Assyrian Forums
 Home  |  Ads  |  Partners  |  Sponsors  |  Contact  |  FAQs  |  About  
 
   Holocaust  |  History  |  Library  |  People  |  TV-Radio  |  Forums  |  Community  |  Directory
  
   General  |  Activism  |  Arts  |  Education  |  Family  |  Financial  |  Government  |  Health  |  History  |  News  |  Religion  |  Science  |  Sports
   Greetings · Shläma · Bärev Dzez · Säludos · Grüße · Shälom · Χαιρετισμοί · Приветствия · 问候 · Bonjour · 挨拶 · تبریکات  · Selamlar · अभिवादन · Groete · التّحيّات

Sayfo, Siyase, Rëmze Ëmṯonoye,… e w bëṯër?! (Suray...

    Previous Topic Next Topic
Home Forums Government Topic #182
Help Print Share

Jan Bet Sawocemoderator

 
Send email to Jan Bet SawoceSend private message to Jan Bet SawoceView profile of Jan Bet SawoceAdd Jan Bet Sawoce to your contact list
 
Member: Sep-14-2011
Posts: 305
Member Feedback

Sayfo, Siyase, Rëmze Ëmṯonoye,… e w bëṯër?! (Surayt)

Aug-28-2013 at 07:48 PM (UTC+3 Nineveh, Assyria)

Sayfo, Siyase, Rëmze Ëmṯonoye,… e w bëṯër?! (Surayt)
Jan Beṯ-Şawoce

Alert   IP Print   Edit        Reply      Re-Quote Top

 
Forums Topics  Previous Topic Next Topic

Jan Bet Sawocemoderator

 
Send email to Jan Bet SawoceSend private message to Jan Bet SawoceView profile of Jan Bet SawoceAdd Jan Bet Sawoce to your contact list
 
Member: Sep-14-2011
Posts: 305
Member Feedback

1. Sayfo, Siyase, Rëmze Ëmṯonoye,… e w bëṯër?! (Surayt) - Part 1

Aug-28-2013 at 07:50 PM (UTC+3 Nineveh, Assyria)

In reply to message #0
 
Sayfo, Siyase, Rëmze Ëmṯonoye,… e w bëṯër?!

1

Më tëllo ǧalabe clayto aw më šëbbak ǧalabe cloyo, ẖa i naqla d ẖoyër b şërto rsëmto, qume këwyo xu manḏar… b hawxa manḏar, hatu d huwetu ẖayore aw mfarjone, cajaba b ayna xaşra du manḏarano gëd ẖayritu? Maḏco latli.

Aẖe w Aẖwoṯo,

Cël mi adro di siyase, kmëẖšëwina ǧalabe ẖaṯe… Qayo? Këtla sababe ǧalabe. Ftiẖo d umarno, latne ẖa w tre…

Ftiẖ nëqošo cal i kefo d raku lašan u Sayfo b Liége b Balčiqa. An naqoše, ẖa b ẖa, kul ẖa mu xurjo d këtle manfaqlele mede. Hano mzabën lë mzabën, fhim lë fhim,… latwe bu ẖšowo w hawxa i masale şxiro…

Taqriban b kul mede harke cël mi adraṯe hawxana. I dacwa man d mawbël u zor du ẖrenoyo. Bi ẖarayto, u xaşoro knoţër hul d qaṯle fërşa ẖaṯto. Mëd aṯyo i fërşa, kmitarkëw tfayo ẖaṯto w hedi kmaqëṯina taẖta i nuro d këbcina. Haṯe mënyo? L mënyo? Mën gëd saymo? Latyo b ǧame d ẖa mënayna… E w bëṯër?! Bac bëṯër ste Aloho raboyo!

Aẖnone w Aẖwoṯo,

Adyawma bi macna siyasiye gabayna ”semolo” gabayna ”yamino” gabayna ”ẖarake ëmṯonayto” gabayna ”ẖarake d dino” gabayna ”ẖarake d maḏhab”,… layto.

Qayo layto? Klozëm më kul xaşra hano d minaqëš. Ḫa d mëcţarëf bu šrolo aw b şawce d makwëš cal hawxa jërẖo, latyo abadan caybo.

Ëno ste harkeno ha! Nošo mënayxun larwal mawxa dlë ẖuzeli! Yacni bu maḏco, cal kul mede d kito gabayna, ëno ste latno kamilo. D mawlafno ruẖi cal haqqa maḏco rwiẖo, këmarno cëmri lë kmakfe. Amma këmẖawalno d mawlafno lruẖi lu mede dë kmëţeno w bëṯër këbeno riše d ẖuţe lani dlë kmëţeno. Kayiso ksamno aw lo, hano kţurene li maẖkame du tarix, tamo ţër hiyya, ẖëkmoli w lo hatu. I cade bi siyase hawxayo.

Harke laltaẖ, u mede d kubac d ubeno, kubac d miḏëc, hano ẖşiro w mẖaddëdoyo bu camayḏan du Ţuro. I masale di Gozarto ste ucdo larwal kţurena. Yacni harke li iḏo şëroye macërboye mido w latyo cal şëroye madënẖoye.

Qamayto, kubac d ubeno maḏco, cal qay heš latlan semoloye aw ẖarake b macna d semoloyuṯo baynoṯayna…

Gabayna, noše dë qralle kṯowe di Markësiye cal aş şawcoṯo balki latne banye. Harke i nafšo dë qrela hawxa maḏco, kfayšo ayko qayimo w cal iḏe d man yalifo hawxa maḏco. Hano maclumyo kubacle šroẖo më ẖiyërto siyasi. W dlo fëhëm ẖa zaẖmeyo d huwele. Yacni b karyo d umarno ẖa i naqla d qore tre kṯowe markësiye lë kowe Markësi. Aw d qore tre kṯowe d Lanin, d Mao, dë Şţalin, dë Ţročki, d Ho Ši Min, d Če Guwara, … lë kowe semoloyo. Han naqla harke kito semolo, kito semolo zërz w kito semolo zërbav, anaršist, … w zoxu bëṯra. Hawxa gabo, hawxa tukoso, hawxa ẖarake, hawxa lamme, hawxa nahire, kaṯowe,.. lawilan w latlan. Ema hawxa gëd huwelan, ucdo maḏco b iḏi layt!

Cayni mede bu yamino ste, b macna siyasi yaminoye w yaminoyuṯo latlan. Xwazi d huwewo… gëd yulfinawo be buržuwaziye rabṯo w nacëmto mënyo? Hani mën ksaymi w qay hawxa ksaymi? Hawxa maclasaf lawilan. Ucdo ste, walaw këtlan noše bu ekonomi b darǧo d zangin qapitalist, bas bi macna siyasi heš mtaksonuṯo latlan. Haṯe nëqşaniyeyo, bas mën saymina?!

Alert   IP Print   Edit        Reply      Re-Quote Top

Jan Bet Sawocemoderator

 
Send email to Jan Bet SawoceSend private message to Jan Bet SawoceView profile of Jan Bet SawoceAdd Jan Bet Sawoce to your contact list
 
Member: Sep-14-2011
Posts: 305
Member Feedback

2. Sayfo, Siyase, Rëmze Ëmṯonoye,… e w bëṯër?! (Surayt) - Part 2

Aug-28-2013 at 07:53 PM (UTC+3 Nineveh, Assyria)

In reply to message #0
 
2

Li Mtakazto maẖëtlalan qurco bë qḏolayna w mërlalan: ”Haaa haṯeyo i ëmṯo!...” w grišo l xaşra.

Haṯe mën ëmṯowa? Nošo gabayna lo mšayele w lo abëc dë mšayël. Yacni nošo lë makëwle riše cal hawxa. Qayo? Hano šëwolo l kulanyo.

***

Bu Madënẖo, b kul dawle d kito ẖkume w ẖakomo carab, gabe ftëẖlele univarsita b ëšmo d ”Jamicat al-fëkër al-carabi”. Harke kito bam mowat ”yaḏoce” kxulqi fëkër w fëkrat, aydarbo gëd mawnëqi i caraboyuṯo lan noše d hawën më meqëm ţaye gabayye. Aẖ ẖakome carab kuḏci ǧalabe kayiso an noše d gabayye d hawën ţaye bu aşël latne carab. Meqëm mëd howën bu zor ţaye, mšiẖoyewën, hëḏoyewën, čalkoyewën, şuǧḏe w şalmewën. Hani këtwolle lišone d ruẖayye. Hawën ţaye, matrakke al lišone d këtwolle mëdde b dukṯe u carabi w hani hawën hawxa carab.

Maclumyo hani dlë mitawnëqi, kito tahlika d maẖisi cal i ëmṯo d ruẖayye. Hani bde d mitawnëqi bu ”al-fëkër al-carabi”. Yacni ţayo hat gëd ëmmët: Ëno carabno ste!

Hano sim dars, bde kmitaqre. Ay yaḏoce du fëkrano bdalle kfërsi bu ţboco w froso ste hawxa kṯawyoṯo. Hano cam u zabno hawi fëkra du ”pan-carabizim”. Cal u asasano bdele krokëw gabe. Ḫa mani ”al-fëkër al-qawmi al-suri”yo (1935). Bëṯër mene nafëq li ẖolo u Bacaṯ (1948), i ẖarake di Naşëriye (Jamal Cabdël-Naşër).

Kul ẖa d latyo carab w d latyo ţayo ẖuwwe lë fayëšle bayn dac carab. Ya gëd maslëm ruẖe w ya gëd mahzëm ëzze l larwal du Madënẖo. Hawxa ǧalabe şëroye, armënoye, qëpţoye azzën l Amarika, l Latin-Amarika, l Awusţralya,…
D lazzën aw dlë qadiri d ëzzën fayiši ẖşire. Aş şëroye mi badaye dan 1950´yat bi Gozarto bdalle hawxa d mëẖşori.

Šato 1957 bi Qamëšlo, clayme bu jimnasyum hawxa bdalle klaymi bu talyo. Hawxa hawi asas lu rkowo di Mtakazto. A claymani zëd mu ẖşoro siyasi d këtwo, këtwolën mede d kubci? Latwolën? Adyawma b iḏi dokumant dë mqadamno layto.

Amma cal bëṯër kito, hani mëzawno kito b meẖi d misomi ”panorama” lašan kṯowo. D ẖuzena.

Bu Ţuro be aẖna aydarbo mʹaṯrina mi ẖarake semolayto dat tërk w dak kurmanj, i Mtakazto ste mʹaṯro maẖ ẖarakatani d këtwo bayn dac carab d ţucniwo ”al-fëkër al-carabi”.

Bi qamayto i Mtakazto, Manifesto latwola. Bdele hën mah hadome d mënqoli l Lëbnan. Tamo bi ẖarayto dan ëštiyat (1960) mẖaḏarlala Manifesto b ëšme d ”Iḏaẖat al-fëkriyye” (Šroẖe cal af fëkrat) kopya mu Bacaṯ.

Sëmlala Manifesto kray mu Manifesto du Bacaṯ, bi dëkṯo d këtwo xabro d carab ste, tamo maẖëtla ”aṯuri”. Harke bi dëkṯo d aṯi ”al-fëkër al-carabi” ste sëmla ”al-fëkër al-aṯuri” bu carabi. Hawxa ẖaḏër Manifesto. Hano sërwe, l man d hawi lo mitahwewo w lo mitaẖwewo.

***

Hano bu Swed awwël naqla mhaškër bi ẖarayto daš šawciyat (1970), bëṯër mtarjëm bi ẖarayto da tmoniyat (1980) lu tërki.

Hawxa aẖna aţ ţuroye maţilan i fëkra oṯurayto. Mënwa w mën latwa? Kumarno hul adyawma ste nošo lo mšayele w lo abëc dë mšayël.

***

Bi xaşra ẖreto han naqla kito kopya lu fëkrano. Han naqla hawi ”al-fëkër al-arami”. An noše d sëmme, meqëm bi Mtakaztoʹwën. Nafiqi, sëmme mede mǧayro, hano ste hawi bas bu ëšmo lẖuḏe.

Alert   IP Print   Edit        Reply      Re-Quote Top

Jan Bet Sawocemoderator

 
Send email to Jan Bet SawoceSend private message to Jan Bet SawoceView profile of Jan Bet SawoceAdd Jan Bet Sawoce to your contact list
 
Member: Sep-14-2011
Posts: 305
Member Feedback

3. Sayfo, Siyase, Rëmze Ëmṯonoye,… e w bëṯër?! (Surayt) - Part 3

Aug-28-2013 at 07:58 PM (UTC+3 Nineveh, Assyria)

In reply to message #0
 
3

Haka yawmo fayišitu mẖayre w čara layt
Lë nëţritu nošo d oṯe maxlaşxun,
Am maxlëşone hwawu hatu!

Aẖe w Aẖwoṯo,

Latyo mi cadayḏi d madno l ëšmone w lucasno bu başraṯṯe, bas naqlat ëno ste kfašno jbiro.

I naqla d këṯawno kmaẖtitu bolo, dayëm kkuleno cal i siyase d kit, cal i propoganda d kit, cal u ẖaylo (d hawile dawro pozitiv-negativ) d kit.

Šroloyo, hën hawëlle dawro ǧalabe cjiqo bi masale du Sayfo, qarci d ëzze lu ẖawlo ste gabi an nošani ”cafu” latte, kṯëwli ëšmayye. Ḫa mani kowe Ḫazayel Şawme. Ucdo b Balčiqa, bi masale di kefo, naqla ẖreto cam u qonşoloş di dawle d Kamalo w cam af fašist dëṯṯe, mẖarakle u kuro daẖ ẖadode. Mede b iḏe laṯi, amma u cajaq d këtwole b iḏe maẖëtle harke w tamo.

***

I masale du Şabri, harke mido li iḏo b šëkël, ëno këmarnola ”siyasi ǧalabe raxis”. An noše d këmmi ”šow” ksoyëm w ”laṯi lë nafëq b Suroyo TV” bi masale d Sayfo…

Aẖe w Aẖwoṯo,

Sayfo mënyo? Mën macna këtle bu tarix du camayḏan? Hano maḏco nëquşo këtlan acle. Acmayxun, diḏi ste nëquşoyo, latyo zëd mu mede d kuḏcitu, amma latli cade d mapësno, d makëmno bu maḏco d kit gab nošo cal u Sayfo.

U Şabri haka kkorëx cal ”šow”, kibowe mzabën i masale du Sayfo b ẖa talafon aw b ẖa mayl l Yusuf Halačoǧlu. Bi dawle d Kamalo gëd nëfaqwo blalyo w bimomo b kul talawizyon, b kul ǧazeta. Gëd qaṯwole kalla, otelat b 10 këkwe, niše, ëšmo, gëšmo w toxu li mëštuṯo dan aẖnone!...

Hano ucdo ste u siyomayḏe latyo zaẖme, bas d bode d maqbël i ”xiyene” du admo dab babe d azzën bu Sayfo cal ruẖe, ǧalabe raẖa këwyo.

Amma u Şabri rfëḏle hawxa ”xiyane” b maḏco, w malaxle bu maḏco d këtwole cal u Sayfo, harke w tamo. Ha hawile cwodo nëquşo, ziyudo aw lo kayiso, hano mnaqšinale xëd ag gawre, cam maḏco.

U Şabri xëd ëšmi kuḏacno d huwewo maşro cam xaşra, dawse mënyo, laybowe d malëx. Cayni mede ëno ste, haṯe mi tajrube d hawili kumarno w lo mu kewo d gawi ha!...

***

I masale d qay lë nafëq b Suroyo TV… Bu zabno d këmmi acle, bu rišo Yawsef Beṯ-Ţuro (Aydin Kara) w aẖ ẖawronayḏe, kul yawmo baţ ţacne dax xurje şucre mëlanwo baf forume.

Bu zabnano ëno ste, u Şabri ste,… w ǧer ẖawrone ste, mi nëkfuṯo d hawxa caybo, ayko ëzzan cubrina, lašan dlë ẖuzena w dlë šëmcina hawxa caybo, maḏco latwolan. Hani lë kmëţcoyi w baẖ ẖaye ste lo ëno w lo u Şabri layban ţucenalle.

Haka nošo, kobëc dë mkase cal u carano, bu rišo ëno w bëṯër u Şabri layban mkasena acle.

U cwodo du Sayfo, ǧer më Jan Beṯ-Şawoce, ǧer mu Şabri,… knoţër l ǧalabe noše d oṯën l riše. Monopol b xëtmo d taẖsildar mi oşmanliye nošo latle acle. Ftiẖoyo qëm kulxun, toxu hwawu gawre w nẖatu lu maydan du cwodo.

Aẖe w Aẖwoṯo,

B Liége maẖët kefo, këtla nëqşaniyat, mede ǧalabe normalyo… rakiwo. De han naqla hatu sumu ”ẖḏo” d latla nëqşaniyat, czamullan lu yawmayḏa, gëd uṯena w amţena b qamuṯayna dënnaga w zërnaye lašan d mëfşëẖina kulan cam ẖḏoḏe. Mën këmmitu cal hawxa?

***

Bi masale dad dawronoye ste, kubac dë mqadamnolxun i ẖkeye d laltaẖ. Qrawulla w bëṯër b šayno haka këtxu mamre d ëmmitu acla w cal ǧer mena.

As sabce w aq qanyone…
(ẖkeye)

B zabno maz zabne bu ţuro, am malke daẖ ẖëyewën, as sabce layimi lë ẖḏoḏe. Cadewa gabayye bas d huwewolle dard, qatro aw šëwolo mede hawxa yëtwiwo. Ubiwo w šuqliwo cam ẖḏoḏe. Hawxa amţanwo şëfyan lu mede d këtwolle.

Ḫa mënayye bi ytëwto mërle: Ašër aẖnone bu ţuro caşyano, këmarno: aẖna bu ëšmo malkena! Mu kafno, hawaxta d mayṯina w mede lë koṯe b iḏayna d saymina.

Bu ţurayḏan këtlan maymunin më qumayna kmahzëmi, ksulqi lad dawme, bëṯrayye layban d sulqina… Af filat ǧalabe rabene lë kmişodi. Aǧ ǧëzalat bu rahţo ǧalabe xayifene, bëṯrayye layban dayëm nëflina, msoko zaẖmeyo d mëmsoki … d ëmmina aţ ţayre, hani ste, kulle bi šmayo fayorene,… Ëno kẖuzeno bi ẖalaṯe, l maye l şaydo d nune ste layban d cubrina… I ẖalayḏan bu šëklano, mën gëd hëwyo bu mëstaqbël? Ma mën këmmitu d saymina? Këtxun fëkra?!

Ḫa mënayye cabër bi žǧaliye ”Yabo madam i masale hawxayo, i naqlayo kul yawmo hujmina cal aq qanyone. Bu femo këtte caršone bas laybën d uxlilan, ţarfone ste d mëskilan latte, kiban hawxa dlo zaẖme maydinalle.

As sabce kulle hëzze qarcayye, ẖzalle i fëkra kayisto. Qayimi li raǧlo cam ẖḏoḏe w azzën nafiqi lu ţuro. Bdalle bu hjomo cal aq qanyone.

Aq qanyone i naqqa dë ẖzanne hawxa hajome, kulle sëmme dëṯṯe ẖḏo, mdafacce cal ruẖayye. As sabce ţwiri, pis pis daciri la-xalf. U ẖšowo d sëmme bu bayto cal aq qanyone nafëq ǧalţo.

Hawi caşriye, kulle kafine daciri lab botaṯṯe. Lë daciri mi masale, yatiwi cam ẖḏoḏe li dacwa naqla ẖreto. Mqararre gëd ţëlbi mucawane mu taclo. Azzën l side, maẖkëlalle i masale xëd këtyo, mu rišo w hul li ẖarayto.

U taclo mërlelën: Iiiiii haṯe latyo mede loo! Ǧalabe başityo. Aẖuno, hatu sumulli cmiro li dëkṯo di marca d këtte w hedi hatu lë ẖaruwxun mi masale.

As sabce b fëşẖo maqballe. Bëṯër b yawmo, mëş şafro d aloho, qayëm u taclo mëdle b iḏe lu šambar ẖëworo w azze l gab aq qanyone.

Mhawarle aclayye ”Aẖnone! Šmaculli këtlilxu kmo d xabre l mamro. As sabce, këbci d saymi acmayxun qawl d šayno. Yacni më adyawma w azolo bi marca d këtxun, cal kef dëṯxun rcawu, kraxu, rhaţu, mëštacawu, mčaqezu, mšarecu šarce, mqatelu,… mën d ëbcitu, hawo sumu!

Haqqa ẖiruṯo rwëẖto këtxun. Tamam aẖnone! Bas as sabce këtte ẖa raja mënayxun: Aloh këmmi: U ţawro bozawo d kit baynoṯayye lë knoẖët bë qḏolayna, kmacjazlan. Yabo hawullanyo ”soz” gëd saymina acmayxun šayno”.

U taclo ţralle bi ẖiruṯaṯṯe w azze l bayte.

Aq qanyone griši l xaşra yatiwi cam ẖḏoḏe bu knëšyo. Mnaqašše i masale, bi ẖarayto mëdde qarar: Yabo ǧamo layt, gëd ëbenalle u ţawro bozëko, zaţan aẖna ste bë qḏolayna lë knoẖët. Gëd ëmminale: Tox mude w hawweyo.

Bëṯër b yawmo dacër u taclo l sidayye ”Hë aẖnone, mën qërar hëwxun?!” mërre lu taclo: Aẖun mëd mawbele, aẖna ste gëd xulşina mene w gëd nëfqina li marcayḏan kul yawmo dlo zëcṯo w dlo ẖšowo d mede.

U taclo dlo ẖës mëdle w mawbele u ţawro bozëko w azze. Hawxa yalëf u taclo w koṯe kul yawmo.

Aṯi mërle laq qanyone: Hano samyoyo… madcarre: Mude! Bëṯër ẖa cwiroyo, ẖa quttoyo, ẖa fallušyo, ẖa ẖëworoyo, ẖa xašunoyo, ẖa mcarţonoyo, ẖa šammuziyo, ẖa caššariyo,… hawxa bu šëklano u taclo mawbele w msalmile las sabce.

Han naqla aṯi zabno u taclo haw koṯe, šuǧle tayëm. B dukṯe li marca daq qanyone aṯi sabco.

Han naqla aq qanyone naqişi w xëd meqëm ste quwwe haw fayišše. U sabco han naqla haškara mzaraţle cal aq qanyone w mërlelën hawxa: Han naqla man mënayxu d ubacno gëd mawbalno, haka baynoṯayxun kit nošo d omër: Qay!? lu mede d mërli, ţër nofëq ucdo l qamuṯi d ẖuzene!

Aq qanyone heš han naqla caqël dëṯṯe ẖaṯo aṯi l rišayye ”Warox hano mën sëmlan b ruẖayna! Xwazi u ţawro bozëkawo d lëbenawole!”

Bac haw kmanfëc.

Bi qamayto fayiši kulle šalye, mede ţabici, han naqla u dawro aṯi lënne ste.

Alert   IP Print   Edit        Reply      Re-Quote Top

Jan Bet Sawocemoderator

 
Send email to Jan Bet SawoceSend private message to Jan Bet SawoceView profile of Jan Bet SawoceAdd Jan Bet Sawoce to your contact list
 
Member: Sep-14-2011
Posts: 305
Member Feedback

4. Sayfo, Siyase, Rëmze Ëmṯonoye,… e w bëṯër?! (Surayt) - Part 4

Aug-28-2013 at 08:01 PM (UTC+3 Nineveh, Assyria)

In reply to message #0
 
4

Mërre li gamlo: Warëx gamlo, qḏolëx qay cwijoyo!…

Madcarla aclayye: Ma yabo ayko msawyo këtli?!

Aẖe w Aẖwoṯo,

Gabayna bi siyase, më kul mede nošo kamilo, hawxa arbco-arbco rizo, yacni rez bëṯër më rez, msawyo xu darbo d howe aşfalt layto. Ǧalabe zaẖmeyo ẖa d howe hawxa. Aydarbo kibe ẖa malẖëq lu medano kule, latla ëmkan!

Šëbqono, baynoṯayxun d šamëc am mamrani, ţër mašmacce lani dlë šamëci ste…
Hawxa bašyo?

Ya noše!

B baxtayxun, haka kito, nfaqu harke li ẖolo w marulli: Abri Jan! Xëd qëmṯox dugle këmdaglët, kito! W hani ǧalabene!... latne ẖa w tre ste…
Haka kit, ẖa b ẖa harke ruzunne… bu rišo ëno w bëṯër ǧer ţër yëlfi, hani manne w mënne?

***

Klozëm d yëlfina d maẖtina iḏayna cal aj jërẖe d këtlan. D nofëq mënayna ”ay!” w ”uy!” ste klozëm dlë zaycina, dlë cujzina, dlë bëxena… I ţawto d kulle, dlë mşacrina lad dardat d këtlan.

Haka sëmlan hawxa, gëd mëţena li qale d Cabbaso w u babo Mẖammad Cali, u malla du jemëc b Mëḏyaḏ. Kul yawmo b feme du tarco du jemëc këtwolle qale b şucre ǧalabe xašune. A tre latne baẖ ẖaye, amma u mede dë ţralle ţcoyo latle.

I naqla d nëflina li ẖalaṯe, kowe dcoro li xane qamayto… Yacni gëd ducrina lay yawmoṯo ẖaṯe d aṯinawo l Awruppa. Ma hatu mën këmmitu?

***

I mëroro du lebo, aydarbo kmitaqlëb l dawšo?

Aẖe w Aẖwoṯo,

Lebayna, më zawno ẖašyoyo b mërore ǧalabe mayire. Hani, hul ucdo cam ẖḏoḏe lë qadirana d sayminalle mede. As sababe latne ẖa w tre, ǧalabene.

Bu rišo d hani kulle, koṯe, maḏco cal mede latlan. Lo cal tarix, lo cal dino, lo cal maḏhab, lo cal lišono, lo cal ẖaye, lo cal siyase, lo cal mtakzonuṯo,… b karyo d umarno: ẖrimena më kul mede dë klozëm lu nošo d ramẖël!

Balki ǧalţono, mšareku w marulli: Lo! Kit hawxa ste!

Ëno ste kubac d yulafno.

Aẖe w Aẖwoṯo,

I masale du Sayfo latyo masale nacëmto. Masale ǧalabe rabṯoyo. U maḏco d kit cal u Sayfo adyawma, aṯmël latwolan. Hawi tacbo, hawi jëhodo, hawi qale, hawi kroxo, kalla, snodo, şucre, qar w qir,… w heš lë tayëmo.

Gëd oṯe yawmo, i dawle d Kamal gëd mijazyo ste, tiyomo d masale d Sayfo, lë kmëtyaqanno d taymo. Cal hawxa këtlan i tajrube dan naziye d sëmme b Almanya. Almanya ẖkimo, kobo admo, i masale heš lë tayëmo!

Mëftakeru aẖnone, heš u aršiv asasi du qaţlo lë ftiẖ. Hano b iḏe di caskariyeyo (Genelkurmay). U cboro l harke, latyo bu kalla, mëqqa d ubetu, mëqqa dë mcawnitu ste, cboro labxu d cubritulle. Ḫatta ak kaṯowe di dawle d Kamal lë kẖaqqe d cëbrile. Haqqa muhimyo.

Aẖe w Aẖwoṯo,

Kul mede ţrawulle lu kaṯowayḏe. Ucdo lbikena, kmëfqina li ẖolo mën hawi? W hano heš bam mo (% 10) lë nafëq mene.

Haka aẖnone kito b lebayye d këṯwi, Alo i masalaṯe du Sayfo aydarbo bdela, man hawila moro, man nafëqla ẖaşo, katfo, sanodo, kaṯowo, bacoţo, mbaẖbëšono… bu lebo, bu kiso, bu halxo,… ţër nëfqi li ẖolo w këṯwi cal hawxa. Hano latyo mede caybo, kobëc d howe šëbhoro l kulan.

Harke maclumyo gëd noẖët ëšmo ste w gëšmo ste dan noše, mede ţabici gëd howe hano. D lowe, u cwodo gëd howe nëquşo.

Alert   IP Print   Edit        Reply      Re-Quote Top

Forums Topics  Previous Topic Next Topic


Assyria \ã-'sir-é-ä\ n (1998)   1:  an ancient empire of Ashur   2:  a democratic state in Bet-Nahren, Assyria (northern Iraq, northwestern Iran, southeastern Turkey and eastern Syria.)   3:  a democratic state that fosters the social and political rights to all of its inhabitants irrespective of their religion, race, or gender   4:  a democratic state that believes in the freedom of religion, conscience, language, education and culture in faithfulness to the principles of the United Nations Charter — Atour synonym

Ethnicity, Religion, Language
» Israeli, Jewish, Hebrew
» Assyrian, Christian, Aramaic
» Saudi Arabian, Muslim, Arabic
Assyrian \ã-'sir-é-an\ adj or n (1998)   1:  descendants of the ancient empire of Ashur   2:  the Assyrians, although representing but one single nation as the direct heirs of the ancient Assyrian Empire, are now doctrinally divided, inter sese, into five principle ecclesiastically designated religious sects with their corresponding hierarchies and distinct church governments, namely, Church of the East, Chaldean, Maronite, Syriac Orthodox and Syriac Catholic.  These formal divisions had their origin in the 5th century of the Christian Era.  No one can coherently understand the Assyrians as a whole until he can distinguish that which is religion or church from that which is nation -- a matter which is particularly difficult for the people from the western world to understand; for in the East, by force of circumstances beyond their control, religion has been made, from time immemorial, virtually into a criterion of nationality.   3:  the Assyrians have been referred to as Aramaean, Aramaye, Ashuraya, Ashureen, Ashuri, Ashuroyo, Assyrio-Chaldean, Aturaya, Chaldean, Chaldo, ChaldoAssyrian, ChaldoAssyrio, Jacobite, Kaldany, Kaldu, Kasdu, Malabar, Maronite, Maronaya, Nestorian, Nestornaye, Oromoye, Suraya, Syriac, Syrian, Syriani, Suryoye, Suryoyo and Telkeffee. — Assyrianism verb

Aramaic \ar-é-'máik\ n (1998)   1:  a Semitic language which became the lingua franca of the Middle East during the ancient Assyrian empire.   2:  has been referred to as Neo-Aramaic, Neo-Syriac, Classical Syriac, Syriac, Suryoyo, Swadaya and Turoyo.

Please consider the environment when disposing of this material — read, reuse, recycle. ♻
AIM | Atour: The State of Assyria | Terms of Service