Assyrian Forums
 Home  |  Ads  |  Partners  |  Sponsors  |  Contact  |  FAQs  |  About  
 
   Holocaust  |  History  |  Library  |  People  |  TV-Radio  |  Forums  |  Community  |  Directory
  
   General  |  Activism  |  Arts  |  Education  |  Family  |  Financial  |  Government  |  Health  |  History  |  News  |  Religion  |  Science  |  Sports
   Greetings · Shläma · Bärev Dzez · Säludos · Grüße · Shälom · Χαιρετισμοί · Приветствия · 问候 · Bonjour · 挨拶 · تبریکات  · Selamlar · अभिवादन · Groete · التّحيّات

Masale d axlaq w tarbiya siyasi

    Previous Topic Next Topic
Home Forums Government Topic #189
Help Print Share

Jan Bet Sawocemoderator

 
Send email to Jan Bet SawoceSend private message to Jan Bet SawoceView profile of Jan Bet SawoceAdd Jan Bet Sawoce to your contact list
 
Member: Sep-14-2011
Posts: 305
Member Feedback

Masale d axlaq w tarbiya siyasi

Jan-14-2014 at 01:31 AM (UTC+3 Nineveh, Assyria)

Masale d axlaq w tarbiya siyasi
Jan Beṯ-Şawoce

Alert   IP Print   Edit        Reply      Re-Quote Top

 
Forums Topics  Previous Topic Next Topic

Jan Bet Sawocemoderator

 
Send email to Jan Bet SawoceSend private message to Jan Bet SawoceView profile of Jan Bet SawoceAdd Jan Bet Sawoce to your contact list
 
Member: Sep-14-2011
Posts: 305
Member Feedback

1. Masale d axlaq w tarbiya siyasi (Surayt) - Part 1

Jan-14-2014 at 01:35 AM (UTC+3 Nineveh, Assyria)

In reply to message #0
 
1

Malko d hëḏoye Dawud, këtwole taxtor ëšme Loqman. Yawmo may yawme malko Dawud kqore l taxtor Loqman l gabe, kumarle: Nẖarli rišo dë cwono, ẖzay be mënyo basimo mena, hawo tayliyo l mëklo.

Taxtor Loqman madcarle acle omër: Ţrowe ya u malkayḏi! w azze b darbe.
Lu malko këtwole qaţco d sawal, cabër baynoṯe, mëdlele rišo dë cwono, amţiyole l gabe li mcayanxana. Tamo mëẖyole bi arco w maẖtole qëm du šalfo. Šmëţle qarca w bëṯër jlëţle galda.

Mi cwono kula amţele lebo w lišono lu malko. Mbašlënne w axëlile b haniye.
Azze zabno bi ẖolo, lu malko naqla ẖreto qrele l Loqman, mërlele: Nẖarli rišo ẖreno dë cwono! Han naqla amţayli mena l muklo, be mën latyo basimo!

Azze. Sëmle cayni mede, nẖërle rišo dë cwono. Mëdle mena naqla ẖreto lišono w lebo. Dacër cal u malko, mbašlënne, naqla ẖreto axëlile b haniye. Bëṯër mëd axile, ţlëble taxtor Loqman l side, aṯi.

Malko Dawud mërlele: Ya taxtor Loqman, ţlëbli menox u basimo amţelox, ţlëbli u lo basimo hawo ste amţelox. Bas a tre ẖa, cayniwën!? Lë fahëmno qay cayni amţelox!.. I ẖëkme d hawxa mënyo? Kibox d ëmmatliyo?

Taxtor Loqman madcarle: Hani a tre d howën kayise, kayis mënayye bi arco layt! Hani d howën pësin ste bi arco apyas mënayye layt! Aẖ ẖaye d këtlan bu cëlmano u lebo kkëṯawwe, u lišono ste kquralle.

U lebo, be i nafšo mën kmaẖiso, huwweyo i cayno. Han naqla u lišono harke huwweyo u mtarjëmono laẖna, be tamo mën macna kit, bax xabre huwwe kmawḏëc i qiyme d këtte. Mawxa, mu yawmo d yawma, bu tarix di nošuṯo, u xabro këtle ǧalabe qiyme.

Yacni lebayna w meẖayna hawën ẖa w huwwe fëkër, maẖwalle be mën kmaẖësina w hani ste anjax u lišono kibe d samme b ifade w kamţelën laẖna.

I nafšo lašan d uḏco ruẖa, kobëc, bi qamayto d ẖayro bu lišono dë kmëstacmëlo cal ruẖa. I mëraye w ax xabre, harkene mkawne.

Haaa haṯeyo bëṯër d këmmina acla: Ašër nafšo ǧalabe kayisto! Ašër nafšo ǧalabe ẖarbo!

Alert   IP Print   Edit        Reply      Re-Quote Top

Jan Bet Sawocemoderator

 
Send email to Jan Bet SawoceSend private message to Jan Bet SawoceView profile of Jan Bet SawoceAdd Jan Bet Sawoce to your contact list
 
Member: Sep-14-2011
Posts: 305
Member Feedback

2. Masale d axlaq w tarbiya siyasi (Surayt) - Part 2

Jan-14-2014 at 01:38 AM (UTC+3 Nineveh, Assyria)

In reply to message #0
 
2

Čiko b şawci mẖaţo, mawqaḏla lebi…

Këtlan mamre macëfone w marẖëqone daẖ ẖaye d këtlan. Hën mënayye hanine:

Ëno hawxano… Bi masalaṯe ǧalabe mede d samno latli…. Lë qadërno cal ruẖi…. Zabno abadan latli…. Ëno haṯe (hano) laybi d samna…. Xwazi xwoṯox (xwoṯëx) d qudarno hëweno…. Ëno bi niye, ţaw mene ëno, qay kul mede hama koṯe cal qarci w lo diḏe…. Aẖuno ëno dlo šanş ëno…. Këtli šanş samyo… Majbur hawxa d samno… Bëṯër mi sacaṯe latla ëmkan…. Kowe caybo…. Gëd foyëš lebayye…. Gëd mëǧboni…

Am mamrani kulle, këmarno latatu nëxroye aclayye. Dlo mu haj diḏan, hani kul yawmo mëqqa kmëstacmëlinalle? Ucdo i naqla dë kquretunne mën kmaẖësitu? Bam momo macëqxun ya ste bu caks hani mënnani mšayalxun l ruẖayxun? Ma kowe hawxa ste?!

Aẖe w Aẖwoṯo,

Ucdo kubac d huwetu şadëqin… Am mamrani, i naqla d këmminalle, ma latyo tëhzimo mu šëwolo w mi mëštaylonuṯo d kit qëm kul ẖa b ẖa mënayna baẖ ẖaye?!...

Harke jawaba asasi mënyo? Hano mëd mnaqe ste, gëd ẖuzena baẖ ẖaye aydarbo kcobër? Mën ksoyëm? Këmarno harke i naqla d mëcbër, gëd maẖwe be aẖna aydarbo kruẖqina mi mëštaylonuṯo w bëṯër aydarbo kmaẖtina i mëštaylonuṯo cal ǧer më ruẖayna.

Hawu aḏno lu mede d këmmitu. Šmaculle! U mnaqyo dë mnaqalxun, këbcitulle cël aw taẖt mu xëţuto di ẖaqqaniye d kit baẖ ẖaye? Yacni rišuṯo aw mdabronuṯo këpxu d saymitu?

Haṯe mënyaṯe? Ḫkomoyo, diyošoyo, şxoro d caynoyo?

Aw?! Ḫa d forëqyo, mẖalëq dawseyo, miyodo d mëštaylonuṯoyo?

Aw?! Ḫa d šomëc lu uždan diḏeyo? Nfolo qëm daḏ ḏëcfiyatyo?

Hani kulle maclumyo b yawmo lawën w lë kowën. Ḫa dë mbadël aw d ţore cade, kubacla zabno. U ẖaqqano ste kobëc d ubenale zabno, zabno d kubacle…

Cwadu, mǧayeru aẖ ẖaye d qumayxun. Mjarebu w ẖzawu be hano baẖ ẖaye xi cade ste aydarbo kowe. U šanşano hawulle l ruẖayxun w ucdo bdawu bu ǧiyorano.

Harke raja hwawu proaktiv. Hwawu model w mudu dawro lašan d huwetu maṯlo l ǧer mënayxun. Ibacu dayëm u šroyo du qaţro qţiro d kit. Maǧ ǧalţe d kit lë zaycitu, hwawunne moro, maru hani diḏanne! Aẖna sëmilan, aẖna ste gëd šurenalle! Mawlefu ruẖayxun w ǧer më ruẖayxun d ëmmitu: Lo! ste. Suj w ẖkomo ucdo l nošo lë malwëšitu. Hano ţrawulle lu tarix. Huwwe ţër ẖukamle.

Lë ţucetu, maẖ ẖaye d ruẖayna aẖnana mëštaylone. I naqla d maydina hawxa mëštaylonuṯo, kowe halxo baẖ ẖaye.

Han naqla ucdo mudu d ëbcitu mẖaţo w d ëbcitu lë msalle, dlo zëcṯo mẖawulla ẖişo b xaşra më dëṯxu w maru ẖişo ”aaaaaaaaay!”
Lebo kuḏac gëd koyëw, bas aẖ ẖaye hani kţulbi mënayna.

Alert   IP Print   Edit        Reply      Re-Quote Top

Jan Bet Sawocemoderator

 
Send email to Jan Bet SawoceSend private message to Jan Bet SawoceView profile of Jan Bet SawoceAdd Jan Bet Sawoce to your contact list
 
Member: Sep-14-2011
Posts: 305
Member Feedback

3. Masale d axlaq w tarbiya siyasi (Surayt) - Part 3

Jan-14-2014 at 01:41 AM (UTC+3 Nineveh, Assyria)

In reply to message #0
 
3

Nafšoooo!...

Mën šëkël hat? Këtlëx caqël d ubatlan jawab l hawxa? Haka latlëx, mayko kibëx manţët caqël, šira, darbo, čara,..? Mi arco? Mi šmayo?...

I nafšo, mi walade, kamţo acma lu cëlmo genat xaş l ruẖa. Hani cam u zabno bu kanšo d këtyo, hedi-hedi krëwẖi w kmaydi qalëb.

Harke ẖësose, fëkrat, ẖarakat, ẖiyërtoṯo,… mšakle kmaydo w kobo lë ẖḏora. Han naqla u nošo mqabël daẖ ẖadisat d kowe, kmaẖwe fëcolo mšaklo. Harke, han naqla i nafšo, kmaẖwiyo li ẖolo d këtyo biyya, mën këtla.

I šaxşiyaṯe, harke këtla ẖarake pozitiv w negativ, hani falqo max xëşuşiyat diḏa kowën.

I ẖarake pozitiv, kobo i şërto di nafšo d këtla lawǧël w larwal du kanšo, kmaẖwiyo be u kanšo mën normat maqbele.

I ẖarake negativ, kobo i şërto d latyo normal, harke baroyo kmawḏëc u ẖrowo di ẖarake di nafšo. W haṯe këmminala ”i nafšo ẖarëwto”.

I nafšo ẖarëwto, b gawa mën mëdone ktëlyo? Hani rayzina hën mënayye harke laltaẖ…

  1. I calaqa d këtla cam an noše, kmëstacmëlola bas li manfaca d ruẖa. Hawxa nafšo kẖëzyo ruẖa cël më kul nošo. Narsistiye di nafšo ẖarëwto.
  2. Kiyobo d qarco qëm kul nošo. Dayëm snëqtoyo li naşiẖa w li šira. Fëkër lë këmţawro, mqabël d mede ste lë kuṯyo. ”E hawxayo yabo!” këmmo w kubacla dayëm ẖa cël më riša.
  3. Bi calaqa d këtla ste raẖme latla. Kul nošo kẖëzyole noẖët më ruẖa. B kafara këmcaḏbo ǧer më ruẖa. Şadistiye di nafšo ẖarëwto.
  4. Mawqëḏono d leboyo, l qul dan noše b damce d baxyo knëfqo, hawxa këbco dë mʹaṯro cal an noše. Histriyonikiye di nafšo ẖarëwto.
  5. Man noše dlë ẖḏora, dayëm niye d ẖarbo knëţro. Zëd mu lazëm mašëkniṯo, kẖëšwo an noše kamţën ḏarar cal ruẖayye. Paranoyidiye di nafšo ẖarëwto.
  6. Mhaddëdniṯo, dayëšto, ḏëlëm di nafšo ẖarëwto.
  7. Klayto dayëm bu caks du fëkër d këmhaymëno, yacni bu mamro mede w bu fëcël ǧer mede. L goran di ẖale w di hawa, qlobo w ţroşo. B tarte fëṯoṯo.

Aẖnone w Aẖwoṯo,

U kanšayḏan kanšo feodalyo . Hano hawi laẖna šëkël d ẖaye w cayišina acme hul li sacayaṯe. Hano malwëšoyo aclayna, hul ucdo heš lë qadërina b maḏco dë mẖalqinale li qalto du tarix. Mawxa an noše d qayëmlan bu kanšo feodalano, gëd nuţrina mënayye dlo yëlfono gëd qaymi cam ruẖo d demoqraţoyuṯo w caqël, ucdo zaẖmeyo.

Adyawma an noše mdabrone d këtlan b riše daš šutose, dag gabe, daẖ ẖarakat w dac citawoṯo mašiǧe w ǧalabe raẖuqene mi demoqraţoyuṯo.

Alert   IP Print   Edit        Reply      Re-Quote Top

Jan Bet Sawocemoderator

 
Send email to Jan Bet SawoceSend private message to Jan Bet SawoceView profile of Jan Bet SawoceAdd Jan Bet Sawoce to your contact list
 
Member: Sep-14-2011
Posts: 305
Member Feedback

4. Masale d axlaq w tarbiya siyasi (Surayt) - Part 4

Jan-14-2014 at 01:45 AM (UTC+3 Nineveh, Assyria)

In reply to message #0
 
4

Faylasof Seneka mërle: An noše d howën kafine, aḏno l hawno, l dino, l cadale latte,

w lu daca b naqla ẖḏo kiyobo d qarco latte…

Yëlfono, falsafe w dino…

Kul nafšo kcayšo b kanšo. Harke bu kanšo cam u zabno i nafšo kqëlbo këwyo nošo. Kul kanšo, cam i ţabica d këtle, jbiroyo d coyëš. Aẖ ẖëyewën cal d latne rëẖwoṯo du kanšo, i calaqa d këtte cam i ţabica mẖadadtoyo. Këtte ţalabe, ţabici dëṯṯe; mëklo, rwoco w ziyodo. Baẖ ẖaye acle dayëm dë kducri, hanoyo. Han naqla harke, më mede d zayci kmahzëmi, dlë zayci khujmi.

Yacni axolene, mfarxonene, rawocene w bëṯër hënne ste këtte yawmo, kmënqoli maẖ ẖayani. U nqolo dë kmënqoli, këtle qonune di ţabica. Harke, ya kmasiwi w kmënqoli w ya ste ǧer rëẖwoṯo lašan d cayši aclayye, kmëqţoli.

Aẖ ẖëyewënani cal d latte qiyme w qadër bu kanšo, qiyme d axlaq ste latte. Yacni u ẖaywan lo axlaq w lo mede d këtle cam u axlaq latle. Mawxa w lo nošo, lašan u ẖaywan lë komër ”Alo u ẖaywanano b axlaqyo!”

U axlaq, bu šrolo, li ẖolo han naqla knofëq baẖ ẖaye d kit bu kanšo. Hano bi calaqa d këtle lu nošo cam nošo ẖreno kmiḏëc. Ac calaqatani këtte ëşul, qanun w manoce. Hani kmidawzëni b disiplin.

Mawxa kẖuzena, bi qamayto ad dine, maẖëtte asasat lac cadat d kit bu kanšo … Muše, Dawud, Mšiẖo, Buḏa, Konfičiyus,… faylasufe lawxane…

Adyawma an noše, kuḏci af faylasufani mën hëwwe, bas naqla ẖreto an noše ǧiţene b kul mede d latle calaqa cam u axlaq.

Qay hawxa nafiloyo u nošo? Mënyo u sabab?

An nbiye d meqëm, lu dino, bu ziyudo teori huwwe. At teoriyani hawën cal i alohuṯo, cal aẖ ẖayle šmayone, cal i ẖţiṯo w cal u mnoco d këtla li nafšo bu kanšo w baẖ ẖaye. Hani cam u zabno, sëmënne cam disiplin w nafiqi li ẖolo.

Cam hawxa, naqla ẖreto lë qadiri d kolën b foṯe di ǧer axlaqiye. Aẖ ẖaye du kanšo, bu praktik xlëqqe noše zëd ǧer axlaqiyin. W adyawma kul mede xliţ w mxalxëţ bë ẖḏoḏe. Yacni u axlaq w u mede d latyo b axlaq… Maclumyo u šrolo bi duglo, u suj bu dlo suj, i ẖţiṯo bi lo ẖţiṯo, u xer bu šar,… Mën, ayko, ema, mënyo? Latyo iḏico.

Hawxa kul ẖarbuṯo amţela acma ẖarbuṯo ẖaṯto. Mqabël d haṯe…

Faylasuf Augistin komër: U qurmo du axlaq u maḏcoyo.

Faylasuf Descartes komër: I waḏife rišayto du caqël, kowe floǧo bayn li ẖarbo w li ţawto.

Bëṯër mani kulle, maclumyo u nošo mi emo lu cëlmano, acme ǧer axlaq, aw malyo bi ǧer axlaqiye, lë koṯe w lë kowe.

Ţroyo an noše kafine, halbat gëd mëtfoki lu gnowo w li ẖaramtiye. Bëṯër, hani kmëẖkomi w kmëšnoqi. Aw bi Šarica kmëqţoci idoṯayye. An noše d këtne bëṯre du jborano, hënne bëḏḏat ǧer axlaqiyinne. Cayni an nošani hënnene dë kxulqi aq qonune di ǧer axlaqiye bu kanšo w lë këbci mede d micadël bu kanšo.

An noše dlë këbci baẖ ẖaye d howe axlaq, namus, cadale,.. w ẖëkëm siyasi b ẖaq, kmaẖrëwi w këmfarfësi l kul mede. An nošani hënne ktëfki an noše lu suj w kobi zor d macmëri ha-ha ẖapsat. Bu aşël an noše d latte axlaq hanine.

Kito maṯlo komër hawxa:

U sawico, kẖošëw u cëlmo kule, këlle sawico,

U kafino ste kẖošëw ʹde këlle bu cëlmo laẖmo layt, ba mën samno?ʹ

Alert   IP Print   Edit        Reply      Re-Quote Top

Jan Bet Sawocemoderator

 
Send email to Jan Bet SawoceSend private message to Jan Bet SawoceView profile of Jan Bet SawoceAdd Jan Bet Sawoce to your contact list
 
Member: Sep-14-2011
Posts: 305
Member Feedback

5. Masale d axlaq w tarbiya siyasi (Surayt) - Part 5

Jan-14-2014 at 01:47 AM (UTC+3 Nineveh, Assyria)

In reply to message #0
 
5

Këmmina:
Acccccaw! Mën zlam! Lë kmëblëc! Mën mayiro!
Acccaw! Mën ḏacif! Mën kayiwo! Mën slawlaq!
Accccaw! Mën mëxlo! Meẖo layt! Meẖe xayëf!

Baẖ ẖaye, qëm kul nošo, knofëq hawxa darbone lu halxo. Bu yamino ẖa d malëx, i haybe, bu semolo ẖa d malëx i ǧaye, bu falgo ẖa d malëx, mena i ǧaye w mena ste i haybe, këmvayëc.

I masale d kit harke, ma mën masaleyo? Haka bi ẖolo ǧaye, dacwa, dacwadariye,… d lowe… Tamo nošo d ëmminale ”Alo hanoyo u nsan” aydarbo kowe?

***

Baẖ ẖaye kul nošo, këtle ǧaye…

W bëṯër li nošuṯo ste këtle ǧaye ẖreto …

Hawxa u nošo bi ǧayaṯe, kobëc bëṯër d howe sahmo mu falqo rabo d këtla li nošuṯo.

Haṯe i nafšo, lruẖa hiyya kẖëzyole.

W harke u nošo, latle i qudrayo d qodër maẖwe, haṯe l nošo ẖreno.

***

U nošano d këmmina acle ”hat nošo hat”, mi naqqa d bode ẖoze aq qësurat d këtle, kowe tam nošo. Ḫzoyo d qësur, badaye d ẖa d maẖës ruẖe ”ašër ëno nošono”.

B cayno d ǧer nošo, nošo şërto l ruẖe lë kmaqbël. U sabab: U nošo b cayne d ruẖe, kẖoze ruẖe ǧer. Du šrolo ste, hawxa dayëm kobëc d ẖoze ruẖe w d mëẖze.

Kul nošo, më larwal diḏe w hul l lawǧël diḏe, cayniyo. Harke u mede asasi dë kţore i frišuṯo d kit, bayn l nošo w l nošo ẖreno, i ẖiyërto d kit cal aẖ ẖayeyo.

Najaẖ, njoẖo baẖ ẖaye, hama mar këtle ẖa darbo… Ḫa d yolëf w dayëm d mawlëf ruẖe, d manfëq dars maǧ ǧalţe d këtle, hedi u darsano, huwwe kobe i tajrëbe l ramẖël w du ẖreno.

Ḫa d ẖoze aq qësurat d ruẖe. Bu darǧo qamoyo ste, ẖa d ẖoze ruẖe b cayne d hani dlë krëẖmile…. Kit maṯlo komër: U ẖawro komër mayëro! Han naqla harke, aẖ ẖawrone d hawxa, bu šrolo ma hani dëžmën kowën l ẖa?

I macna d kobe lu nošo, huwwe nošoyo, i ẖuboyo, haṯe bu lebo yatëwtoyo. Tamo knëţro d nëfqo.

Ḫubo… b ẖa xabro… ẖa d obeyo.

Han naqla wayla lawo d qodër w d oḏëc ubela.

Harkeyo u nošo d koḏëc ruẖe nošo w heš ucdo harke kowe nošo.

Hawxa u nošo, kbode d maẖës ruẖe huwwe nošoyo.

Alert   IP Print   Edit        Reply      Re-Quote Top

Jan Bet Sawocemoderator

 
Send email to Jan Bet SawoceSend private message to Jan Bet SawoceView profile of Jan Bet SawoceAdd Jan Bet Sawoce to your contact list
 
Member: Sep-14-2011
Posts: 305
Member Feedback

6. 1. Mën mede ẖalyoyo …

Jan-14-2014 at 01:50 AM (UTC+3 Nineveh, Assyria)

In reply to message #0
 
1

Mën mede ẖalyoyo …

Mën mede ẖalyoyo d roẖamnax
Alah, baw wariḏe komaẖësno ebax
Kocašno b fëşẖo, ba mëqqa camuqo b lebax
Komaẖësno, bi ruẖayḏi bëxwa, kalax

Lebi maẖisoyo bi ẖubo ẖanënto d këtlax
B kul gorëšto d nafas, alah lebi kobošal aclax
Mën ẖalyoyo ẖa d roẖamlax leee …
Han naqqa, heš ẖa d howe b lebax

L më qërrëke!...
Ba mëqqa basimoyo!...

Alert   IP Print   Edit        Reply      Re-Quote Top

Jan Bet Sawocemoderator

 
Send email to Jan Bet SawoceSend private message to Jan Bet SawoceView profile of Jan Bet SawoceAdd Jan Bet Sawoce to your contact list
 
Member: Sep-14-2011
Posts: 305
Member Feedback

7. 2. Qiyamto, kal kaṯyo

Jan-14-2014 at 01:52 AM (UTC+3 Nineveh, Assyria)

In reply to message #0
 
2

Qiyamto, kal kaṯyo

Alah zabno komqarawle
Koḏacno
Disa komarno qay
Diko haw gëd qore …

Ba mën somno?!
Mërwaylën l hëna:
Yabo aẖ ẖayani lo kotaymi!
Ba kalën kotaymi w kofëšri

W heša kal kummi: Alah šëmšo sti,
bahro haw gëd obolan!..
Briṯo gëd kulyo w haw kobërmo
Daxil dëṯxu! Yabo sumu mede!..

Kal calcolo koqayam w aṯoyo,
Kummi: Alah hano ẖaroyoyo!
L më rabbane më saymono?
Haw kuḏcono! Hawyono šaš!

Ma haṯe mën rastbuniyeyo?
Këple nošo mënxu d omarli?
Tawu sumu ẖërše! Qrawulle
lu qašëko d fotaẖ u kṯowo!..

Yabo hawxa tëslaya lo kobac,
Qumu sumu mede, mi xarafa
Ţrawu, ţrawu, basla!
Gammiye d Nuẖ sti dlo fayda

Hawaryooooo!

Zbaţu l iḏe dë ẖḏoḏe w haw
Bas mahiditu bayte dë ẖḏoḏe!
Maru ”Halla!” w qumu gëdino!

Alert   IP Print   Edit        Reply      Re-Quote Top

Jan Bet Sawocemoderator

 
Send email to Jan Bet SawoceSend private message to Jan Bet SawoceView profile of Jan Bet SawoceAdd Jan Bet Sawoce to your contact list
 
Member: Sep-14-2011
Posts: 305
Member Feedback

8. 3. Haka dacwadar hët …

Jan-14-2014 at 01:53 AM (UTC+3 Nineveh, Assyria)

In reply to message #0
 
3

Haka dacwadar hët …

Yabo qum qum, lo kolat!
D howelux dacwa, iḏac l ẖa mede
Haṯe këtla nuro, kala b ruẖux
Bas he lo jǧirolux

Alah yawmo d juǧrëtla
I şallëke d lebux w d meẖux
Cam ẖḏoḏe a tre gëd fušri
Haṯe hawxa haškara iḏaca

Lawo d šëmcat l xabri
Qum w jǧar li nuraṯi
Lboy d howat ẖakomo
Cal zabno w cal bahro

Hano konoqaşlan, hway šarvan
B yawmo w tre mţoyo layt ha!
Bas ǧamo layt! Kul mede b şabër
Briṯo latyo l yawmo w tre, malax!

Alert   IP Print   Edit        Reply      Re-Quote Top

Jan Bet Sawocemoderator

 
Send email to Jan Bet SawoceSend private message to Jan Bet SawoceView profile of Jan Bet SawoceAdd Jan Bet Sawoce to your contact list
 
Member: Sep-14-2011
Posts: 305
Member Feedback

9. 4. Lë qadërno d maẖkeno

Jan-14-2014 at 01:54 AM (UTC+3 Nineveh, Assyria)

In reply to message #0
 
4

Lë qadërno d maẖkeno

Ucdo d bëxeno, kšëmcitulli,
Bi kṯawto, këbxu gayšitu
B iḏayxun ad damce?

Maḏco latwoli, zmoro haqqa basimoyo
Bac ax xabre, mëqqa mdarmënone
Lu dard heš meqëm d oṯe

Kito dëkṯo, kuḏacnola
Ḫa kibe d mëžǧël cal kul mede
Mqarawlila ǧalabe, kšumacno
Bas lë qadërno d maẖkeno

Alert   IP Print   Edit        Reply      Re-Quote Top

Jan Bet Sawocemoderator

 
Send email to Jan Bet SawoceSend private message to Jan Bet SawoceView profile of Jan Bet SawoceAdd Jan Bet Sawoce to your contact list
 
Member: Sep-14-2011
Posts: 305
Member Feedback

10. 5. Ëšme acleyo: Hano Qiyomoʹyo! Qiyomo!... Qumu!

Jan-14-2014 at 01:55 AM (UTC+3 Nineveh, Assyria)

In reply to message #0
 
5

Ëšme acleyo: Hano Qiyomoʹyo!
Qiyomo!... Qumu!

Bay yawme ciqe,
hawxa kṯëwwoli cal as siyoǧone
Dlo zëcṯo mu malkamot …
Iḏo w raǧlo, a tre mqaydewën ha!

Dlo kloyo malaxli, msawyo
Tamo kṯëwli hawxa: Am maye mẖawdëli!
Man mënayxu lë kmahëmle? Ma lo hatatu aš šatoye!
Qumu li raǧlo! Basla li be-zraviye d këtxu!

Dlo kloyo, hawxa bay yawme ciqe kṯëwli:
Ḫur! Mi šëmšo mẖawtakno, bay yawmanëk
Hama kuraxnowo cal fërşa, cayni d sëwco
Ǧer menëx, ẖalal aclëx w ẖaram acli, nošo luḏacwo

Bi gavayo mën lawnowe u fëşẖo?
Ḫaram acli laḏëcno, bas ẖzeli d kayëm
Hani ëšne, lë yalëfiwo cayni l bahro
Bi cëtmo, cal as siyoǧone, kṯëwwoli ëšmëx

Šëmţiwo bahre d zabuqo, ëno kalyo cal i sqëfto
Bad darbe nfolo, qiyomo w ẖatta čëẖčofo
Bas u dëkomo d iḏi, wlo naqla, lë ţreli rafyo
Kṯëwli ëšmëx dlo nëqşaniye, kamilo

Mërre gëd ţofën ak këkwe
Më ǧamo, ţër ţofën!
Man kţocën ǧamo d hawxa?
Bëṯër ëno dë kṯëwli ëšmëx

Han naqla ţër xoyër nahre, haw kmahëmli!

Alert   IP Print   Edit        Reply      Re-Quote Top

Jan Bet Sawocemoderator

 
Send email to Jan Bet SawoceSend private message to Jan Bet SawoceView profile of Jan Bet SawoceAdd Jan Bet Sawoce to your contact list
 
Member: Sep-14-2011
Posts: 305
Member Feedback

11. 6. Ḫamuşo ẖamuşo, gëd nofëq mu nẖiro!...

Jan-14-2014 at 01:57 AM (UTC+3 Nineveh, Assyria)

In reply to message #0
 
6

Ḫamuşo ẖamuşo,
gëd nofëq mu nẖiro!...

Cël mu ẖaşo këtlan ţacno ǧalabe yaquro
Lë kmëţcën, lë kmëgrëš! Lë kmičaẖčëf!

Këtlan lebo ẖašyo, gëmre buwwe d faẖmo
Këtwolan namus hawi falqe-falqe taẖt mi raǧlo

Nadame bu lebo, cal mën?
Kul dëkṯo cëtmo, mkasyo cam siyoǧone

Ḫës, ẖasis, nafas layt!
Warox yabo, bu caybano, aloh haw kmicëš!

Aẖuno, hano, mu nẖiro
ẖamuşo-ẖamuşo amţalle

Knoẖët ”ẖaram b ẖaram!”
Ma hawo d lalcël gëd cufelan!

Idoṯo mganbële hawxa b admo!

Alert   IP Print   Edit        Reply      Re-Quote Top

Jan Bet Sawocemoderator

 
Send email to Jan Bet SawoceSend private message to Jan Bet SawoceView profile of Jan Bet SawoceAdd Jan Bet Sawoce to your contact list
 
Member: Sep-14-2011
Posts: 305
Member Feedback

12. 7. Becar fëš!..

Jan-14-2014 at 01:58 AM (UTC+3 Nineveh, Assyria)

In reply to message #0
 
7

Becar fëš!..

Mžid idoṯo hënne ftiẖe
Këlle kmiẖarki, krëmši
Iḏicoyo, ţacno gëd manẖëti

Lalcël caymo, ba mën bahre këtle!..
Tlele b ruẖe i cayno du bahro
Këtle iboco, ţlobo mu meẖo

Hama d manẖët u ţacnayḏe
Gëd maẖwe u bahro mi cayno
Ţrowe li cëtmaṯe hama lawno

Ţrowe qayso-qadaẖ lu hawno
Han naqla gëd koyëm u caymo
Zaţan u cëlmano zëd mu lazëm catëm

Aṯoyoyo jil, gëd manţe xer acme
Gëd ẖuzeno foṯe ramẖël!
Zëd mu lazëm aloh baxti kayëm

Hama mën d howe, hat fëš bëşuşo
Balki u ţacnawo kubacle ţcono
Fëš ëšmo be-car hama lašane

Ḫzelox balki meẖi naḏëf mi cëtmayo
Lë mqadmatla! Dlë zaydo w fayšo!
Mẖasi babox, ẖur! Heš idoṯo ftiẖe, knuţri!

Alert   IP Print   Edit        Reply      Re-Quote Top

Jan Bet Sawocemoderator

 
Send email to Jan Bet SawoceSend private message to Jan Bet SawoceView profile of Jan Bet SawoceAdd Jan Bet Sawoce to your contact list
 
Member: Sep-14-2011
Posts: 305
Member Feedback

13. 8. Ya noše, ma šamëcitu d aṯi maţro?

Jan-14-2014 at 01:59 AM (UTC+3 Nineveh, Assyria)

In reply to message #0
 
8

Ya noše,
ma šamëcitu d aṯi maţro?

Šamëcitu l ẖës diḏe?
”Han naqla hawxa tamamyo!” komër
”Meni haqqa!
Manḏafli u admo, u cajaq w i dacṯo …
U mede d fayëš, han naqla sahmayxunyo!”

De yalla nfalu bëṯre ţaşe b ţaşe
B ẖubo lu cwodo, mudulla
Ţlamṯoyo, de yalla flaǧulla
B uždan naḏifo hawo d lebayxun
Yawme ẖaṯe këlle knuţrilan

Ya ẖawro!
Heš meqëm d oṯe maţro ẖreno
Darbo lobët lu mzabno w lu xayën
Zrac b lebox aẖuṯo qamayto
Bëṯër ẖubo d arco!

Alert   IP Print   Edit        Reply      Re-Quote Top

Jan Bet Sawocemoderator

 
Send email to Jan Bet SawoceSend private message to Jan Bet SawoceView profile of Jan Bet SawoceAdd Jan Bet Sawoce to your contact list
 
Member: Sep-14-2011
Posts: 305
Member Feedback

14. 9. U ẖakomo, latyo rab mu ẖaq

Jan-14-2014 at 02:00 AM (UTC+3 Nineveh, Assyria)

In reply to message #0
 
9

U ẖakomo,
latyo rab mu ẖaq

U ẖakomo
Darbe šrolo, bë ẖḏo xaşra
Caynoṯe mbalqe kẖayri lu ẖaq
Bi mizën msëkto tarte w lo iḏo
I mẖaţo tam kliṯo cal u ẖaq

Nafšo më lalcël dlë kẖayro
Kuwela lebo basimo
Dacwa rabṯo w raẖëqto
Kubacla halxo, ẖaylo

Gëd umarnolxun mede:
U ẖakomo, abadan latyo rab mu ẖaq!
Latyo rab mu camo!
Ma aydarbo gëd doyëš u ẖaq?

U camo huwle ẖaq, kibe gurašle
Bu yawmo du ẖšowo, lë ţocët
Gëd gurašle w ţolëb ẖšowo
I cade hawxayo!

Alert   IP Print   Edit        Reply      Re-Quote Top

Jan Bet Sawocemoderator

 
Send email to Jan Bet SawoceSend private message to Jan Bet SawoceView profile of Jan Bet SawoceAdd Jan Bet Sawoce to your contact list
 
Member: Sep-14-2011
Posts: 305
Member Feedback

15. 10. Hawli hawxa račeta …

Jan-14-2014 at 02:00 AM (UTC+3 Nineveh, Assyria)

In reply to message #0
 
10

Hawli hawxa račeta …

Hama d huweba darmono
Ţër maşër an noše laẖ ẖaye
Ţrowe cayno li ẖubo

Bayn idoṯe di ẖabëbto ţrowe
Cşiro w kuyawle w boxe
Hawle l lebi hawxa darmono …

Kṯaw hawxa račeta,
Ma mën gëd howe?
Ţrëwyo bëqto d ẖubo!

Giyošo hawxa ẖalyo
Ţrowe tre xabre šafire
U sabab:
Ašër taxtor, yaqiḏo d hawxano!

Alert   IP Print   Edit        Reply      Re-Quote Top

Forums Topics  Previous Topic Next Topic


Assyria \ã-'sir-é-ä\ n (1998)   1:  an ancient empire of Ashur   2:  a democratic state in Bet-Nahren, Assyria (northern Iraq, northwestern Iran, southeastern Turkey and eastern Syria.)   3:  a democratic state that fosters the social and political rights to all of its inhabitants irrespective of their religion, race, or gender   4:  a democratic state that believes in the freedom of religion, conscience, language, education and culture in faithfulness to the principles of the United Nations Charter — Atour synonym

Ethnicity, Religion, Language
» Israeli, Jewish, Hebrew
» Assyrian, Christian, Aramaic
» Saudi Arabian, Muslim, Arabic
Assyrian \ã-'sir-é-an\ adj or n (1998)   1:  descendants of the ancient empire of Ashur   2:  the Assyrians, although representing but one single nation as the direct heirs of the ancient Assyrian Empire, are now doctrinally divided, inter sese, into five principle ecclesiastically designated religious sects with their corresponding hierarchies and distinct church governments, namely, Church of the East, Chaldean, Maronite, Syriac Orthodox and Syriac Catholic.  These formal divisions had their origin in the 5th century of the Christian Era.  No one can coherently understand the Assyrians as a whole until he can distinguish that which is religion or church from that which is nation -- a matter which is particularly difficult for the people from the western world to understand; for in the East, by force of circumstances beyond their control, religion has been made, from time immemorial, virtually into a criterion of nationality.   3:  the Assyrians have been referred to as Aramaean, Aramaye, Ashuraya, Ashureen, Ashuri, Ashuroyo, Assyrio-Chaldean, Aturaya, Chaldean, Chaldo, ChaldoAssyrian, ChaldoAssyrio, Jacobite, Kaldany, Kaldu, Kasdu, Malabar, Maronite, Maronaya, Nestorian, Nestornaye, Oromoye, Suraya, Syriac, Syrian, Syriani, Suryoye, Suryoyo and Telkeffee. — Assyrianism verb

Aramaic \ar-é-'máik\ n (1998)   1:  a Semitic language which became the lingua franca of the Middle East during the ancient Assyrian empire.   2:  has been referred to as Neo-Aramaic, Neo-Syriac, Classical Syriac, Syriac, Suryoyo, Swadaya and Turoyo.

Please consider the environment when disposing of this material — read, reuse, recycle. ♻
AIM | Atour: The State of Assyria | Terms of Service