Assyrian Forums
 Home  |  Ads  |  Partners  |  Sponsors  |  Contact  |  FAQs  |  About  
 
   Holocaust  |  History  |  Library  |  People  |  TV-Radio  |  Forums  |  Community  |  Directory
  
   General  |  Activism  |  Arts  |  Education  |  Family  |  Financial  |  Government  |  Health  |  History  |  News  |  Religion  |  Science  |  Sports
   Greetings · Shläma · Bärev Dzez · Säludos · Grüße · Shälom · Χαιρετισμοί · Приветствия · 问候 · Bonjour · 挨拶 · تبریکات  · Selamlar · अभिवादन · Groete · التّحيّات

Sayfo … (Surayt)

    Previous Topic Next Topic
Home Forums Government Topic #199
Help Print Share

Jan Bet Sawocemoderator

 
Send email to Jan Bet SawoceSend private message to Jan Bet SawoceView profile of Jan Bet SawoceAdd Jan Bet Sawoce to your contact list
 
Member: Sep-14-2011
Posts: 305
Member Feedback

Sayfo … (Surayt)

Jun-04-2014 at 09:53 PM (UTC+3 Nineveh, Assyria)

Last edited on Jun-04-2014 at 10:10 PM (UTC3 Nineveh, Assyria)
 
Sayfo
Jan Beṯ-Şawoce

Alert   IP Print   Edit        Reply      Re-Quote Top

 
Forums Topics  Previous Topic Next Topic

Jan Bet Sawocemoderator

 
Send email to Jan Bet SawoceSend private message to Jan Bet SawoceView profile of Jan Bet SawoceAdd Jan Bet Sawoce to your contact list
 
Member: Sep-14-2011
Posts: 305
Member Feedback

1. Sayfo … Part 1

Jun-04-2014 at 09:56 PM (UTC+3 Nineveh, Assyria)

In reply to message #0
 
1

Hawi zawno, kulxu bam momo xëdwoṯi ẖzalxu, b kul dëkṯo qayëmina li lotëke, layëmina, malaxlan,… bu bër-bër, maqëmlan ëšmo i qiyëmto… Haṯe mëralla: I masale d Sayfo!... Bëṯër?

Aẖuno! Hayo ţrayya cal Aloho! Huwwe koḏëc šuǧle!...

Maṯlo komër: Mede lo mu lebo, kowe dino baţilo.

***

Bu ţuro kito ẖëyewën, hën arconoye w hën šmayone. Bas d kowe saṯwo, mu quro w mu galaḏ rmošo nëquşo kuwalle. Blalyo w bimomo, kdocën w këmmi ”ema gëd oṯe rabëc!”.

Bas d koṯe, knëfqo i šëmšo. Kfošër talgo, kyorëq gelo w kowe zabno daf faqẖe. Aẖ ẖëyewën b fëşẖo kkurxi, ayko kit zëd šẖanṯo d šëmšo, ţamo klaymi. Mëd šaẖënne, kbodën d mëžǧoli. I žǧaliye, maclumyo kyërxo. Mede ţabici, kowe mzarţone, këmbar-bëri ziyudo, noše lë kţocën kbodën d mibarbëzi. Hawxa hedi knuţri l šato ẖreto.

***

Masale d Sayfo, masale rabṯo w siyasiyo. B zabno karyo, nafiqo li ẖolo. Hano ste më qëm ruẖe lawi, w mede siyasi më qëm ruẖe baẖ ẖaye, lë knofëq li ẖolo.

Lu nfoqo du Sayfo, hawi cwodo. Cwodo kibowe caqël, hawno, ylofo, kroxo bad darbe, tëltimo, baxyo, tahluka w mawto.

Adyawma kẖuzena, u tacbo bde ëšmo d mëfhëm, yacni u bzarco dë zric, bdele kmawrëq. Hano lašan d cole mi arco, heš kubacle ǧalabe caqël. Hawxa caqël, lë kowe d howe buwwe caqël d bacaṯ, cito w barbariye. D howe, gëd xuşrina naqla ẖreto i emo w i barṯo!

B karyo d umarno: Moda d rabëc, li tëslaye, lë saymina Sayfo! Kowe ǧalţo l masale d Sayfo.

***

Bi masale du Sayfo, heš ẖaṯo, nafëqina lu rahţo du ẖëngaliyo. Qumayna këtlan darbo ǧalabe raẖuqo.

Alert   IP Print   Edit        Reply      Re-Quote Top

Jan Bet Sawocemoderator

 
Send email to Jan Bet SawoceSend private message to Jan Bet SawoceView profile of Jan Bet SawoceAdd Jan Bet Sawoce to your contact list
 
Member: Sep-14-2011
Posts: 305
Member Feedback

2. Sayfo … Part 2

Jun-04-2014 at 09:57 PM (UTC+3 Nineveh, Assyria)

In reply to message #0
 
2

Maṯlo komër: Gab ac carab zayëd u mëšẖo, bdalle gdayfile bu ţizo.

Harke bu Swed, sim bi cito yawmo d Sayfo. Hawi czomo, mamro, fërojo, tëslaye,…

Gawre bë šwerëb ẖlime kome d gawre, badlat w qrawetat aclayye, mëžǧalle, mzaraţte, mhawarre,… ţlëbbe ma swediye ”qay lë kmuqḏitu babe d Tërkiya? Hano këtxu tajara lo?! Mawxa mede lë ksaymitu? Mënayna mi tajara, ayna ţawyo?”

***

Hawxa, hani tam 40 šne, kul mede mẖalaqlan më qḏolayna, mede l ramẖël lë sëmlan. Knuţrina kul mede gëd howe më qëm ruẖe. W lawi.

***

Aẖnone w Aẖwoṯo,

Qamayto gëd ţulabno šëbqono w bëṯër kubac d ţuretulli ”ẖiro” lašan d maẖkeno u mede xëd këtyo. Dlo hawxa ftiẖo maẖkena, mnaqšina, mqadmina, këṯwina w qurena, i ẖaqiqa, i ẖarbo, i ţawto, i cwëjto,… aydarbo gëd nëfqo li ẖolo? Mawxa kubac kulxu, mën kit b lebayxu, b meẖayxu,… kṯawulle. Hano tarixyo! Kibe caybo ste, kibe bu caks ste. Mede normalyo, mëlfina ruẖayna ste d ẖuzenale mede normal.

***

Ay yawme qamoye dë bdewoli b qëbole cam niše w gawre şëroye sowe, ẖawrone qariwe w raẖuqe, b cayno d daywono, ẖërre w ẖayriwo bëno.

Ëmmiwo: Raǧlayxun bi emo, hano Jano mdaywën! Abri mën kit sas sowani? Quţa di ẖmërto? Ero b eme d ẖa b ẖa mënayye!...

Hën ste cal a kṯowe: Abri hani mënne? Nakno hawxa kṯowe! Ţizi lë këmkafarno bënne! Abri sëmlox šuǧlo xi cade, šqalox caraba!... Axul! Štay! Zox hat ste nuk w mkayëf! Mën gëd mëfqët mas sowani?

I ẖaqiqa kuḏac mayërtoyo, bas klozëm d yulfinala.

Alert   IP Print   Edit        Reply      Re-Quote Top

Jan Bet Sawocemoderator

 
Send email to Jan Bet SawoceSend private message to Jan Bet SawoceView profile of Jan Bet SawoceAdd Jan Bet Sawoce to your contact list
 
Member: Sep-14-2011
Posts: 305
Member Feedback

3. Sayfo … Part 3

Jun-04-2014 at 09:59 PM (UTC+3 Nineveh, Assyria)

In reply to message #0
 
3

Maṯlo komër: I šalqa d qayëm mu arco du baẖër, layko maţyo? Aloh maḏco latli?!

Aẖnone w Aẖwoṯo,

Kmëtyaqanno, kmaẖësitu b iḏi, këtli mabrad kmaẖrafno, mqabël di cëtmo, di jahale, di samyuṯo, di fanatikiye, di faqqatiye, dax xarafat, du mërli w mërlox w di ţaşe mvayacto,… d kit qumayna.

Qayëmno li raǧlo lašan aẖ ẖaye d këtlan, hani d samnën arco-qarco w qarco-arco… Këtli pilan, program, ajenda mu yawmo qamoyo… Hawxa malaxli bu darbo ciqo w yarixano. Hano heš ǧalabe yarixoyo, më zawno, kuḏac ǧalabe kayiso, cëmri lë kmakfe d mëţeno li ẖarayto du darbano d këtli….

Qaleyo, këmqatalnola! Ḫëngaliyoyo, kruhaţnole! Aţlahiye li cëtmo dlë ẖḏori, yalëfno siyasi, šanş hul d oṯe meni d lëbenola. Mën bëşuşo, šroǧo, šamco, gazëke, fanos, luks, lampa,… kluzamla, këmjarabno d manţena.

Harke egoist samyo, lawino! Hano flëǧli cam ǧalabe bu cëlmo, heš kfëlaǧnole w dlo, hano këtwole ëmkan d miḏëc? Lo!

Hawxa sëmli gëšro cam ǧalabe noše. Ţreli haymonuṯu lruẖi w lu cwodo du Sayfo. Adyawma Sayfo b kul dukṯo kmitëžǧël w kmëcwëd acle.

Hawxa amţeli u ”soz” d huwli l qašti Rume l dukṯe. Šato 1972 b Mëḏyaḏ nqilo maẖ ẖaye.

Nacimewan, blalyo meqëm mu dmoxo, maẖkiyowa lëno w l aẖnoni, ẖkeyat bag gale. Bu rišo bëdyowa cam u Sayfo, bi ẖarayto ste matëmowa cam u Sayfo. Ëmmowa: Abri! Lë ţucetulle! Maẖkawulle!

Këmarno hawxa qaštoṯo ǧalabe këtwo bu Ţuro.

Qašti mi cayle d Bë-Rhawiʹwa. Cëmra 10 šne, gawiro cam Ḫabib Rhawi. 2 yarẖe acme lë qaḏila, mẖe Sayfo. Bu darbo azolo lruẖe l Ciwardo, hën kurmanj bu darbo qţëlle sëmme i laše falqe-falqe.

Fayišo armalţo. Nacime lawila.

Jëddi Ḫanna Bë-Maqsi Musa b Karjosʹwe. Qţil tamo sahmo rabo man noše d këtwole. Huwwe maxlaşle. Tlewole ruẖe bayn dak karme bu ţuro d Karjos. Acme këtwo ǧer ste. Uxliwo bëssire, cënwe, tene, tuwaṯ, baluţe w tulanwo ruẖayye taẖt as sate.

Ak karme këtwolle nëţuro kurmanj, ëšme Ḫëso Taqa. Huwewo u babo dë Brahim Čawiš b Mëḏyaḏ. Hano Brahim Čawiš cëwadwo bi ”bolga” d Mëḏyaḏ, më zawno mayëṯ. Këtwole nacime Ardoǧano, Caliyo, Nadimo, Ḫsayno, Šexmuso. Tarte niše këtwole.

Hano Ḫëso Taqa, huwwe tulewo w mcawanwo aş şëroye d faliti mu qaţlo. Umarwolle: Bas dë mhawarno b kurmanji ”Aw kina?!” Tlawu ruẖayxun, aṯën aq qaţole, kkurxi aclayxun w dlo, zoxu w toxu bayn dak karme.

Jëddi haw mdayanle, abëc d ëzze l Anẖël. Azze blalyo bi cëtmo lu bayto d Oşman Aǧa b Karjos. Qayţowe. Bu zabnano cadewa, ẖa d nufalwo b baxte du ẖreno, ëzzewo l riše di dargëšto du bayto. Quraşwo u bëbbo damixo lašan am more d maẖisi.

Cal i goro damixewën, jëddi hawxa sëmle. Maẖësse. Ḫzalle jëddi, uḏciwole. Qayëm Oşman Aǧa naẖët acme, manfaqle mgawe di qriṯo. Mërlele: Ḫanna! Darbo-darbo lëzzox gëd mëqţolët! Ţuro-ţuro zox!

Hawxa xalëş w maţi l Anẖël.

Alert   IP Print   Edit        Reply      Re-Quote Top

Jan Bet Sawocemoderator

 
Send email to Jan Bet SawoceSend private message to Jan Bet SawoceView profile of Jan Bet SawoceAdd Jan Bet Sawoce to your contact list
 
Member: Sep-14-2011
Posts: 305
Member Feedback

4. Sayfo … Part 4

Jun-04-2014 at 10:12 PM (UTC+3 Nineveh, Assyria)

In reply to message #0
 
4

Maṯlo komër: I naqla ruẖo w uždan d lowe, man mën fayëšle d ëmminale ”hat nsan hat!” …

Aẖnone w Aẖwoṯo,

Kul naqqa kmaḏkarna, mu fëkër d këtxu, haka këtxu haymonuṯo buwwe, nẖoto lë nuẖtitu! Mu kritik abadan zëcṯo lë zaycitu, iqoro l kul fëkër maẖwawu.

***

Bi ẖalëqtaṯe, kubac d ubeno ëšmo d şërto cal an noše, adyawma d këmmi cal ruẖayye ”aẖna am mëḏyoye…”

Kulan bu šëwolano maḏco cal d latlan, kẖëšwina kul nafšo d fayito b Mëḏyaḏ, hawyo mëḏyayto. Hano mi fëqriye du maḏco, jawab cal d latle kfoyët xëd šrolo w kmëzrëc b kul dukṯo.

I masale latyo hawxa. Bu Sayfo, šabṯo qamayto d tamëz 1915, b Mëḏyaḏ, mëḏyoye w lo mëḏyoye, qţili. Këtwo kaldoye, manwën? Adyawma maḏco latlan! Këtwo armënoye, manwën? Maḏco latlan. Këtwo nasţërnoye, manwën? Maḏco latlan.

Bas u cwodo d kit qumayna, klozëm mdawëm w hani miqafe maḏco aclayye.
Bëṯër mu Sayfo, ǧalabe noše aṯën d şuţri b Mëḏyaḏ. Sahmo rabo fayiši dlo more, harke qayëmi w hawën hënne ste mëḏyoye.

Mëḏyaḏ këtla tarix komo di barbariye. Bë-Safar, zabno yarixo grëšše u rišo di barbariyaṯe. Hawën sabab l ǧalabe negativ b Mëḏyaḏ w larwal d Mëḏyaḏ. B karyo d umarno, bu Ţuro cal u namus di dawle hënne mdafciwo.

Am mëḏyoye lu şëroyo d kowe bi qriṯo, hul ucdo ”kurmanj” këmmile. Buwwe b cayno nëẖëtto ẖërre, hul ucdo ste hawxa kẖayri. Bi sëbbaṯe hawilan harke b Awruppa ǧalabe qatre, nošo dlë kmaẖës bënne. Hani kobëc d nëfqi li ẖolo, lašan d mëfhomi.

Cël mi adro du cwodo du Sayfo, zabno yarixo, kito ẖargagunat w čaẖčakunat. Hani cal iḏe dam mëḏyoye bşimi, xi maslae du maṯlo d komër: I këmme d hano b qarce d hano w hano qoyëm čoyëk lano!...

Aẖna am mëḏyoye, nëquşo ksaymina mede mcadlo w kibe caqël. Këtlan garmo brimo, nošo zu bë zu lë krëẖmina. Li barbariye d howe, bu femo w bu bërbër l zabno krëẖmina. Mëd hawi admo w qaţlo, tëẖriwo kmëgrëšina li qullake d këtlan, hedi këmfarjina.

B gawe daq qëryawoṯo ste kit hawxa noše, hani qëm iḏe dan aǧawiye qayimi, yalifi hawxa.

Alert   IP Print   Edit        Reply      Re-Quote Top

Jan Bet Sawocemoderator

 
Send email to Jan Bet SawoceSend private message to Jan Bet SawoceView profile of Jan Bet SawoceAdd Jan Bet Sawoce to your contact list
 
Member: Sep-14-2011
Posts: 305
Member Feedback

5. Sayfo … Part 5

Jun-04-2014 at 10:15 PM (UTC+3 Nineveh, Assyria)

In reply to message #0
 
5

Maṯlo komër: Šrolo hul d nafëq li ẖolo, i duglo msëkla dukṯa.

I masale du Sayfo, aydarbo nafiqo li ẖolo? Kubacla kṯowo! Kul ẖa (ẖḏo) mën koḏëc, jbaru ruẖayxun, ytawu kṯawulle. I naqla d këṯwitulle gëd qurenale, i naqla d qurenale balki xulşina ëšmo mu mamro w tënoyo d kowe cël mu tanuro.

***

Cël mi adro siyasi d këtlan, talyo w galyo, an noše kmëžǧoli cal u Sabri Arboʹyo. Kul nošo kuḏacle Aţman, ëno kuḏacne Arbo´yo. Cayëš b Mëḏyaḏ, axile laẖmo d Mëḏyaḏ, ”aẖna am mëḏyoye” heš lë maqbelan mëḏyoyo, këmminale ”kurmanj”.

Mawxa ǧalabe mëḏyoye kmašiki bu cwodo dë cwëdle, w qiyme lë kobi lu tacbo d huwle. Ucdo ste cayni mede kmakrëxi gerac acle.

Cwodo d Sayfo w kul cwodo, ftiẖoyo qëm kul nošo, nẖatu cwadu!

***

Sabri, aydarbo bdele bu cwodo du Sayfo? Gabi mën kit bu xurjo, gëd maẖkene…
B Mëḏyaḏ Sabri l boli lë koṯe, harke b Awruppa aḏëcne. Zabno laqi bi mgalṯo dë Nsibin, ẖawruṯo bdela baynoṯayna.

Aṯi zabno ţwir lebe mu cëlmo, griš li cëtmo, abëc tamo d foyëš. Zabno yarixo xabro luwlan lë ẖḏoḏe. Mšayeli, mšayeli,.. bi ẖarayto maţine. B Hollanda b Enschedeʹwe calaqa cam nošo nëquşo këtwole. Naqlat bëlaqwo li dëkkano d Šamcën Catto, d šuqele hawa d noše. Haṯewa i calaqa d këtwole.

2-3 naqqat, mšayeli, lebe ţwirowe, labëc d ẖuzeli, bi ẖarayto sëmli zoriye cal ẖawri u Šamcën mërlile: Dlo ẖozene gëd maqëmno i qiyamto!

Haṯewa, hawi naşib laqina, ẖzelan ẖḏoḏe. Mamro marke w mamro më tamo, yawmo-tre, madcarlan u mamro, ëno w u Sabri, cam ẖḏoḏe mën kiban saymina?
Huwli fëkra: Mëd u Sayfo! Madcarle: Jan mede cal u Sayfo lë kuḏacno?! Kṯowe, dokumane,.. heš!? Ma dlo mënayye kowe? Latli mede!

Madcarli: Sabri lë zaycët! Aṯmël hani latwo, ucdo hani kit w kmaltamno heš. Mën d luzamlox gëd ubenox, bas zëcṯo b lebox lowe!

Šato kumarno 1998-99´wa.

***

Mnaqašlan, gabe, tukose,… Lë kţuceno mërlile: Hënne këtte darbo w aẖna këtlan darbo! Kul ẖa b darbe gëd malëx. Bdelan bu nëqošo mayko bëdena?
Sëmlan darbo, sëmlan program, Sabri dlo zëcṯo malaxle. Hawxa hedi-hedi bdele d solëq ëšme du Sayfo b gawayna w larwal.

Sabri sëmle u mede d qadër, aṯi zabno ẖzele kobëc maḏco zëd, huwle ruẖe lu qroyo. Kqore!

Heš këmdawmina ban nëqoše w heš kobëc dokumane, kumarne: Kit! Komër: Kuḏac Jan! Dlo menox zaţan lë malxowa!

Haka kit nošo d howe Sabri ẖaṯo, dokumane kit! Maẖwawu ruẖayxun!

Alert   IP Print   Edit        Reply      Re-Quote Top

Jan Bet Sawocemoderator

 
Send email to Jan Bet SawoceSend private message to Jan Bet SawoceView profile of Jan Bet SawoceAdd Jan Bet Sawoce to your contact list
 
Member: Sep-14-2011
Posts: 305
Member Feedback

6. Sayfo … Part 6

Jun-04-2014 at 10:18 PM (UTC+3 Nineveh, Assyria)

In reply to message #0
 
6

Maṯlo komër: Gelo taẖt kefo, lë kfoyëš!...

Aẖnone w Aẖwoṯo,

Hawili zawno baš kcëwadno bi masale du Sayfo. Ftiẖo gëd umarno naqla ẖreto, masale d Sayfo, masale ǧalabe rabṯoyo. Walaw ëšmo d Sayfo nafëq li ẖolo… bas mën hawi? Qay hawi? Aydarbo hawi? Maḏco ǧalabe latlan! Haṯe i ẖaqiqa!

I naqla dë bdeli bu fëtošo, karoxowi cal Ittiẖad w Taraqqi mën sëmle? Jamal, Anwar, Ţalcat mën sëmme? Taškilati-Maxşuşa b riša čarkaz, alban, kurmanj, mẖalmoye… mën sëmla? B gawa qaţole ẖbise w lo ẖbise şëroye? Cašëryoṯo kurmanj, mẖalmoye, carab, zaza, fërsoye, cazariye, tërkman mën sëmme?

Mëqqa d camëqno, ẖzeli pilan, program,.. bëṯre qšoco mu qurmo, ẖiyoko d arco, marduṯo, tarix, dino, maḏhab, lišono, kṯowo, aršiv, cmarat catiqe. Joǧrafya kamëlto sëmme arca-qarca w qarca-arca.

***

Hawi kmo šne ţreli mani. Bdeli kkëraxno cal as sababe d lawǧël, ucdo tamo kbëcaţno, tamo kẖëfarno. Kito ẖarbuṯo hul d ëmmitu: Bas! Basyooooo! W zëd mawxa ste.

Hano klozëm w majburna d yulfinale, lašan ramẖël d mëfqina mene dars kibe caqël.

An noše du jil diḏi, ëšmo nacëm w rab kuḏci l xabro d sawal mënyo? I naqla d howën cwone w ceze cam ẖḏoḏe b şurayt këmminalle sawal. Hani d howën ǧalabe këmminalle qaţco d sawal, jalab d sawal. Yacni b mowat aw alfowat riše.

Moro d hawxa sawal ǧalabe i naqla d cujazwo mënayye, aw haw qudarwo d samme, manẖatwolën l dëkṯo d zëbono. Tamo mzabanwolle. Lu zwono, aǧlab qaşobe w naẖore huwewo. Huwewo ëšmo ste d zawone lašan šëfro, lašan ẖalwo ste.

Aq qaşobe w an naẖore šuqliwo sahmo rabo, mëbliwole baroyo lu bayto w nuẖriwo buwwe. Kul yawmo l goran du zëbono d huwewolle bu başro, hul d taymiwo. Mëd tayimi nuţriwo hul sawal ẖreno d oṯe.

***

Gabayna bu tarix, šutoso, - lawǧël w larwal - b ëšmayna d mëžǧalwo, ǧer mi cito latwo. Hiyya mrabyowalan, aydarbo gëd kulena qëm dan naẖore w qëm daq qaşobe bu dawro.

Cal hawxa, kit maḏco ǧalabe. Hano kobëc d nofëq li ẖolo, xëd këtyo l qumayna lu maḏco. Gëd ubeno maṯlo cal hawxa, lašan d uḏcitu, lawǧël aydarbo i cito mfarfësowa w maḏcëfowa i macnawiye du mhayëmno. Ḫasyo Grigoriyos Pëţrus Habra, mi cito sëryayto katolik b Mawşal, 16 tëšrin-qamoyo 1918, kkoṯëw maktub yarixo lu Vatikan. Buwwe kobe maḏco cal i ţwiruṯo dë ţrele lu Sayfo w kobëc mucawane w kobe waşëf hawxa cal ah hadome di cito d këtle:

»… Heš hënne caşyene bi cade catëqto d këtte mi haymonuṯo katolik w kkurhi i haymonuṯo d këtte lay yacquboye w këmmi ”ẖa d moyëṯ mawto d kalbo w lo mawto d yacquboyo raẖuqo më cito d Roma.”…» (Nëbco: Archevéché des syriens catholiques á Mossoul, Vatican Secret Archives, Segreteria di stato, ”Archivi Delegazioni Apostoliche in Constantinopoli,” Turchia/D: Nunzio 3, Angelo Maria Dolci.)

Alert   IP Print   Edit        Reply      Re-Quote Top

Jan Bet Sawocemoderator

 
Send email to Jan Bet SawoceSend private message to Jan Bet SawoceView profile of Jan Bet SawoceAdd Jan Bet Sawoce to your contact list
 
Member: Sep-14-2011
Posts: 305
Member Feedback

7. ẖubo …

Jun-04-2014 at 10:19 PM (UTC+3 Nineveh, Assyria)

In reply to message #0
 
ẖubo …

këtla ẖaylo d maṯnëẖo
lebo, gëšmo w ruẖo

bac d qaṯla ẖiruṯo
heš zëd kuwela fëşẖo

aw bu caks …
rẖoqo mu fëşẖo

haaa haṯeyo d këmminala
”i quwwe daẖ ẖaye”

kula šrolo w këtla
ţacmo ẖaqiqi …

ǧalabe naqqat …
aṯi ẖërmo, jaza qanuni acla

mu dino, mi cito, mu kuhno,
mu šamošo, mu gayoro,…
dlo caqël w dlo hawno

këtxu xabro?!
hawxa mgangëlina li ḏëcfiye

Alert   IP Print   Edit        Reply      Re-Quote Top

Jan Bet Sawocemoderator

 
Send email to Jan Bet SawoceSend private message to Jan Bet SawoceView profile of Jan Bet SawoceAdd Jan Bet Sawoce to your contact list
 
Member: Sep-14-2011
Posts: 305
Member Feedback

8. ẖiruṯo, heš raẖëqto

Jun-04-2014 at 10:20 PM (UTC+3 Nineveh, Assyria)

In reply to message #0
 
ẖiruṯo, heš raẖëqto

qumayna, më zawno kit
siyase fašist bi cito

hawxa, sëmla kulan
grece, yasire, bižikat,
darmala maţice

mawlafla kulan
”cwonena bayn dewe!”
Dlo kloyo mërlalan
”i arcaṯe baţëlto, latyo diḏan!”

w maqnëclalan
”aẖna diḏan i šmayoyo!”
hawxa darmono huwla l kulan

lašan d qudrina mqawmina,
heš këtli sabro, b Awruppa
kiban d saymina mede…

bas kubaclan jaşara më fulaḏ
w maḏco b demoqraţoyuṯo

lë ţucetu!
kul siyase fašist
këtle zabno kẖëkmo,
kobo ǧalabe cëḏobo w ẖašo

bi ẖarayto, ẖëkëm fašist lë kfoyëš
Han naqla ḏëlume, aydarbo kuzzën?

Hani ya më raǧloṯayye mcalqe,
w ya b maẖkame d camo kmigargëši
w dlo balki b meẖo buǧro raxis

malaxlan darbo yarixo,
heš ẖiruṯo ǧalabe raẖëqto

li cito, hani tam 2 alfo šne
më ẖabis l ẖabis d dino
w më maḏhab l maḏhab
maẖëtla kulan
bayn dal lappat dak kuhne

Alert   IP Print   Edit        Reply      Re-Quote Top

Jan Bet Sawocemoderator

 
Send email to Jan Bet SawoceSend private message to Jan Bet SawoceView profile of Jan Bet SawoceAdd Jan Bet Sawoce to your contact list
 
Member: Sep-14-2011
Posts: 305
Member Feedback

9. Nëqošo... Bas mën šëkël?

Jun-04-2014 at 10:21 PM (UTC+3 Nineveh, Assyria)

In reply to message #0
 
Nëqošo... Bas mën šëkël?
Jan Beṯ-Şawoce
1

Maṯlo komër: Fatono xu taclo layt! Ḫuru lu cëjbo, bi šuqo ste, zëd më galde zëbono layt.

I ǧëlba (pluralizim) ǧalabe basëmtoyo, i naqla kul ẖa d amţe maḏco d këtle, fëkër d këtle, siyase d këtle,... Harke kulan d qurena, mnaqšina, ubena w šuqlina,... mëqqa kowe kayiso?!

Dardat këtlan ǧalabe, hul d ëmmitu bas këtlan w zoyëd ste! Kit!
Mawxa lë kcaqli d howe gabe, šutose, ẖuyoḏe, ẖuḏre, medya mšakalto, taẖt mën ëšmo d rëẖmitu mi joǧrafya d Beṯ-Nahrin. Haṯe këmzangëno gabayna u maḏco w u ylofo. Hano klozëm l ramẖël, lu ẖreno.

***

Aẖnone w Aẖwoṯo,

Hawi zabno, kkorëx gerac bu nëqošo. Mën zadyo bi gerac dë kkorëx? Lo fhomo w lo tëfhimo, ǧaye lawxa layt! Haka hawxa fahëmitu i siyase, nẖatu li qaẖwe, tamo mdawemu u nuqošo cam u skambil. Ţawyo. Kul ẖa harke, haka xaşër ste, ţrëzze lu bayto w taqla b qarce dan nacime w di aṯto. Hawxa kayisoyo?

Ma hatu hawxa hatu?

***

Mtakazto, dawronoye, cito, ẖuyoḏe, ẖuḏre,... w aẖna ste acmayye, manyo dlo ẖţiṯo? Kibe nošo d umarli? Gëd nušaqno cayne!

Madam kcuwdina gëd huwelan nëqşaniyat, daywone, kamile, gawre, niše, aǧawin, balofe, ganowe, zanoye, gayore, čamoqe, ǧbine, mşacrone,... mede ǧalabe ţabiciyo. Arco layt! Univarsita, akademi,... qeno d safruno l yulfono, layt! Cël mani kulle, tajrube d mede pozitiv layt!

Aṯina më kanšo feodal, amţelan acmayna kul samo ẖarbo d këtle lu nošo. Hano b yawmo w yarẖo w šato gëd mëẖena ẖaşe bi arco, baş şucre w bar ruqe, kẖuzene zaẖme.

40 šne hawxa mjarablan! Kiban hano mǧayrinale cal maqlëb?
Haka u jawab ”e” yo, mën saymina?

Alert   IP Print   Edit        Reply      Re-Quote Top

Jan Bet Sawocemoderator

 
Send email to Jan Bet SawoceSend private message to Jan Bet SawoceView profile of Jan Bet SawoceAdd Jan Bet Sawoce to your contact list
 
Member: Sep-14-2011
Posts: 305
Member Feedback

10. Nëqošo... Bas mën šëkël? Part 2

Jun-04-2014 at 10:24 PM (UTC+3 Nineveh, Assyria)

In reply to message #0
 
2

Maṯlo komër: Më kewo d kayiwe, lë cëjzët, hat ste, başro lwišo hat…
I naqla ẖa d howe b rišo d gabo, tukoso, šutoso,.... gabayna cadeyo, ”ebi gëd qoyëm w ebi gëd moyëṯ”. Hano pransib zricoyo b meẖo d kul ẖa mënayna. Bu rišo dlë fayšina ste, d oṯe mënayna, mu qurmo, qšoco kqušcinale. Ma hano caqëlyo?

Bu Madënẖo i siyase, u šuǧlo, i calaqa,... cal hawxa rakëwtowa. Aẖna ste hawxa mrabena w hawxa yalëfina. Hawxa cade, fayšo acmayna w malxina l ramẖël? Ëlla b maḏco maqëminala w malxina bu caks l ramẖël? Ayna kayisyo?
Hawxa masayël bu ray diḏi, dlo zëcṯo klozëm minaqši!

***

Meqëm b tarte šne, G. Afram , frësle kṯowo b ëšmo d “Dayoše cal qḏolo” (Inkränktarna), G. Afram, 2012. Bu swedi, bëṯër cayni kṯowo b urhoyo ste fris.

Zabno yarixo, harke bu Swed, Afram sëmle rišuṯo l Ḫuyoḏo d ẖuḏre oṯuroye, lë Mtakazto, l Esarto d malfone. Mu cwodano hawile tajrube pozitiv w tajrube negativ. Hani manẖëtile li kṯawto. Mede ẖalyo, kmëtmaneno kul nošo hawxa d qodër manẖët i tajrube d hawi acme li kṯawto.

I naqla d howe kṯawto bë kṯowo, kmëkle qëm du mërli w mërlox. Këtle nošo mede d omër, naqla ẖreto cam kṯawto d noẖët, kowe zangane lu maḏco. I zangane kobo bahro d fëhmina lruẖayna w laš šëwole d këtlan. Harke hawxa knëfqo li ẖolo i nëqşaniye d kit gabayna li ẖolo. Haṯe i naqla d nëfqo maclumyo, kobo dars, w naqla ẖreto lë kmëdcarla.

***

Bu kṯowo d “Dayoše cal qḏolo” (Inkränktarna), Afram, zëd mede kali, huwwe mën sëmle? Ḫa d latle maḏco, harke bu Swed mën hawi baynoṯayna siyasi, kẖošëw šërke dë “Scania-Vabis” daq qamyonat, “Astra” dad darmone w ǧer luwwe b iḏe sëmile. Yacni kobe cal ruẖe şërto d Mahdi lu camo. Bu darbano ste nafëq noše “maẖrëwone” l qamuṯe, maklalle w mahëdde lu cwodano. Kobe ëšmayye w kobe ste, hani mën strateji siyasi qariwo w raẖuqo këtwolle.

Bëṯër mene ste kul mede kali w baţël!

***

Aẖnone w Aẖwoṯo,

Bu nëqošo, i naqla d howe masale d camo, abadan latyo šafiro d mëẖena bi nafšo dë ẖḏoḏe. Kulena harke dayëm mën cwid? Mën sim? Mën mir lašan d misëm? Hanine d këtne muhim...

An noše bu bayto, mën axëlle muklo, mën štalle, mën krëẖmi luwši? Hano šuǧlayyeyo!

Mawxa, jroẖo d lebo d nafšo b hawxa mëdone šaxşi, kẖuzene caybo w raẖuqo ste mu axlaq du nëqošo siyasi...

***

Bu ray diḏi, Afram d huwewole maḏco siyasi, (semolo-yamino lë kforëq) i naqlayo u kṯowano d “Dayoše cal qḏolo” (Inkränktarna), gëd huwewo ǧer šëkël.

Yacni gëd yutawwo w kulewo bu rišo cal i ”ẖarake” qay lë malaxla? As sababe mënwën? An nëqşaniyat mënwën?

Bi ẖarayto ste, mën klozëm d misëm? Ḫa oṯe b šira la clayme d mëdde cwodo d Ḫuyoḏo w dë Mtakazto.

Bu šëklano a clayme d mëdde u cwodo, qumayye mëftaẖwolën darbo...

Yacni ”aẖna sëmlan hawxa, ẖuru acmayna lazze lu rišo, ţrowe hano dars loxu ste!”

Alert   IP Print   Edit        Reply      Re-Quote Top

Forums Topics  Previous Topic Next Topic


Assyria \ã-'sir-é-ä\ n (1998)   1:  an ancient empire of Ashur   2:  a democratic state in Bet-Nahren, Assyria (northern Iraq, northwestern Iran, southeastern Turkey and eastern Syria.)   3:  a democratic state that fosters the social and political rights to all of its inhabitants irrespective of their religion, race, or gender   4:  a democratic state that believes in the freedom of religion, conscience, language, education and culture in faithfulness to the principles of the United Nations Charter — Atour synonym

Ethnicity, Religion, Language
» Israeli, Jewish, Hebrew
» Assyrian, Christian, Aramaic
» Saudi Arabian, Muslim, Arabic
Assyrian \ã-'sir-é-an\ adj or n (1998)   1:  descendants of the ancient empire of Ashur   2:  the Assyrians, although representing but one single nation as the direct heirs of the ancient Assyrian Empire, are now doctrinally divided, inter sese, into five principle ecclesiastically designated religious sects with their corresponding hierarchies and distinct church governments, namely, Church of the East, Chaldean, Maronite, Syriac Orthodox and Syriac Catholic.  These formal divisions had their origin in the 5th century of the Christian Era.  No one can coherently understand the Assyrians as a whole until he can distinguish that which is religion or church from that which is nation -- a matter which is particularly difficult for the people from the western world to understand; for in the East, by force of circumstances beyond their control, religion has been made, from time immemorial, virtually into a criterion of nationality.   3:  the Assyrians have been referred to as Aramaean, Aramaye, Ashuraya, Ashureen, Ashuri, Ashuroyo, Assyrio-Chaldean, Aturaya, Chaldean, Chaldo, ChaldoAssyrian, ChaldoAssyrio, Jacobite, Kaldany, Kaldu, Kasdu, Malabar, Maronite, Maronaya, Nestorian, Nestornaye, Oromoye, Suraya, Syriac, Syrian, Syriani, Suryoye, Suryoyo and Telkeffee. — Assyrianism verb

Aramaic \ar-é-'máik\ n (1998)   1:  a Semitic language which became the lingua franca of the Middle East during the ancient Assyrian empire.   2:  has been referred to as Neo-Aramaic, Neo-Syriac, Classical Syriac, Syriac, Suryoyo, Swadaya and Turoyo.

Please consider the environment when disposing of this material — read, reuse, recycle. ♻
AIM | Atour: The State of Assyria | Terms of Service