawto d këtle kmawḏëc mën axlaq, mën qarakter, mën tarbiya, mën fašistiye, mën samyuṯo, mën iboco,… këtle. I naqla d mikafri i naqlayo an nošani lë kmiḏoci. Mawxa kubac an nošani şucre ste dë mşacri bi kṯawto, këmarno ţër fayši w lë zaycina mi tarbiya w axlaq ẖarbo d këtte.

Aş şëroye madënẖoye. Yacni hani d këtne hadome b cito d Madënẖo aw naşţërnayto w cito d Kaldoye. Këtte sahmo ste hawën pruţ. Kito kroho camuqo baynoṯayye. Bas d koṯe qumayye ẖa mani da 30, a tre gabe kowën grece qume w kşuǧḏile.

Cayni mede bayn dam macërboye. Yacni bayn li cito yacqubayto, sëryayto ortodoks w katolik w marunayto, malkayto kito kroho tarixi. Hani ste kit sahmo mënayye d hawën pruţ. Mu sabab du krohano raẖiqi mu urhoyo w mu şurayt d këtwolle, qalibi w hawën carabkat. Hul ucdo ste ẖa lë knoẖët bë qḏole du ẖreno. Hani ste bas d koṯe qumayye ẖa mani da 30, kulle kowën grece qume w kşuǧḏile.

Aẖna ac cëlmoye bu tarix grëšlan ǧalabe mi cito. W hano u maḏco d kit acle heš hul ucdo latyo iḏico laẖna. Qay? W hano man klozëm manfaqle li ẖolo ǧer mënayna?

Adyawma cal foṯe di arco kito ǧalabe came këtte ëšmone ẖaṯe, ëšmone catiqe, ëšmone lziqe… Hani hën atno, hën joǧrafi w hën dinone. W raḏyene aclayye…

Ma aẖna këtlan caqël d saymina hawxa mede?

Alert   IP Print   Edit        Reply      Re-Quote Top

Jan Bet Sawocemoderator

 
Send email to Jan Bet SawoceSend private message to Jan Bet SawoceView profile of Jan Bet SawoceAdd Jan Bet Sawoce to your contact list
 
Member: Sep-14-2011
Posts: 305
Member Feedback

2. I masale du ëšmo aw dan ëšmone d këtlan mënyo w mën latyo? - Part 2

Jun-22-2013 at 08:44 PM (UTC+3 Nineveh, Assyria)

In reply to message #0
 
2

B kul xaşra këtlan fanatik w fanatik samye. Acmayye këtlan tëxmonoye w fašist ste ha! Latna noqëş mat tërk, mac carab, mak kurmanj w man nazist b Almanya. Hani dayëm këtwo, kit w bu mëstaqbël ste gëd howën b gawayna.

Hani lë kowe dë mkasena aclayye, kobëc d mëgloyi, dlë mëgloyi, i xşara aclaynayo. Hani mawballe w macbarre i masale siyasiye d këtlan l zabuqo şxiro…

Kobëc ǧiyoro w dcoro, bas aydarbo? U darbo mënyo?

B gawe d kul camo, mede ţabici kowe ẖarakat siyasiye. Hani kowën semoloye, yaminoye, ëmṯonoye w citonoye. Kuwelën noše riše w mdabrone, hadome w m'aydone. Kuwelën hani kaṯowe w yaḏoce lašan d maqwën i dacwa.

Hën maẖ ẖarakatani kowën ẖarakat zërz, mawxa kito bi xëzne di siyase aclayye xabro d semoloye zërz, yaminoye zërz, citonoye zërz, ëmṯonoye zërz, anaršist, tarorist,...

Dawle cal d latlan, adyawma b gawe du camayḏan ẖarake b macna d yamino w d semolo, zërz w lo zërz lawilan. Ḫatta teori falsafi l hawxa lë zric, mawxa lë yaci baynoṯayna ẖarakat zërz yaminoye w semoloye. Haka nafšoṯo şëroye cabiri b hawxa ẖarakat ste taṯir b gawe du camo lawëlle. Maṯlo bu Bacaṯ, bag gabe qominist, bag gabe carab ëmṯonoye këtwo hawxa noše şëroye. Hani sahmo rabo mënayye šoven-tëxmonoye carab w mankërone du camayḏanwën. Ucdo ste kito ǧalabe mënayye.

Mqabël d haṯe b sefe di cito yaci ẖarake ëmṯonayto. Haṯe mën ẖarakewa? Bi xëzne di siyase këtla xabro aw lo? Bi falsafe di siyase këtla dëkṯo aw lo? Kubac kul naqla hawxa d šuraẖno sahmo mena w madno mënayxun ste kritike, pozitiv w negativ acla. D huwetu mšarkone gëd mëfşaẖno. La´an hawxa nëqošo d mišawšëţ bu şurayt muhimyo.

Qamayto gëd madno li iḏo i ẖarake d yaci b cito d Madënẖo aw bi cito naşţërnayto…

Maclumyo i ẖarake ẖaṯtoyo, tarix yarixo b macna d ëmṯonoyuṯo latla. Qay? Kumarno hano kubacle šroẖo më ǧalabe xawaşër. Gëd mẖawalno d ubeno hën, haka hawili nëqşaniyat, dë mcawnitulli bënne gëd mëfşaẖno.

A mbašrone amarikan b Urmi, i naqla dë bdalle d manẖëti u şurayt madënẖoyo li kṯawto, maclumyo bdele kyoce maḏco ”Aẖna latna kurmanj, fërsoye, tërk, carab,…” Harke bdele tëẖiso bayn daş şëroye madënẖoye ”Aẖna latna dino w cito lẖuḏe, camona ste!”

I qale d yaci fëkrat d ëmṯo harkene aw wariḏe qamoyaṯṯe. Bdalle an nahire du zabno d ẖozën ”kaldaye, suraye, aturaye, naşţërnaye, yacqubaye, malkaye, marunaye,… kulle xa!” Fris mgale, kṯowe w kṯawyoṯo bu şurayt madënẖoyo cal hawxa.

Cito nafiqo mqabël w mërla: Lo! Aẖna latna ẖa! U kroho bayn l ”kaldaye w l aturaye” aw du šrolo bayn ”kaldaye katolik w naše d ceta catëqta” hawxa bdele. Aṯën aẖ ẖërme… gëworo cam ẖḏoḏe, žǧaliye cam ẖḏoḏe, sënodo lë ẖḏoḏe … hawi mnico.

Bas sayfe d hawi, ǧalabe ma tre gabe qţili baf faẖe dë ẖḏoḏe. Maṯlo l hawxa, Mor Benyamen Šamcën XXI, maqţele u abro du cammo d ruẖe Namrud Aǧa meqëm mu Sayfo daẖ 15 lo b mede. Thëmle jasus dat tërk. Bas bi ẖaqiqa i masale cal d hawiwo hadomo cam an nošayḏe bi cito kaldaytowa.

Alert   IP Print   Edit        Reply      Re-Quote Top

Jan Bet Sawocemoderator

 
Send email to Jan Bet SawoceSend private message to Jan Bet SawoceView profile of Jan Bet SawoceAdd Jan Bet Sawoce to your contact list
 
Member: Sep-14-2011
Posts: 305
Member Feedback

3. I masale du ëšmo aw dan ëšmone d këtlan mënyo w mën latyo? - Part 3

Jun-22-2013 at 08:47 PM (UTC+3 Nineveh, Assyria)

In reply to message #0
 
3

Bu cëlmo kito ǧalabe came ëšmayye aclayye ẖaṯoyo. Hawxa hawi dayëm bu tarix.

Šato 1551, bëṯër më zabno yarixo d qar w qir bi cito naşţërnayto, sahmo d kuhne griši sëmme calaqa cam u Vatikan. Maqballe d miţaşri bu Vatikan.
Hanine bëṯër d hawi ëšmayye kaldoye katolik. Këtte tarix komo qumayye bas d ëṯyo dukṯa gëd maẖkena sahmo mene.

Mu yawmano bdele dëžmëniye bayn lat tarte citawoṯo b kul dëkṯo. W hawxa raẖiqi më ẖḏoḏe. Sahmo rabo maqlabbe lišonayye lašan b naqla d ruẖqi.

I naqla d lowe maḏco ẖa kfoyëš cal kul mede ẖëţëm w samyo. Hawxa jari b kulan haka maḏënẖoye w haka macërboye.

Bu Cëraq sahmo rabo mak kaldoye, këmmi cal ruẖayye ”Aẖna carab mšiẖoye”. Hën baţ ţurone këmmi cal ruẖayye ”Axna qurdaye mšixaye”.

An noše d këmmi ”carab mšiẖoye” ẖëšwinawo balki i masalaṯṯe bdela cam u Bacaṯ d Şaddam. Hano ǧalţo nafëq. Heš meqëm mu Sayfo baw walayat rabe w ẖatta b dëkoṯo nacime ëmmiwo hawxa cal ruẖayye. I masalaṯe bu cëmqo mënyo? Nošo mënayna heš iḏo lë mẖalaqlela.

Bëṯër më Şaddam hawi kriz rabo bayn dan nošani. Këmmi cal ruẖayye ”carab mšiẖoye” haw nošo këmčaplaxxe. Yacni u xabro d ”carab” haw kmanţe qiyme. Jbiri d ëmmi han naqla cal ruẖayye ”Aẖna kaldoyena! Këbcina hawxa d miḏëcina!”

Hano šušoţoyo.

Harke mdarbe du caqël d mëstacmëlina i aẖmaqiye, hani ẖaḏirene d howën mën d ëbcitu… tërk, kurmanj, fërsoye,…

Harke ah hadome d cito d Madënẖo, bdalle aclayye bu hjomo fanatik klasiki: Hatu oṯuroye hatu! Maqbelu!

Kṯëwwe kṯowe, kṯawyoṯo, nafiqi bat talawizyonat, bar radyowat bu jargonano azzën aclayye. W hawi u mede d hawi.

Heš cayni mede këmdawëm.

Ah hadome fanatik d cito d Madënẖo ba kṯiwoṯo këmẖaqri w kmanẖëti bu darǧo dak kaldoye w këmmënne: Ban 1551 maẖët ëšmayxun kaldoye katolik, meqëm hawxa mede latwo, ëšmo ẖaṯoyo aclayxu!

Aẖnone w Aẖwoṯo,

Hani 500 šne kţucni u ëšmano, ma hano ëšmoyo? Ţabi af fanatikani, u mede dë këṯwi hënne kquralle w fëtošo camuqo ste layt! I ẖolo kfayšo lënne w li jahale d këtte. Acmayye hën mi cito kaldayto ste hawxa kqunci w i masale kfayšo dlo šëryono.

Ëšmo d kaldoyo w kaldoye, adyawma ǧalabe kayiso kuḏcina latyo mede ẖaṯo, meqëm ste këtwo. Yacni meqëm man 1551 këtwo baẖ 50, bač 49, ba 48 w më meqëm ste. Ḫatta kito ëšmo d "naşţërnaye kaldaye" meqëm man 1551 w bëṯër ste.

U tarix lë kowe d mizawër! Kowe ǧalţo.

Këtlan ëšmone, hani kobëc d huwenalle moro b fëhëm w lo bi aẖmaqiye…

Alert   IP Print   Edit        Reply      Re-Quote Top

Jan Bet Sawocemoderator

 
Send email to Jan Bet SawoceSend private message to Jan Bet SawoceView profile of Jan Bet SawoceAdd Jan Bet Sawoce to your contact list
 
Member: Sep-14-2011
Posts: 305
Member Feedback

4. I masale du ëšmo aw dan ëšmone d këtlan mënyo w mën latyo? - Part 4

Jun-22-2013 at 08:51 PM (UTC+3 Nineveh, Assyria)

In reply to message #0
 
4

Kubaclan mdabrone, siyasiye, kuhne, malfone, babe, cammone, camṯoṯo, ẖëlone, ẖëltoṯo, jiran, ẖawrone, qariwe-raẖuqe, naqode,... d howën more d uždan…

U uždan di cade mënyo? Hano b gawe mën kẖowe?

U uždan gab kul nošo, i cayno d gawe du leboyo. Dëkṯo ẖa dë kmaẖës ruẖe nošoyo. B gawe du nošano u uždan mizën li ẖarbo w li ţawtoyo, tamo kẖokëm w këmqadër ruẖe biyya.

Harkeyo i maẖkame clayto i naqla i cadale dlë saymo u wajëb d këtla lan noše qariwe w raẖuqe. Du šrolo ste hiyyayo dë ksaymo u nošo nošo w abre d nošo.

An noše d këtte bi ţabica uždan cloyo, bu kanšo kowën an noše mnaqye w cloye bi qiyme. Hawxa noše dayëm kmaẖisi b mëštaylonuṯo clayto w haṯe cayn hawxa këmqadmila lan noše.

Bi dëkṯo d kit uždan ḏacif, tamo cadale w qiyme lu nošo layt! Harke ac caynoṯo du lebo kowën şxire w kmëmloyi kroho. Han naqla hawxa kkorëx baw wariḏe du gëšmo u tloyo du ẖayf.

I mšiẖuṯo u asas diḏa rakiwoyo cal i falsafe di ẖubo w du šayno. Gabayna bi mšiẖuṯo ar rišone w a mdabrone kobëc mawxa more d uždan ǧalabe cloyo d howën. Hal an nošani bi cito, bu gabo, bu šutoso, bu ẖuḏro, bi cayle w bi calaqa d kito bayn lë ẖḏoḏe gabayna, ma hawxane?

Yabo u jawab haškara Lo'yo.

I cito b iḏa më zawno mamëṯla w matëmla u uždan naḏifo d këtwo gab ak kuhnayḏa. B dukṯe zrëcla i manfaca du kalla w di madde. Hawxa bdela d gënwo u uždan šafyo d këtwolle lah hadomayḏa. Xlëqla asas l kul mede rakiwo cal i manfaca du kiso. Harke mamëṯla i ẖubo w u šayno d kit bi mšiẖuṯo. Hawxa bdela li manfaca šaxşiye.

Hawxa sami u uždan w raẖiqo i cadale mal lebe.

Gëd maẖkenolxun pësseqa kriṯo cal hawxa

Taclo karoxo bu ţuro. B darbe malxono ẖzele cal fago d dawmo këlle kito caţmo d ǧazale mcalqo. Kafinoyo, bdele d mašëk, ”ašër hano dlo ëzze howe faẖo!?” Sëmle kontrol, ẖzele Alo këlle faẖoyo. Caţmo di ǧazaleyo, šroloyo bas këlle maşro b bombaye. Zayëc…

Hedi hedi bdele d roẖëq…. raẖëq, raẖëq, raẖëq…. ẖzele hawxa tamamyo, mede haw kjurele. Maẖëtle qarce cal drëcone šţiẖ w damëx. Bëṯër lo b mede koṯe dewo l riše. Ḫzele huwwe ste i caţmo, ẖzele u taclo ste. Warox haṯe mënyaṯe?! këmšayël l ruẖe…

Aṯi laf u taclo mšayëlele: Ḫawro taclo! Hano mën ksaymët harke?

Madcarle acle: Lo mede… kdëmaxno.

Dewo- Kit harke caţmo…

Taclo- E kit.

Dewo- Qay laxëlolox?!

Taclo- Adyawma şayomono.

Dewo- I naqlayo ëno gëd uxalna…

Taclo- Axula, huwyo haniye w şaẖẖa cal lebox.

U dewo azze li caţmo… I naqla dë mnawele iḏe li caţmo ţiqo. Qayëm qiyomto d cafro w dëxono li hawa, u dewo drix li arco. Kibe balki 10 mëtrowat mẖalëq lu gabo. Qayëm hedika u taclo më dukṯe w azze li caţmo, mëskole w bdele bu muklayḏa.

B šahwo cal kef diḏe këmgargëš biyya.

Maẖësle lu dewo cal ruẖe, bac mën kẖoze b cayne, këlle u taclo koxël bi caţmo, mërlele: Warox hay dlo uždan ma lo mërlox şayomono?!

U taclo madcarle: Meqëm b šawţo mẖele lu ţop du mëklo, ma lë šamëcatle?

Han naqla bi masale du ëšmo

Kiban b raẖatiye d huwena carab, bas lo şuroye
Kiban b raẖatiye d huwena tërk, bas lo kaldoye
Kiban b raẖatiye d huwena fërsoye, bas lo oṯuroye
Kiban b raẖatiye d huwena kurmanj, bas lo oromoye
Kiban b raẖatiye d huwena awruppawiye, bas lo ţurcabdinoye
Kiban b raẖatiye d huwena ţaye, bas lo përuţ
Kiban b raẖatiye d huwena šica, bas lo naşţërnoye
Kiban b raẖatiye d huwena sënna, bas lo yacquboye
Kiban b raẖatiye d huwena jacfariye, bas lo katolik
Kiban b raẖatiye d huwena ẖambaliye, bas lo ortodoks
Kiban b raẖatiye d huwena faţëmiye, bas lo malkoye
Kiban b raẖatiye d huwena smaciliye, bas lo marunoye

Hatu mën fëkra këtxun? Lë minakfitu marulla…

Alert   IP Print   Edit        Reply      Re-Quote Top

Forums Topics  Previous Topic Next Topic


Assyria \ã-'sir-é-ä\ n (1998)   1:  an ancient empire of Ashur   2:  a democratic state in Bet-Nahren, Assyria (northern Iraq, northwestern Iran, southeastern Turkey and eastern Syria.)   3:  a democratic state that fosters the social and political rights to all of its inhabitants irrespective of their religion, race, or gender   4:  a democratic state that believes in the freedom of religion, conscience, language, education and culture in faithfulness to the principles of the United Nations Charter — Atour synonym

Ethnicity, Religion, Language
» Israeli, Jewish, Hebrew
» Assyrian, Christian, Aramaic
» Saudi Arabian, Muslim, Arabic
Assyrian \ã-'sir-é-an\ adj or n (1998)   1:  descendants of the ancient empire of Ashur   2:  the Assyrians, although representing but one single nation as the direct heirs of the ancient Assyrian Empire, are now doctrinally divided, inter sese, into five principle ecclesiastically designated religious sects with their corresponding hierarchies and distinct church governments, namely, Church of the East, Chaldean, Maronite, Syriac Orthodox and Syriac Catholic.  These formal divisions had their origin in the 5th century of the Christian Era.  No one can coherently understand the Assyrians as a whole until he can distinguish that which is religion or church from that which is nation -- a matter which is particularly difficult for the people from the western world to understand; for in the East, by force of circumstances beyond their control, religion has been made, from time immemorial, virtually into a criterion of nationality.   3:  the Assyrians have been referred to as Aramaean, Aramaye, Ashuraya, Ashureen, Ashuri, Ashuroyo, Assyrio-Chaldean, Aturaya, Chaldean, Chaldo, ChaldoAssyrian, ChaldoAssyrio, Jacobite, Kaldany, Kaldu, Kasdu, Malabar, Maronite, Maronaya, Nestorian, Nestornaye, Oromoye, Suraya, Syriac, Syrian, Syriani, Suryoye, Suryoyo and Telkeffee. — Assyrianism verb

Aramaic \ar-é-'máik\ n (1998)   1:  a Semitic language which became the lingua franca of the Middle East during the ancient Assyrian empire.   2:  has been referred to as Neo-Aramaic, Neo-Syriac, Classical Syriac, Syriac, Suryoyo, Swadaya and Turoyo.

Please consider the environment when disposing of this material — read, reuse, recycle. ♻
AIM | Atour: The State of Assyria | Terms of Service