Assyrian Forums
 Home  |  Ads  |  Partners  |  Sponsors  |  Contact  |  FAQs  |  About  
 
   Holocaust  |  History  |  Library  |  People  |  TV-Radio  |  Forums  |  Community  |  Directory
  
   General  |  Activism  |  Arts  |  Education  |  Family  |  Financial  |  Government  |  Health  |  History  |  News  |  Religion  |  Science  |  Sports
   Greetings · Shläma · Bärev Dzez · Säludos · Grüße · Shälom · Χαιρετισμοί · Приветствия · 问候 · Bonjour · 挨拶 · تبریکات  · Selamlar · अभिवादन · Groete · التّحيّات

Camaniyel Poli këmdafëc bas cal cayle, lo mede ẖreno... ...

    Previous Topic Next Topic
Home Forums Government Topic #216
Help Print Share

Jan Bet Sawocemoderator

 
Send email to Jan Bet SawoceSend private message to Jan Bet SawoceView profile of Jan Bet SawoceAdd Jan Bet Sawoce to your contact list
 
Member: Sep-14-2011
Posts: 305
Member Feedback

Camaniyel Poli këmdafëc bas cal cayle, lo mede ẖreno... (Surayt)

Jun-16-2015 at 06:26 AM (UTC+3 Nineveh, Assyria)

Camaniyel Poli këmdafëc bas cal cayle, lo mede ẖreno...

H̱anne Safar w cayle d Bë-Safar b Mëḏyaḏ,
mën dawro hawëlle bu Sayfo w meqëm mu Sayfo?

Më Jan Beṯ-Şawoce
Iyyar 2015

Alert   IP Print   Edit        Reply      Re-Quote Top

 
Forums Topics  Previous Topic Next Topic

Jan Bet Sawocemoderator

 
Send email to Jan Bet SawoceSend private message to Jan Bet SawoceView profile of Jan Bet SawoceAdd Jan Bet Sawoce to your contact list
 
Member: Sep-14-2011
Posts: 305
Member Feedback

1. Part 1 (Surayt)

Jun-16-2015 at 06:29 AM (UTC+3 Nineveh, Assyria)

In reply to message #0
 
1

Camaniyel Poli, kowe mëb Safar. Hawile zawno yarixo, kgorëš i masale l masale d cayle, w tamo kobëc d ẖonëq u cwodo d kit cal Sayfo w cal Mëḏyaḏ. Dayëm mërli, ucdo ste kumarno: hano ǧalţoyo!

Camaniyel maẖwele w kmaẖwe, u cwodo d këtli, dayëm mqabël d cayle d Bë-Safar.

D huwewo šrolo, qay gëd mtarjamnowo u kṯowo d Malak Barşom, huwwe ste mëb Safar kowe, mu carabi “Ahtazzi ya arjuẖat al-baţal, qëşşët al-kifaẖ wa al-bëţula wa al-taḑẖiya” lu swedi “Malak Barşoms Politiska Manifest, SÅ SKIFTAR HJÄLTARS ÖDEN - En berättelse om kamp, hjältemod och offervilja, av Safar Safar”

I naqla ẖa d moyëd Sayfo d hawi b Mëḏyaḏ l iḏo, latla ëmkan dlë maẖke cal Bë-Safar. U sabab, hawëlle bi siyase dawro, mena b Mëḏyaḏ w mena ste bu Ţuro. I naqla ẖa d maẖke, d koṯëw cal hawxa, lë kowe mqabël d cayle aw d nošo b gawe d cayle...

Mënyo d hawi, mën hawi?

Caziz Sacid kowe b Berlin, sëmle fëlim cal u Sayfo. Zawno yarixo cwëdle, azze lu Ţuro. Tamo grëšle şërtoṯo ayko w ayko hawi u qaţlo. Grëšle b Mëḏyaḏ ste. I proža du fëlim, bu Swed ẖuyoḏo oṯuroyo kali b ẖaşa, mcawnole. Tawdi lu mede d sëmme.

Bu fëlim, karyo maẖkeli cal u nfolo d Mëḏyaḏ, cal u qaţlo d hawi bi dërto dëb Cadoka.

Alert   IP Print   Edit        Reply      Re-Quote Top

Jan Bet Sawocemoderator

 
Send email to Jan Bet SawoceSend private message to Jan Bet SawoceView profile of Jan Bet SawoceAdd Jan Bet Sawoce to your contact list
 
Member: Sep-14-2011
Posts: 305
Member Feedback

2. Part 2 (Surayt)

Jun-16-2015 at 06:31 AM (UTC+3 Nineveh, Assyria)

In reply to message #0
 
2

Šato 2004, awwël naqla, kṯëwli cal Mëḏyaḏ, aydarbo nafilo bu Sayfo 1915? Dokumane kṯiwe, nëquşo këtwo, bas dlo aţlahiye kuraxnowo aclayye, hani aykone? I naqla ẖa d korëx cal dokuman, lë kforëq d manyo? Lë kforëq b mën lišonoyo!... aw kaṯowo manyo? Bu cwodo du tarix, kul yaḏoco hawxa ksoyëm, hani kmaltamme, bëṯër ksamme analiz.

Hul ucdo, mede kṯiwo b oşmanli cal H̱anne Safar, cal cayle d Bë-Safar, mu zabno du Sayfo heš b iḏi layt! La’an u aršiv daw walayat aw das Sanjaqe di Oşmanliye, heš şxirene. Yawmo may yawme, ëlla hani gëd mëftoẖi w nëfqi li ẖolo. Haka mede maţi l iḏi, gëd huweno fşiẖo.

Hano dlo kloyo gëd fëlaǧnole harke aw b ǧer cwodo cam an noše d këbci uḏci zëd cal i masale d H̱anne Safar aw di cayle d Bë-Safar mu zabno du Sayfo.
Cal meqëm mu Sayfo, dokumane kit cal Bë-Safar. Hani mšaklene. Kmaẖkën cal aq qalat d hawi bi cito b Mëḏyaḏ.

***

Gëd ducarno li šato 2004. B Bayrud bu konferans d këtwola l “Syriacum Symposium” mqadamli u cwodo. Bëṯër mayo ẖaḏërno cam programe d talawizyon b ACSA TV, maẖkeli naqla ẖreto, Mëḏyaḏ bu Sayfo, aydarbo nafilo?

Bu cwodo, maẖweli H̱anne Safar, droco di dawle w cwëdle cam i dawle Oşmanliye b Mëḏyaḏ w bu Ţuro.

Camaniyel Poli, i naqla d šamëc lu medano, aṯi mqabël w mërle: Hano latyo šrolo, dugleyo!

Šafiro!

Czim ǧalabe naqlat, “tox mdafëc, mar latwe zlam di dawle...” laṯi.

***

Zawno yarixo, maltamli maḏco d kit gab sowe şëroye bu cëmro. Hën b şurayt, hën b carabi, hën b kurmanji w hën ste b tërki maẖkalle. Harke kit maḏco cal Bë-Safar w cal H̱anne Safar. Mu maḏcano manfaqli cwodo kṯiwo li ẖolo.

Heš kmaltamno, u cwodo këmdawëm.

Alert   IP Print   Edit        Reply      Re-Quote Top

Jan Bet Sawocemoderator

 
Send email to Jan Bet SawoceSend private message to Jan Bet SawoceView profile of Jan Bet SawoceAdd Jan Bet Sawoce to your contact list
 
Member: Sep-14-2011
Posts: 305
Member Feedback

3. Part 3 (Surayt)

Jun-16-2015 at 06:33 AM (UTC+3 Nineveh, Assyria)

In reply to message #0
 
3

Aẖnone, Aẖwoṯo,

I naqla nošo d cowëd b masale d Sayfo, tëcliyo l hën w tënẖito l hën, lë kowe d howe, d howe, i naqlayo latyo cwodo! Hawxa cwodo, bëṯër natije kayisto lë kobe. Hano pransib du cwodo bu yëlfonoyo.

B hawxa cwodo, an noše yaḏoce kẖayri, ar riše, a mdabrone, aš šutose, ag gabe, ac citawoṯo,... mën sëmme? Hanoyo dë ţrele d howe xşara aw fayde... ëno ste hul d aṯi meni, cal hawxa karëxno, mšayeli w mawlafli ruẖi. Lo zëd w lo noqëş, u cwodo gabi heš hawxa këmdawëm.

***

Ducrina l Camaniyel Poli...

Zabno yarixo, mšayele lah hadome di cayle dëb Safar, mën kit gabayye cal i cayle mede kṯiwo?

Muhim bi ẖarayto maţi cal kṯowo (mu ahël b Amarika) b lišono carabi ëšme “Sayfo Rabo – Al-Majazër fi Mëdyat wa Ţurcabdin, al-mu’allëf Safar Safar”. 400 fëṯoṯo, kṯawto kṯëwto b iḏo, dlo froso. Hul ucdo, hano qay fayëš dlo froso sidayye? Maḏco latli!

Camaniyel Poli, cal darbo d ẖawro mašmacle ëno w David cal u kṯowo, a tretayna fşëẖina w abëcina mene kopya. Lë qayëṯlan, bas Camaniyel bu zabnano w më meqëm ste, dlo kloyo ksoyëm kritik ëno ste w David ste.

Šafiro! Mën ǧamo! U kritik dayëm kayisoyo, lo ëno w lo David lë cayëqlan w lë kcaqlan mu kritik. Bu cwodayḏan, mëqqa aṯilan kritik maf fašist tërk, bnoyo latle! Harke latyo dukṯe, bas yawmo mede hano klozëm d këṯawne.

***

Azze hawxa zabno bi ẖolo. U kṯowo d Gaunt David, Donef Racho, Beṯ-Şawoce Jan, Massacres, Resistance, Protectors: Muslim-Christian Relations in Eastern Anatolia during World War I (Piscataway, New Jersey: Gorgias Press 2006). U kṯowano (naqla ẖreto ẖuyoḏo oṯuroyo bu Swed huwlele katfo) i naqla dë mtarjëm lu tërki, maţi maḏco l Camaniyel Poli.

Naqla ẖreto bdele bu kritik w bat talafonat l kul dëkṯo. Bi ẖarayto cal darbo d ẖawro mawḏëcalle “... b iḏayna d lowe dokumant, kṯawto aw mede, ma mën kiban mǧayrina w mazëdina?”

Hawxa jbir d amţelan mu kṯowo d lalcël tarte fëṯoṯo d kopya cam tërjomo b lišono swedi, mëralle tawdi. Fşëẖina cal d maţi l iḏayna mede kṯiwo. Naqla ẖreto mëralle: Këbcina kopya, haka d ubetullan gëd howe kayiso.

Jawab mu Camaniyel: E d ẖuzena, balki mitarjëm lu ingilizi, kcuwdina cal hawxa.

Mëranne: Šafiro, i naqlayo gëd nuţrina lu ingilizi.

Alert   IP Print   Edit        Reply      Re-Quote Top

Jan Bet Sawocemoderator

 
Send email to Jan Bet SawoceSend private message to Jan Bet SawoceView profile of Jan Bet SawoceAdd Jan Bet Sawoce to your contact list
 
Member: Sep-14-2011
Posts: 305
Member Feedback

4. Part 4 (Surayt)

Jun-16-2015 at 06:43 AM (UTC+3 Nineveh, Assyria)

In reply to message #0
 
Massacres, Resistance, Protectors: Muslim-Christian Relations in Eastern Anatolia during World War I
by David Gaunt (author) | Jan Beṯ-Şawoce | Dr. Racho Donef
4

Qamayto Prof. David qrele u swedi. Du carabi ste kṯawto b iḏowa, këṯwolan mu rišo naḏifo b kompiyutër. David mšayele meni, omër: Jan mëd hat ste qrayya, ẖzay u mede dë kṯiw mënyo? Huwwe w u carabi caynine aw lo? Ëno qëryoli, ẖzeli at tarte caynine.

I kṯawto nafiqo, hjomo cal u qaraqol b Mëḏyaḏ, hawi qaţlo... Muhim lë mawraxna, maḏco ẖaṯowe, maẖtolan.

***

Du šrolo mšawšewan, laḏëcina mën d ëmmina!

Aẖna mën nuţrinawo?

Camaniyel Poli, më meqëm sëmlewolan kritik bë tre mëdone:

  1. H̱anne Safar latwe zlam di dawle
  2. Qarce lë qţic w nošo b goge lë mëštacele buwwe, mqatele xëd gaboro hul d nafël suhḏo.
Yacni, u mede d këtwolan bu kṯowo du ingilizi d Massacres, Resistance, Protectors: Muslim-Christian Relations in Eastern Anatolia during World War I, xëd këtwe fayëšwo b tërki ste, la’an këtwolan maḏco buwwe.

Muhim ţrelan w naţërina lu kṯowo du carabi hul d howe b ingilizi.

Camaniyel Poli, xayifo huwle xabro l Suroyo TV, w nafëq tamo, mërle: Ucdo mcadalle u ǧalţo d këtwo bu kṯowo. Hawxa mašmacle kul nošo.

***

Azze zabno bi ẖolo. U kṯowo d “Sayfo Rabo – Al-Majazër fi Mëdyat wa Ţurcabdin, al-mu’allëf Safar Safar”. 400 fëṯoṯo mtarjëm lu ingilizi, maţi l iḏe du Camaniyel. Huwle talafon l David, aṯi l side b iḏe maslamle u tërjomo b ingilizi. Naqla ẖreto l David mërlele: Këbcina u carabi ste, kayiso kowe d ubetullanyo...

Jawab d Camaniyel hawi: D ẖuzena.

Hul adyawma ste heš u kṯowo du carabi luwle.

***

Ay yaḏoce, taqrib kulle, bu kroxo d cal dokumane kowën b şabër. Ëno ste hawxa. Bu šëklano b şabër maţino l ǧalabe dokumane. Hani dlo kloyo ste kcëwadno aclayye lašan d mëfrosi.

***

Mi proža d këtwolan bi madrašto clayto d Södertörn, mšayaclan Tomas Be-Cavdalla kmo naqlat lu tëltimo d dokumane l Amarika, l Lëbnan w l Suriya. Bi dukṯo samwo ad dokumane digital w amţewolle acme.

Alert   IP Print   Edit        Reply      Re-Quote Top

Jan Bet Sawocemoderator

 
Send email to Jan Bet SawoceSend private message to Jan Bet SawoceView profile of Jan Bet SawoceAdd Jan Bet Sawoce to your contact list
 
Member: Sep-14-2011
Posts: 305
Member Feedback

5. Part 5 (Surayt)

Jun-16-2015 at 06:46 AM (UTC+3 Nineveh, Assyria)

In reply to message #0
 
5

Rabëc 2010, mšayaclan Tomas Be-Cavdalla l Amarika mu ẖšowo di proža. Azze l New-Jersey. Zërle i cito d Yoldaṯ Aloho (St. Mary Churche) b Paramus. Këtla kuhno Xori Yuẖanun, bu aşël mëdhoyo. Huwle darbo l Tomas d oṯe l side li cito. Lu xori mërle lu Tomas: Tomas abro këtli bas falge d saca, bëṯër azolono, malëz xayifo be mën këtlox?

Tomas huwleli mayl omër: Jan kit mede cal Bë-Safar b carabi, ma latyo hano d komšaylët acle?

Madcarli acle: Mën d këtyo tayye!

Amţele.

Tomas komër: Jan, li cito, hawxa baroyo, këtwola baytuno čučëko, tarco dlo qëflo, dukṯo d komaẖti u zawlo. Më tamo koṯën az zabole komëbli u zawlo. Ebe këtwo ǧalabe kṯawyoṯo, kṯowe,.. kulle l ẖëloqo. Baynayye ẖzeli u tërjomo d “Omar Xayyam, Rubaciyat” l urhoyo d sëmle l Nacum Fayëq. W haṯe i dosya, catëqto cal Be-Safar. Lu qašo omër: Mawbelën, dlo gëd miẖalqi, midili amţalli.

Layëm hawxa mëdone ǧer ste.

***

I dosya d cal Bë-Safar, dosya catëqto, mu zabno balki daš 70’yat, čeniye. Fëtẖoli, ẖzeli i kṯawto kṯëwto b iḏo, bneli af fëṯoṯo, haka nëquşo aw lo?! Kulle tamamwën. Mëqqa fşëẖno laybi d umarno. Carabi d howe kṯawto b iḏo këtli şacbo d qurena. Huwlan l ẖa b ẖaq diḏe, d këṯawla naḏifo.

Ašër këṯwole w amţiyole.

Më meqëm žǧëlnowo cam u mtarjëmono, omër: Mšayëc gëd mtarjamne.
Hawxa mtarjamlan u kṯowo d Malak Barşom “Ahtazzi ya arjuẖat al-baţal, qëşşët al-kifaẖ wa al-bëţula wa al-taḑẖiya” lu swedi “Malak Barşoms Politiska Manifest, SÅ SKIFTAR HJÄLTARS ÖDEN - En berättelse om kamp, hjältemod och offervilja”. Ëšmo latwo acle, anonimwe.

Gabi këtwo at tarte kopyat mu kṯowo d “Sayfo Rabo – Al-Majazër fi Mëdyat wa Ţurcabdin, al-mu’allëf Safar Safar”. Maẖtili së ẖḏoḏe kmažbëhi, bas latno yaḏoco lo bu stil du qalam w lo bu stil di kṯawto du carabi. Hani këtte stedin, huwilan lašan d maydina ray mënayye. Ašër u ray d huwwe, nafëq cayni kaṯowo w cayni qalam.

Zabno cwëdli cal u kṯowo swedi, lazëmwole noţat w cëdolo d ëšmone, kulle mcadli. Sëmli calaqa cam ACSA, haka d howën katfo lu ţboco, maqballe.
Bu zabnano, sëmli kopya u kṯowo swedi, cal iḏe d ẖawro malẖaqli u kṯowo lan noše dëb Safar. Abëcno d madno u ray dëṯṯe be mënyo? U ẖawro d hawino “amin” acle, mfaraqle u kṯowo l man d hawi, w lë ţrele ţacmo l mede ëšme “amane”.

Muhim, Bë-Safar hawën mamnun, fşiẖi. H̱a mënayye mšayacleli mayl w mërle: U kṯowano d ţëbcatle gëd maškena aclox lu polis.

Madcarli acle, sabab lawxa layt, la’an u kṯowo heš lë ţbic, huwli nësxo mene loxu, toxu mëžǧëlina, haka kit mede l polis, l maẖkame, aw l ǧer mede, kobëc d howe sabab.

U zlam qanëc aṯi l sidi li madrašto tarte-tloṯ naqlat, kmaẖwe mu mamro d karëx acli, b cayne sëmnowo xëd drakula. Mafhamlile mëqqa muhimyo d nofëq kṯowe aclayna. Fahëm omër: Këbcina aẖna d ţëbcinale, madcarli: Cal ac cayne! Kit kmo mëdone atikne, gëd umarnën, bëṯër ahla w sahla! H̱aḏiroyo!

Adyawma 3 šne azze bi ẖolo, u zlam lë dacër acli. Ëšqaḏ hulile mayl: Aẖuno xabro laṯi menox! Madcarle: Ašër këbcina d mëfqina qamayto kṯowo d “Sayfo Rabo,...” bëṯër hawo ... këlli këmcadalno bu ingiliziyayḏe.

Šafiro!

Alert   IP Print   Edit        Reply      Re-Quote Top

Jan Bet Sawocemoderator

 
Send email to Jan Bet SawoceSend private message to Jan Bet SawoceView profile of Jan Bet SawoceAdd Jan Bet Sawoce to your contact list
 
Member: Sep-14-2011
Posts: 305
Member Feedback

6. Part 6 (Surayt)

Jun-16-2015 at 06:55 AM (UTC+3 Nineveh, Assyria)

In reply to message #0
 
6

U kṯowo dlo froso d “Sayfo Rabo,...” bëṯër mëd maţi l iḏayna (mtarjëmo b ingilizi) bdelan kqurenale. Du šrolo ëno ste w David ste, mërlan: Ǧabin cal hawxa kṯowo dlë mtarjëm kayiso.

Mašëklan d këtyo tërjomo d “google-translation” w hawi ǧalabe ǧalabe ǧalţe buwwe. I naqla ẖa d qurele, d luwele maḏco cal u tarix du Ţuro, zaẖme kowe acle d fëhamle.

Cal iḏe d ẖawro mašmaclan Camaniyel Poli w mërlan: Ǧabin, hawxa latyo kayiso d nofëq.

Huwwe ste bu jawab d huwle, “... u tërjomo latyo kayiso...”

***

Ëšqaḏ hawi naşib bu darbo d Messenger, cal d këtna cam ẖḏoḏe bu “Platform d Ţurcabdin”, mnaqašli u šëwolo cam H̱anna Karkënni. Huwwe ste mlaf i qašto, kowe ahël cam Bë-Safar. Mërleli: Ašër Jan, këtwolan ẖa harke mi jamacayḏan d Suriya, huwwe mtarjamle, ëno ste mcadeli buwwe..

Madcarli acle mërli: Hawxa kṯowo bas maḏco d lišono lë kmakfe bu tërjomo, aẖuno mëranne ǧalabe naqqat, tawu mcawninalxun, sayminale b šëkël dë klozëm, jawab lë kobi, kmaẖwe lë këbci. Mtarjamli u kṯowo d Malak Barşom, kubac d fërasne heš laṯina lë ẖḏoḏe, d ẖuzena.

H̱anna Karkënni madcarle omër: Jan kibox mšaycatliyo? Huwwe w u carabi?

Madcarli acle: Cal ac cayne bas rëja dlë mibarbëz!

Mšayaclileyo, asas huwwe ste gëd cobër bi masale lašan u kṯowo d mëţbëc. Mene ste xabro laṯi!

***

Bu kṯowo d “Sayfo Rabo,...” kit tre mëdone, harke kubac d ubenën.

  1. Safar Safar komër: Hani 40 šne më lišono d šëlţono Bë-Safar kẖëkmi b Mëḏyaḏ. Yacni u ẖëkëm 1915 ktoyëm. I naqqa d ëzzan 40 šne la-xalf kowe u zabno 1875. I šato d Cabdël-ẖamid d hawi šëlţono.
  2. Naqla ẖreto Safar Safar komër: H̱anne Safar, sëmle rišonuṯo 4 šne l cašërto d Dakšuriye.
W kit ǧalabe hawxa mëdone, maḏco d latwo aclayye, bi sëbbe du kṯowano kuwelan maḏco aclayye.

Xaşaţan cal a cmire dab Boţa mën sëmme?

***

Gabayna bu Ţuro w lë ẖḏore, këtwo tre konfederasyone rabe d cašëryoṯo d kurmanj. H̱ḏo ëšma Hevërki mqabël di dawle w i ẖreto Dakšuri cam i dawle. Harke H̱anne Safar mën sëmle? Kobëc d howe acle fëtošo.

U sabab: Meqëm mu Sayfo, bu Ţuro, hawi ǧalabe hroše w qaţle cal aq qëryawoṯo daş şëroye... Maḏco adyawma aclayye nëquşoyo. Kṯowo d “Sayfo Rabo,...” kobe sahmo mënayye.

***

B Mëḏyaḏ w bu Ţuro 40 šne, Bë-Safar hawëlle dawro bi siyase, pozitiv aw negativ. Bëṯër 4 šne H̱anne Safar rišo lu konfederasyon dad Dakšuri’ye.
Ma lë klozëm hani d milofi w mëfqina dars mënayye?

D ëmmina: Babi kayiso, i cayle d këtwolan kayisto, mede ẖarbo lë sëmme?
Bac qay maţina li ẖalaṯe? Ma haṯe më qëm ruẖa hawyo?

Kumarno haṯe mën d këtyo, kubacla šroẖo.

Alert   IP Print   Edit        Reply      Re-Quote Top

Jan Bet Sawocemoderator

 
Send email to Jan Bet SawoceSend private message to Jan Bet SawoceView profile of Jan Bet SawoceAdd Jan Bet Sawoce to your contact list
 
Member: Sep-14-2011
Posts: 305
Member Feedback

7. Part 7 (Surayt)

Jun-16-2015 at 06:56 AM (UTC+3 Nineveh, Assyria)

In reply to message #0
 
7

Tawdi l Camaniyel Poli cal d hulelan u kṯowo d “Sayfo Rabo,...” b tërjomo d ingilizi. Mërwoli, bdelan kqurena buwwe.

Ba kṯawyoṯo d meqëm mërwoli, ay yaḏoce bu cwodo d kit qumayye, dayëm more d şabërne. Cajala abadan latte, haka kubacce mede kkurxi acle ban ëšne. Naqlat kloqën w naqlat ste balki lë kloqën bu mede d kubci. Ëno hawxa b şabër mqafeli ǧalabe mëdone muhim. Hani hedi-hedi kfërasnën b gawe da kṯowe.

***

Karëxno cal u orijinal d “Sayfo Rabo,...” b Awruppa, b Camariqa w bu Madënẖo ste. Mëdle zabno, bas bi ẖarayto maţi l iḏi kopya, xëd këtyo. Mëqqa fşëẖnole laybi d umarnolxun. Xayifo bdeli d makṯawne naḏifo. La’an David abëc meni d ẖuzeno cal hën mu tërjomo, cal d latwe u tërjomo kayiso, w hawxa kit ǧalabe bu tërjomo du ingilizi.

Şëţfe b dukṯo kluqeno b carabi Safar Safar kmaẖke bu carabi an nišane, am madalyat, ... d qayëṯla li cayle mu šëlţono, bas bu ingilizi hani layt! Lë mtarjëmi! Simi şansur. Qay simi şansur? Maḏco latli!

Karëxno bu kṯowo du ingilizi, umarno balki b ǧer dëkṯo maẖti, naqla ẖreto lë ẖzalli!? Foṯo b foṯo karëxno, tërjomo lë ẖzëlilën!

Hani lu mtarjëmono huwwe lë mtarjëmile, l H̱anna Karkënni maylile, l Camaniyel Poli maqëmile, maḏco latli!

***

Bi Oşmanliye, meqëm yawme d cruto, b dukṯe d yawme d ẖëššabo, baţlonowe. B Mëḏyaḏ, kul yawme dë cruto bi şaraye di ẖkume (adyawma ab bote Bë-Sţefan, cal feme di rawmo b Mëḏyaḏ) këtwo ẖago b ëšmo d “Selamlëq”.

Saymiwo šëboẖo l šëlţono, li ẖkume w li Oşmanliye. Bëṯër mu ẖago, an noše d këtwayye şadëq cam i ẖkume, mitahwewulle hadiyat b ëšme du šëlţono, lašan aş şadëq zëd d miţaşri bi dawle w bi ẖkume. Mawxa ah hadiyatani këtwolle ëšmo b ëšme d šëlţono H̱amid. Maṯlo: Nišan H̱amidi, madalya H̱amidi, sayfo H̱amidi, hroro H̱amidi, bëšto H̱amidi,... w hawxa.

Alert   IP Print   Edit        Reply      Re-Quote Top

Jan Bet Sawocemoderator

 
Send email to Jan Bet SawoceSend private message to Jan Bet SawoceView profile of Jan Bet SawoceAdd Jan Bet Sawoce to your contact list
 
Member: Sep-14-2011
Posts: 305
Member Feedback

8. Part 8 (Surayt)

Jun-16-2015 at 06:59 AM (UTC+3 Nineveh, Assyria)

In reply to message #0
 
8

U kaṯowo d “Sayfo Rabo,...” Safar Safar <1920-2000>, šato 1955, azze l Amarika. Tamo ba 2000 nqil maẖ ẖaye. Heš meqëm d mënqël, b gawe di cayle, xëd nahiro, bdele kkoṯëw b carabi cal i cayle w cal u mede d cayëšo i cayle.

Sayfo d 1915 b cayne lë ẖzele, amma b gawe di cayle mën maẖke bam momo ǧalabe naqlat šamëcle, bdele kkëṯawle. Mede ẖalyo! Hano zaţan mënţarwo mene. Bas huwwe baẖ ẖaye, mu mede dë kṯëwle kumarno mede b šëkël dë kṯowo lë fris. Qay lë fris? Ucdo b iḏi maḏco layt! Haka nošo këtle, harke d maẖkele gëd mëfşaẖno.

Bu kṯowo d “Sayfo Rabo,...” nëbce (sources) layt. Kule kṯiwoyo, be bu bayto lar rabe mën cayiši w mën maẖkalle. Zaţan sahmo mu tarix d latyo kṯiwo, bi badaye hawxa kmëkṯëw.

Kumarno Safar Safar d ubacwo d tole mede, mkase mede,... lë kkëṯawwole! Be mën uḏacwo abëc xëd këtyo d foyëš li cayle w otomatik laẖna lu camo du Ţuro ste. La’an tarix kṯiwo, ǧer mu tarix di cito latlan! Hano ste šëboẖo l kuhne d cito w lo l mede ẖreno kibe.

Këbeno “soz” l Safar Safar, hul d oṯe meni, b darbo d šayno, dlo şansur, gëd ţureno d mëfrës u cwodo d këtle sidi. La’an u mede dë kṯëwle muhimyo, kobëc d huwenale moro.

***

Ëno ste xëd Safar Safar, uḏacnowo ëšmo kit mede kṯiwo cal u Ţuro. Bdeli këzzi l gab as sowe – niše w gawre – kmaltamno maḏco cal Mëḏyaḏ w cal larwal d Mëḏyaḏ.

Kul mede layëm? Këmarno haškara: Lo! Heš kit ǧalabe mëdone dlë layëm, kubacle tëltimo... Man ţër maltamle?

Safar Safar maltamle u mede d qadër, manẖatle li kṯawto. Sëmle u mede d nafël acle. Be mën kṯëwle, manṯo dlo tloyo, dlo şansur, xëd këtyo klozëm d nofëq li ẖolo. Xëd kul kaṯowo, kṯëwle mede ǧalţo, nëquşo aw ziyudo, lo aẖna, ţurena u tarix d ẖokëm Safar Safar cal u mede dë kṯëwle.

***

Mëḏyoye (w lo mëḏyoye) d azzi l gabayye d maẖkëlalli cal Bë-Safar w cal Mëḏyaḏ kowën: Jërjis Bë-Yusëf Ëllo, Karmo Sţayfan, Xori Brahim Hajjo, H̱anna Bë-Cazizo <Čalma>, Išoc Bë-Qašo Malke, Karmo Salma, Sabri Hërmëz, Danẖo Këno, Yawsef Babo, Gawriye Be-Mascëd, Jëjo Cabdiyo, Cabdo Bë-Yarëm Bučëq, Sabri Xalaf, Danẖo Xalaf, Gabro Mirëke, Asmar Cadoka, H̱anna H̱awšo,.... cam an niše.

Tawdi naqla ẖreto l Camaniyel Poli, huwwe ţrele d ëzzi gab H̱anuš Safar, sëmli qëbolo acme. Lu H̱anuš mrajele meni, mu mede d mërle, l larwal dlë nofëq. Myaqarli, mawxa w lo b dëkṯo, mede mu mamro d mërle lë frësli. Hano bu cwodo atik’yo, kmiyaqër. Huwli kopya mu cwodo lu H̱anuš, haka Camaniyel aw ǧer mu Camaniyel kobëc d fërasle, b šayno! Maqnecu u H̱anuš w frasu u qëbolo d sëmli acme.

Koṯe l boli, naqla bi sëbbe du ẖtiyat maẖkeli b ACSATV cal masale muhim d maẖkele lu H̱anuš, bu qëbolo d sëmli acme, ëšme luwli, mëroli. Kmaẖwe šamëcla, 2-3 naqlat laqino acme b caza, mërleli: Jan huwwolox soz, ţwërlox!

Mnakafno ţlëbli šëbqono, bas mërlile: Ëšmox luwli bas i ẖadisa maẖkeli... madcarle: Ţrowe! Mërlilox: Lë kowe!

I ẖadisa cal Šexo Samyo’wa. I naqla dë ẖzele maltamme ag gawre şëroye, cël man nëgore ruqaḏwo w umarwo: I Manje, i Merame, i Šune, i Zakiya, i Fahima,... fayiši kulle lëno!

Alert   IP Print   Edit        Reply      Re-Quote Top

Jan Bet Sawocemoderator

 
Send email to Jan Bet SawoceSend private message to Jan Bet SawoceView profile of Jan Bet SawoceAdd Jan Bet Sawoce to your contact list
 
Member: Sep-14-2011
Posts: 305
Member Feedback

9. Part 9 (Surayt)

Jun-16-2015 at 07:01 AM (UTC+3 Nineveh, Assyria)

In reply to message #0
 
9

Aẖnone, Aẖwoṯe,

Ëno ste kuḏac yarixo, jbërno d maẖkeno, lašan d howe fhomo w dlo i masale gëd fayšo bu “mërli w mërlox”, haṯe kẖuzena ǧalţo.

***

Rabëc 2002, nqil maẖ ẖaye Sabri Hërmëz. Xëd ǧalabe noše, ëno w aẖuni acmi azzan li cito d Mor Gorgis b Noršbori (Norsborg). Cadeyo, bëṯër mi şluṯo, u kuhno kkorëz karaze cal u miṯo. Xori Gabro Bë-Yawno (Bë-Qašo Jërjo) qamayto mqadamle i karaze w mërle: “... lam mëḏyoye w lëb Safar sëmme bebaxtiya mqabël d Bë-Hërmëz, hënne hawën sabab lu qaţlaṯṯe...”

Mkamele, bëṯre ẖasyo Ablaẖad Gallo Šabo ste krëzle w mërle: Meqëm mu Sayfo jëddi Gallo Šabo msikowe bu ẖabis b Mëḏyaḏ cam ah Hërmëziye, cayni mede huwwe ste mërwole cal i bebaxtiye d sim mqabël d Bë-Hërmëz...”

Du šrolo, ëno ste w aẖuni ste yatiwo gabi, mšawšina! U sabab, latwa dukṯa!

A tretayna maţinawo l qanaca: lu mede ẖarbo d sim mqabël dëb Hërmëz b Mëḏyaḏ, haw midayanwo qume, w Xori Gabro jbir d umarle. Yacni, i ẖarbo hul colam colmin, ëmkan latla d fayšo tliṯo!

***

Bëṯër b yawmoyo, bu yawmayḏayo, Camaniyel Poli naqla ẖreto bdele bat talafonat, bëṯër kṯëwle kṯawto b ẖuyoḏo, mërle: Mankarre, mërre: hawxa mede latle aşël w latyo šrolo!

***

Haṯe bu cwodo du Sayfo hawyo lašani badaye d kuraxno cal u mede d kit gabayna talyo cal u Sayfo.

Cito mën sëmla? Riše, mdabrone, rabe,... mën sëmme? Ucdo bu cwodo du Sayfo harke kcëmaqno!

***

Bu Sayfo b Mëḏyaḏ mën hawi? Qay Mëḏyaḏ lë qadiro dë mdafco cal ruẖa?
Ciwardo 100 bote, qadiro dë mdafco mqabël dac cašëryoṯo kurmanj w caskar 2 yarẖe, w lë ţwiro! Hazax cayni mede, H̱aẖ cayni mede!

Maẖësli, klozëm d huwela sababe. Hani bdeli d kuraxno aclayye, lašan d nëfqi li ẖolo. Harke kul ẖa mën këtle, ucdo ste kumarno, b šayno lu maḏco d kit sidayxun.

***

Camaniyel Poli, hul ucdo komër: U Jan cal d këtyo ahël cam Bë-Hërmëz këmẖalëq ţino mqabël cal Bë-Safar.

Aẖnone, Aẖwoṯe,

Aẖna i cayle d këmmilan Bë-Şawoce b Mëḏyaḏ, sahmo mënayna, awwël naqla aṯina šato 1912 më Karjos l Mëḏyaḏ. Meqëm mena, më Omid l Karjos bi šato d 1810-20.

Bë-Hërmëz, më Mawşal aṯën l Mëḏyaḏ bi šato dan 1840-50. Bi sëbbe d mahwo w šqolo d niše, Bë-Safar w Bë-Hërmëz, hawëlle cam ẖḏoḏe ahliye më zawno, meqëm mënayna. Hani kit maḏco aclayye.

Xëd ǧalabe noše bëṯër mu Sayfo, aẖna ste huwlan ẖḏo lëb Hërmëz, i ahliye hawxa bdela acmayna, wakidi bayn laẖna w l Bë-Hërmëz ahliye cayli layt!

Haka bu medano Camaniyel Poli këtle ǧer maḏco, harke d maẖëtle gëd mëfşaẖno.

Alert   IP Print   Edit        Reply      Re-Quote Top

Jan Bet Sawocemoderator

 
Send email to Jan Bet SawoceSend private message to Jan Bet SawoceView profile of Jan Bet SawoceAdd Jan Bet Sawoce to your contact list
 
Member: Sep-14-2011
Posts: 305
Member Feedback

10. Part 10 (Surayt)

Jun-16-2015 at 07:04 AM (UTC+3 Nineveh, Assyria)

In reply to message #0
 
10

Meqëm mu Sayfo, bu Sayfo, bëṯër mu Sayfo, mën hawi b Mëḏyaḏ?

Hano dlo kloyo, dayëm karëxno d howe maḏco acle. Mena lëno w mena ste luxatu... Adyawma b iḏayna maḏco cal hawxa kit, amma klozëm u cwodo dlë kole, maltëmina heš zëd mawxa. W kit heš ǧalabe maḏco dlë kuḏcinale.

***

2 ţëbbax 1914, i dawle, rasmi clëmla gëd maltëmo Safarbarlëk.

Bi ẖarayto dan 1914, yarẖo d aylël, tëšrin-qamoyo, ẖaroyo b Mëḏyaḏ w bu Ţuro ste bde bu tëltimo lu Safarbarlëk. Manẖatte nëqqara w zërnaye. An noše b fëşẖo kmitašmëci. B raqḏo, kef, hëlholo, zmoro,....

Taqrib b kul qaţlo d hawi, hawxa bi qamayto mosiqa kmidëq, bëṯra koṯe qaţlo. Mede cajobo, lo şëroyo w lo armënoyo l bole xayifo lë koṯe cal hawxa mede d hawi më meqëm!..

Baq qëbole d sëmli cam şëroye mi Rayëţe, Ţuro d Izlo, Ţuro Cloyo këmmi: Më Mëḏyaḏ H̱anne Safar, mšayacle caskar l gabayye, bu zor maltamme gawre lu Safarbarlëk. Amţanne maşre l Mëḏyaḏ li şaraye di ẖkume.

Më Mëḏyaḏ w maq qëryawoṯo, qëm i şaraye di ẖkume b Mëḏyaḏ layëm cël më 2 alfo rëẖwoṯo d gawre, kulle maşre bë ẖḏoḏe. Yacni këmmi u dawro maţiwo mi şaraye w hul lab bote Bë-Skano cal u darbo d Karjos.

Hawxa qlici malxone l H̱asno, bu asas azole l H̱asan-Qalca naqla ẖreto b halxo. I naqla d maţën l H̱asno fayiši 500. An nëţuro d rišayye caskar, kmaydi qëflo b qëflo mi ẖarayto du dawro, kquţlënne.

***

Bi badaye d 1915, bdele koṯe noše l Mëḏyaḏ. Niše, gawre, nacime,... kmaẖkën cal u qaţlo d hawi bad dëkoṯo dë ţralle. Bë-Hërmëz ftëẖẖe ab bote d këtte lan nošani, ẖwanne l gabayye. Kubanne mëklo, štoyo, ẖëmoyo,...

Bu zabnano, b Mëḏyaḏ ar riše maẖësse kit mede? Gëd howe mede?

Raǧam da problame d këtwo baynoṯayye, qadiri d laymi bi cito di Mort Šmuni bu sër. Harke, rwiẖo mëžǧalle cam ẖḏoḏe. Ymalle cal u Mgalyën gëd mcawni ẖḏoḏe w lë kowe d mëfqi u sërrano l larwal. Mid qarar: Bë-Hërmëz gëd šuqli barud w tfënag. Gëd misëm siyoǧo cloyo lë ẖḏor d Mëḏyaḏ. Kul gawro b Mëḏyaḏ gëd misalëẖ.

Bë-Hërmëz xayifo bdalle d saymi calaqa lašan d šuqli barud w tfënag më larwal. Amţalle, maẖtënne gabayye ba mcare w ban axorat d këtte taẖt mu bayto.

***

Azze šabṯo aw zëd cal u knëšyo d hawi bi Mort Šmuni. B Mëḏyaḏ u qaymaqam hawile xabro bu knëšyo sërri d sim, l noše şëroye më Mëḏyaḏ, huwwe xbariye cal u knëšyo. U qaymaqam qrele l H̱anne Safar d oṯe l gabe, aṯi. Mërlele: H̱anne Aǧa! An armënoye qayimi cal i dawle, acmayye ak katolik w ap përuţ ste... I dawle ucdo bëṯre d hani këzza, hatu aclayxu mede layt!

H̱anne Safar, hawi mamnun. Nafëq w malaxle b darbe.

Alert   IP Print   Edit        Reply      Re-Quote Top

Jan Bet Sawocemoderator

 
Send email to Jan Bet SawoceSend private message to Jan Bet SawoceView profile of Jan Bet SawoceAdd Jan Bet Sawoce to your contact list
 
Member: Sep-14-2011
Posts: 305
Member Feedback

11. Part 11 (Surayt)

Jun-16-2015 at 07:07 AM (UTC+3 Nineveh, Assyria)

In reply to message #0
 
11

Aẖnone w Aẖwoṯe,

Ëno ste Sayfo 1915 b cayni lë ẖzeli, harke këmqadamno u mede d maltamli mas sowe mëḏyoye: niše w gawre.

Bam momo, heš kit ǧalabe mëdone dlë layëm, hatu ste malemu w dlo tarix kṯiwo, aydarbo kiban saymina? Më man nuţrina d samle b dukṯayna!.. Haka këtxun jawab, harke hawulle, abadan latyo caybo d howe mqabël du fëkër d këtli.

Mdawmina bi ẖkeye.

***

H̱anne Safar, nafëq mi şaraye di ẖkume, cabër bi šawṯo d Bë-Sacido, qëm Mor Barşawmo, aṯi qëm Bë-Ǧaribo, fayët qëm i baladiye catëqto, bu zabnano cito hayëdto d kaldoyewa, salëq bi šuqo, maṯi l qëm u xan taẖtoyo. Bu zabnayḏan d Bë-Galuš’we, bu zabno du Sayfo dëb Hërmëz’we.

Qëm u tarco du xan gawre yatiwe, kmaqḏën jëvate cam ẖḏoḏe. H̱anne Safar kdore “šlomo!” aclayye. Ksaymile dëkṯo d yotëw, lë kyotëw, këtle mamro kobëc d mašmacle, komër l Galle Bë-Hërmëz w laẖ ẖaḏire hawxa: Bi cito di Mort Šmuni, bu mede d aṯina lë ẖḏoḏe, aẖna lo! Kmëgrëšina! Aẖna ay yacquboye, aclayna layt mede! Aclayxu cal ap përuţ, lẖuḏeyo!...

Lë yatëw, ţralle w malaxle b darbe. Hawxa mfarfës u qëwolo d sim bi cito di Mort Šmuni lašan Mëḏyaḏ. Dëfoco cal Mëḏyaḏ, kulle cam ẖḏoḏe, ẖarëw!
Hawi kriz! Ah Hërmëziye bdalle d mëftakri, mën saymina? Bdalle kyëtwi bu bayto cam ẖḏoḏe, šabṯoyo, tarteyo, zoyëdyo, noqëşyo, kkurxi cal čara! Maslëmi ruẖayye li ẖkume, mahzëmi w ţorën më Mëḏyaḏ,... Mën?!

Hawxa cam ẖḏoḏe zabno cabiri b nëqošo.

***

Mëḏyaḏ ha-ha kuṯela noše d mahzamme mad dëkoṯo d kowe qaţlo. Bë-Hërmëz këmqadmi aclayye maşarëf. Muklo, štoyo, dmoxo, dërmono,... gabayye ad dëroṯo malën noše. B Mëḏyaḏ ǧer nošo d ẖowe an nošani, layt!

H̱anne Safar, ksoyëm lista, man w man ẖwele noše dëžmën di dawle l side, kmawkalle w kmaštalle.... I lista, b iḏe kmawbela l Mërde, kubela lu mëtşarrëf (mutasarrıf) Badraddin Bag.

Bëṯër kdocër l Mëḏyaḏ, H̱anne Safar, huwwe kmaẖke, ëšmone d man w man huwle li dawle. U ahël (Bë-Yusëf Ëllo) d šamici lu mamrayḏe cayëqqe, bas haw manfacwo.

Bëṯër zabno, haka šabṯo, haka zëd, i ẖkume kmarfiyo b Mëḏyaḏ dalolo. 3 yawme nošo l larwal lë kowe d nofëq. Hawxa blalyo kmalimi ah Hërmëziye ẖa bëṯër mu ẖreno. Baynoṯayye, Dawud kmalẖëq d lowëš jule d niše w kmaxlëş. Kmahzëm l Anẖël.

A msike kulle maẖtënne bu ẖabis d këtwo taẖt mi şaraye.

B Mëḏyaḏ kkorëx mamro “Xalëşina map përuţ!”

***

Bu ẖabis Gallo Šabo meqëm mënayye msik, huwwe ste harkeyo. B Ciwardo u Mascud sim rišo l Ciwardo, këtle fëdawiye msalẖe. Kmëftakri d saymi camaliye mqabël di şaraye b Mëḏyaḏ. Hjomo w tëxlişo! Bë-Hërmëz cam a cwarnoye ahëlne, këbci d maxlëşi hënne w Gallo Šabo acmayye.

H̱anne Safar kšomëc bu pilan, këmxabër u qaymaqam bi şaraye. I ẖkume këmẖaḏro ruẖa qëm du pilan. A ẖbësoye lë kmitaxlëşi.

Han naqla Dawud Bë-Hërmëz, ksoyëm calaqa cam Bë-Saroxano bi Rayëţe, kumarre: D maxlëşitu an nošayḏan gëd ubenolxun 200 lirat oşmanli. Kmaqbëli.

Bi camaliyaṯe ste H̱anne Safar kuwele xabro, kmašmëc u qaymaqam, a ẖbësoyo hawxa lë kxulşi.

Alert   IP Print   Edit        Reply      Re-Quote Top

Jan Bet Sawocemoderator

 
Send email to Jan Bet SawoceSend private message to Jan Bet SawoceView profile of Jan Bet SawoceAdd Jan Bet Sawoce to your contact list
 
Member: Sep-14-2011
Posts: 305
Member Feedback

12. Part 12 (Surayt)

Jun-16-2015 at 07:09 AM (UTC+3 Nineveh, Assyria)

In reply to message #0
 
12

Aẖnone, Aẖwoṯe,

Xëd kul nafšo, be aydarbo këtla ǧaye baẖ ẖaye, ëno ste këtli ǧaye, ǧayat...

ẖḏo mënayye:

Camona, kubaclan lišono d ruẖayna , lašan kulan d fëhmina w mafhëmina ẖḏoḏe buwwe, ucdo w bu mëstaqbël. Këtlan b femayna lišono şurayt cayošo, buwwe kubena w buwwe kšuqlina, ma qay lë kkëṯwinale? Bu lišonano qay lë kxulqina kṯowe, kaṯowe, yaḏoce, mtarjëmone w qaroye... Haka nošo “abre d babo” d huwele jawab bu caks, harke ţër koṯëw, umarlan šëryono ǧer!..

Rabe w nacime, cayn xëd meqëm, b lišono d emo, lo qrayto w lo kṯawto, latlan! Hawxa fşëẖoye hatu?

Këtwo zabno, gabayna dlo maḏco, arco w šmayo hawyowa ẖa, lašan d qušci lišono şurayt mi ẖolo! An noše d këbci cal hawxa maḏco, kibën d ẖayri bi mgalṯo d ẖuyoḏo, xaşaţan an numarat di badaye da 80’yat b tërki. Tamo Camaniyel Poli, këtle qalam, stil, nafas, fëkrat cayn xëd adyawma d këtle bi masale du tarix cal Mëḏyaḏ.

***

da tre:

Dayëm mërli, ucdo ste kducarno d umarno, këtlan tarix ǧalabe komo. Hano, hul d oṯe meni, kubac d manfaqne li ẖolo cayn xëd këtyo. Hul ucdo tlelan, mën fayde kayisto hawilan mena lašan ramẖël?

Ëno kẖëzeno w lo fayde lawilan!.. Ad dugle, u fëtono, u fësodo, u xëpoyo, i barbariye,... cayn xëd meqëm këmdawmo w kmalxo baynoṯayna. Msamamlan an nacime du jil ẖaṯo, hënne ste këmdawmi w kmalxi cal cayni darbo, hano ǧer mu halak, layko kibe mawbelan? Haka këtxu jawab, naqla ẖreto b šayno, harke hawulle dlo zëcṯo.

***

Uṯena li masale dah Hërmëziye b Mëḏyaḏ...

Kmëtyaqanno, u zabno balki riše d iyyaryo. Li ẖkume maşërla 113 gawre cam ẖḏoḏe; përuţ, kaldoye, sëryoye katolik w armënoye. Hani më Mëḏyaḏ, më Karboran, më H̱asno w më Midën’wën.

An noše d Mëḏyaḏ, b rišayye H̱anne Safar cam dënga w zërnaye b fëşẖo mšaycënne, asas l Mërde azole, tamo gëd mëẖkomi bi maẖkame di caskariye. Bu darbo malxone maţën l Sita, bi Mẖalmayto, tamo kulle mzalţëni, mcaḏbi w qţili ẖa b ẖa, mẖalqi l gawe dag gubone.

Aq qaţole ste caskar ţaye (kurmanj w mẖalmoye) mëḏyoyewën.

Meqëm bë kmo šne, b Suroyo TV, i masalaṯe, kmaẖkela Yaẖqo Bë-Qašo Malke. Bu Sayfo zcuro nacimowe, mërle: Fşëẖinawo ǧalabe lu qaţlo dap përuţ.

***

Bu yarẖo dë ẖzirën 1915, u qaymaqam kqore l H̱anne Safar, kumarle: Hatu aclayxun mede layt! Kuḏcitu u lišono dan noše, nfaqu cam i ẖkume, maltemu u silaẖ man noše.

Mamro: Lo layt! Lë kmiţamër.

H̱anne Safar acme yuzbaši Racuf Bag, qašo Afrëm Safar, Mëẖika Bë-Gawwo,... kdayqi tarco b tarco w kmalimi u silaẖ maş şëroye b Mëḏyaḏ. Hawxa am mëḏyoye fayiši dlo ëmkan d dëfoco cal ruẖayye.

Alert   IP Print   Edit        Reply      Re-Quote Top

Jan Bet Sawocemoderator

 
Send email to Jan Bet SawoceSend private message to Jan Bet SawoceView profile of Jan Bet SawoceAdd Jan Bet Sawoce to your contact list
 
Member: Sep-14-2011
Posts: 305
Member Feedback

13. Mamre (Surayt)

Jun-16-2015 at 07:12 AM (UTC+3 Nineveh, Assyria)

In reply to message #0
 
Last edited on Aug-27-2015 at 09:05 PM (UTC3 Nineveh, Assyria)
 

Mamre

1

qašti këmšayloli:
abri ma haqqa qrelox ...
ẖur b caynox, mu qroyo ha!
samën! samën!

de tay abri, marli d ẖuzyono
be mën hawi menox?

ẖur abri, hat heš nacimko ha
ǧalabe ǧalabe čučëkowox
këtwolox ţëbbe d talgo
bac mëqqa mgangëlatwola!

yariwo w hay yariwo...
haw qadirët acla!
ba lo b kef diḏox
ţëryolox!

mar mašalla abro!
Ucdo qumox, bëṯrox,...
kulle qaroye w fahome
cëlëmdar w qalamdar, zërëndarne

2

abro, aẖna gabayna
i bumo dayëm qëšëctoyo

aṯyo cal Mëḏyaḏ
cal qëryawoṯo bu Ţuro

mu qurmo, ẖëkila!
lo ëns w lo jëns

şëroyo bënne
lë ţrela!

ma hano dlo sababwe?

3

abri, bi šmayo kit ǧalabe këkwe
hën kmabhëri w hën kmačlëşi

hën ste, hënne këkwe haaaaa!
bu asas ţafye w samye

yacni be-xerne...

4

axxxxxxx abro!
walaaaad! walad!
mëqqa qaroye w kaṯowe
jehël këtlan!

qrele qrele
hawi najoro
ba mën fayde, mşacrono

qrele qrele
han naqla hul d ëmmët “bas!”
hawi hosta dah hostawat b qumar

qrele qrele
hawi šamoško...
mena mzarţono w mena mşacrono

qrele qrele
hawi tanagaye xliṯo

bëṯër?!
ţrayya cal Alo!


1
Bu cwodo du tarix
meqëm mu mërli w mërlox
kluzamlan maḏco, maḏco.

saymina tiyatro, yacni
aẖna populistna,
kuḏcina kul mede!

ma këtla manfaca?!

ideoloji di barbariye,
mawbele kulan lu halak
kẖuzetu li nuro?

haka këmmitu:
yabo tawu fëtẖina fal,
këbcina d ẖuzena,
be man gëd qomër?

i naqlayo
heš qaroye jehëlna!

2
accccaw!
adyawma bu cëlmo
mëqqa hawilan
qalamdarin, cëlëmdarin

e aẖuno,
du šrolo gëd umarnolox
mawxa kmalxina la-xalf

aẖuno heš lë kamilo,
ţray d mafëẖno lebi

heš aṯmëlwe fir-fir
daş şucre lu şurayt

hano mënyano?
ma hano lišonoyo?
kule malyo kurmanji,
tërki, carabi, qiqanki,..

ceq!


1
ẖuro yabo
këtli bazar carabki

këmarno:
ëno laybi makleno ftakar
cwodo
l tarix
l lišono
l Sayfo
l marduṯo

2

nacimewan
ar rabe ëmmiwo:
de toxu abri larke,
msaku bu dëbolo
ẖuzena man qallësyo?

mëskinawo ẖḏoḏe
mbarcëkinawo ẖḏoḏe
aclayna nëfalwo
kaft w laft!

bëţlinawo, hulkinawo
bi ẖarayto ar rabe ëmmiwo:
abri hat hawët qallës!
mar l emox, ţër mëklolox
başro, başro!
lo ţlawẖe!


1

Qay
naqlat u nošo kẖole?
kmaẖtitu bolo?!

lašan tlawco ha!...
kqoyëm li raǧlo

kmaqëm i qiyëmto
lo cal mede!

2

aẖuno!
këtle haymonuṯo
mena akjar lë kdocër...

komër: ẖubo, bëṯra kit mawto!

karëx acla, zabno
ǧalabe yarixo

maẖëtle acla, ho taẖte
w heš lë maţila!

3

aẖuno
haka d mankërët u šrolo
maclum an noše gëd ëmmilox:
nakoro abre d nakoro!

şawmo, şluṯo, tawbe ste
haw kmanfëc!
ẖkimët!

hanoyo d këmminale:
ẖëkëm d camo!


1

Këtwo b Mëḏyaḏ Cayšoke
lë ţrela caskar dlë marwaxla
cal ruẖa.

ba mën saymo?
hawxa quḏyowa

ubacwo laẖmo, lwëšto
sëtra d Kamale šawwëti...

way mazlo dlo dcoro!
ţrowe qaţuno b qawre!

2

gabayna ëmmiwo:
ţayo d moyëṯ, kowe qurţayşo!

yacni hano hawxa mënyo?
kibe nošo d šuraẖle?

maru lu qašo, huwwe koḏëc!
qaroyoyo, qrele b Cali Oquli
hul d ëmmët “bas!”

tamo amţele šëhad-bune
hawi ẖawro lu Kačal

de han naqqa tox yabo mşafayya!

3

Yabo sëmlox ruẖox
sësto dë ţroya, l mën?

ma qëmëstox kriṯowa?
ma danwo latwolox?
ma dard latwolox?


ma hani xalëşiwo?

1

kul ẖa bu šëkël diḏe
mede cëjbo šafiroyo...

dcar, dcar!
bram foṯox!

qamayto ẖur bi mëraye!
haka hawxayo?

dlo, malëx, ţray!

2

bu šrolo, aẖ ẖaye
nëquşo aw ziyudo
yabo hanine!

gabox haka kit ǧer
maẖwayyën?!

ţër noše ẖuzanne
ţro hedi obi qërar

hat, han naqqa mfarëj.


1
warox yabo
Aloh, mu mawto latli zëcṯo

haw aḏno, be qay, gëd umarnolox...
ẖur, haṯe kula lašan i ẖuboyo

haaa ha i ẖubaṯeyo dë ţrela
b qarci w b şadri, ëšmo d mene

xabre cam u zabno šalënwo
bëṯër ǧalabe diši, mdašdëši...

hawxa mayli mi ẖolo
hawën tahluka!

2
i ẖale cal dë ẖzeli këlla hawxayo
hul d aṯi meni b ẖiruṯo ftëẖli femi
mzacwaqli, mhawarli ...

dreli “hawar w hay hawar!”
yabo hano lišonoyo
diḏi, diḏox, diḏëx,...

d kulanyo!
ba l man këmmët?!

3
b lebi gëmre d nuro maẖëtlëx
bi cëtmo, cal iḏi w foṯi ţrelëx

Aloh, ẖa ymoyo ymëlilëx,
yawmo may yawme b iḏi d nëflët

lo cëtmo w lo bahro, lë mšaylatli!
kuḏcët qay?

gëd umarnëx...
šmac!

b lebi, ǧer mi nuro d maẖtët
mede l bolëx laṯi!

4
Aẖuno!
salëqno cal qarce d ţuro ǧalabe cloyo
ẖzeli ruẖi qëm fago bahuro yatiwo

mqarawwe l sidi tre cayme, kul ẖa më xaşra
yatëwno bu falgo da tre, sëmli zëmmu-zalëq

w mërli:
zëmmu-zalëq!
zëmmu-zalëq!
Danẖo balëq!
Mšiẖo salëq!
Mẖammad dalëq!

aṯili ẖës:
“qurban ma bi hawaṯe,
layko hat saloqo?”
jawab lawili.

Alert   IP Print   Edit        Reply      Re-Quote Top

Jan Bet Sawocemoderator

 
Send email to Jan Bet SawoceSend private message to Jan Bet SawoceView profile of Jan Bet SawoceAdd Jan Bet Sawoce to your contact list
 
Member: Sep-14-2011
Posts: 305
Member Feedback

14. Mamre ẖaṯe (Surayt)

Aug-27-2015 at 09:19 PM (UTC+3 Nineveh, Assyria)

In reply to message #0
 

Mamre ẖaṯe

Më Jan Beṯ-Şawoce
ţëbbax 2015


1

Aẖuno ...

hayamke
maftewoli ẖaşi l kul mede

ẖëngi d këtwo dugle nqiše
b carabki, b zëţoyki, b garšunki

hanowe sabab, mede
law fayëšwo d samno

ëno ste hedi makṯawwoli ëšmi
cam i ǧëlba bi ẖolo d këtwën xaşore

hani d mëtyaqniwo kšëmci, kmašmëci
heš nošo, më meqëm l ẖës dlë šamëcwole

cabërnowo më kul lebi, raǧlo meqëm mu qarco
i sëbbe, darbo ẖreno haw këtwoli

yabo lu mamro, zëd mawxa, heš kit ǧalabe

2

Mtakazto ...
maẖëtlalan bi zëmmu-zalëq
ga mu rišano w ga mu rišawo
hani tam 58 šne khayzolan

amţela l qumayna, kiso malyo
pëţaţa mcafnakto mu Bacaṯ

këmhawro: axulu w ẖasayu,
bi “fëkra carabiye!”
maru bëṯra, fëkra oṯurayto haaa!

lë ţucetu! caqël layt! dayëm marulla!

3

abro!
gabayna i bumo qëšëctoyo

bu Ţuro, lo ëns wlo jëns
lë ţrela, ẖëkila!

aṯyo cal Mëḏyaḏ cal qëryawoṯo
şëroyo l darmono, lë ţrela!

ma hano dlo sababwe?

haqqa
daca
şawmo
şluṯo
qadiše
rkoco
ytowo
qiyomo
b cito, b dayro ...

ma bi hawawe?


1

Axxx l meẖayna!..

mëqqa kmažbëh
li ẖale du akonomi
b gawe du Yawnan

haškara gëd umarno
heš hul ucdo lë maẖëslan
d këtyo hawxa ...

këtlan cito, bu ëšmo
hani tam 40 šne
maẖëtla kulan b qaqe-raš

huwlalan hawa, zëd mu lazëm
cjëqto
catëmto
w hawyolan atuno

2

cëtmo!...
cal iḏe d kuhne
mawqaḏlëx babe d babayna

han naqqa lo hawxa lẖuḏe
ašër, mawqaḏla
babe d maxlëfone ste d këtlan

ẖur cëtmo!...
b ëšmëx, kuhne,
heš mu zabno d Qurillos qëpţoyo

sëmme dabara flëǧto l kulan
w hawina:
nasţërnoye
yacquboye
malkoye
w marunoye

3

hawxa, cal iḏe d cito
rabe, nacime,... kulan
ẖa b ẖa, ẖḏo bë ẖḏo

bu dawro
maẖtina b atuno di nuro

mhawarla:
bi arco w bi šmayo,
i quwwe b iḏiyo ...
oxrabbi!..
nošo mënayxun
b galde d romëš!
ruẖe, harke ste w tamo ste
b iḏe d Cuzro, gëd mëšqolo!
šamëcitu!

kuhne! šamoše! mhayëmne!
Yalla! kubce lu atuno, qayse qayse!
našife, talile, yarixe, karye
rafice, ẖlime, qurme,...

lë kmahëm, tawu!


1

He heee ...
bu meẖo caqël d këtlan
d hëwewo caqël lu cëlmo

kmëftakarno ...
cajaba adyawma cëlmo
b mën ẖal gëd hëwewo?

kumarno
kul dukṯo gëd mëmlewo
kuhne dagole w lwiše šexin
šamoše zërbav w lwiše faqqawin

2

Aẖnone ...

gabayna ar riše,
d ëbcitu kuhne w d ëbcitu ste d latne kuhne
bu meẖo, kţucni ḏëcëf rabo rabo

maru acmi: eee, hawxayo...

aẖuno!
xëd noše, kyumenolxun:
Aloh, qiyme hama b fëlso,
latte gabi!

aẖuno!
šroloyo, këtte meẖo
huwwe ste cayn xu kiso
gubo ţwiro!

mlay w lë molët
maxër w lë maxirët
maswacṯo, maykoooo!...

camër bayto!
ma maswacṯo latyo caybo!
dayëm cayno cëqto w kafënto!

3

Aẖuno ...

heš ucdo, xi cade fahëmno,
maẖrëfono d mimro, bi siyase
xabroyo

meqëm, clošo culšinawo
cal kul mede, mqašmërinawo
bi ẖolo, qaţmo, ẖatta lë fayëš

aẖnone!

haṯe na tu ẖalwa!
axëlolan, b yurxe w b fëṯwe
xaşërina, emo w acma barṯo

fayišina paẖpëš! dlo mede!


1

Aẖnone ...

han naqqa qay këmarno
bdele d nohër aclayna ste

gëd yelfina b şënca, be aydarbo
gëd cëwdina b siyase l ramẖël w l du ẖreno

Aẖnone ...

Aloh aṯi čaǧ d hawxa!
ymawu: haw kţurena zabno d foyët
b hawa!

cam ẖḏoḏe, tawu fëtẖina šambar
maclenale w saymina cësyan!

mqabël
d barbariye
d bacaṯtiye
d cërobo

bë šrolo ëmmina:
aẖna latna carab!
lë këwena carab!
lišonan latyo carab!

2

Aẖnone!...

haṯe sumulla haškara, haškara
mẖawteku lišono carabi, tërki
mi cito!

hanine, bu tarix d mëşşe
admo d këtlan w d latlan
ba kẖuzetu mën hawi eban!

më ẖaṯo, hawxa saymina
qariwuṯo cam lišonan şurayt
hul colam!

3

Aẖnone ...

ucdo gani yawmo w catimo
cal Bë-Xalaf w cal Bë-Sacido

mu yawmo d yawma, ẖšëwwe
ẖaye d ramẖël, gëd şofën cam barbariye

mërre: yalla čur! mën kit?
ţwaru! buzu! maẖrewu!

hani tam 40 šne, hawxa sëmme
b cito
b ẖuḏro
b ẖuyoḏo

layko maţën? hawyo këfš!


1

Aẖuno,
Aloh latna ẖëyewën,
kiban fëhmina cal ẖḏoḏe

ẖur yabo ...
kul nafšo d këmbarbëro
kṯowo, kṯawto d caqël layba d këṯwo

hano bi ţabica qanunyo!..

2
saca d fayët, këmmi:
haw kdëcro!
azza, mgarvëno!

maẖët bolo kayiso ...
ẖur, mfaşër
be ayko, raǧlox caşyo?

bi cëtmo
më colam w lafarke b colmin
w bëṯër ste

hawët
karro, lalo, samyo
w bëṯër kaẖfo samyo

hawno, meẖo, bolo
naẖët l ẖëşẖaş d arco
w fayëš tamo

ẖaru diyar!
hano dlo haj,
kmarfët b ruẖox ste!
hano mën jarilox?
kuḏcët?

3

haṯe kayiso fhama,
këmmi: zabno la-xalf haw kdocër!

hano šroloyo aw lo?
ucdo b iḏi maḏco latli

mede ẖreno këmmi:
zabno komo mqarawle!

droce maşre, feme şxire, hawne samye
mën saymina?

këtlilxu šira, balki čarayo
ëzzan gab Bakkoye-Cawen

4

Aẖuno,
bu cëlmo, cëtmo ẖliṯo
abadan layt!

mede lëmmët!
w fëš šalyo!
ţray w malëx!

layko?
kobëc ucdo
mahwo d qarar!

5

ǧalabe naqlat šamicët
bu cëlmo ẖreno
kit malkuṯo, kit gihano

hawxa cito msalela
ëno w hat w ǧer
fayde, kẖozët lawi!

6

ẖuru aẖnone
bi dëkṯo ëno d kit
tamo şëroye kit

qayo? gëd umarno!
nëkfuṯo ste layt!
maltamli, malëmli

xabre, maẖtili cal ẖḏoḏe
jëmlat, lëzqili bë ẖḏoḏe
hul d aṯi meni, hawxa sëmli

briṯo yaqiḏo, maẖkeli
hawina arco-qarco, maẖweli
noše, han naqla aṯi dawrayxun

qumu ylafu!


1

cëtmo,
mu yawmo d yawma
kuḏacno m’akdo w ǧalabe kayiso
bahro, lex dayëm nayaryo

kmaţcët, kmaţfët, kmasmët
këmpaţxët hawno, meẖo, bolo
han naqla lo bas hawxa
kquţlët w kmaqţëlët

b iḏe d kuhno kyëtwët,
lawǧël, larwal lë ẖarulëx
b kef kquţlët w kmamiṯ
babo latlëx!

silaẖ mzangëro hat
ǧalabe came qadiri aclëx
aẖna ste hawxa yawmo këtlan
hul d yulfinalëx, heš kubaclan

2

Aloh! b iḏi d nëflët,
ẖaye b bahro, lë kţurenëx

nfoqo d yawmo
sloqo d yawmo
kalët qumayna

de marli!
ma bu karmo d babëx nafëlina!

xabre ẖaroye kumarnëx:
marẖëq! marẖëq mënayna!

3

hani 40 šne, qţilan ruẖayna
maqëmlan kawmo d qalto

aẖuno,
han naqqa toxu li boqo d hawi!
bac d ẖuzetu ad dëdwone
da ẖmore
das sësye
dab baǧle
daq qanyone
dag gamle

mëqqa hawën, lë maẖëslan!

kulle mhayëmne d Alo
cabiri b cito w saliqi l maḏbëẖo

mhawarre, mbarbarre, mzacwaqqe:
“qadeš w barex! warox tubu! tubu!
şumu! şalayu! dcawu, cal barko rkacu
hano iman!”

kyumeno b Qurcane kačal
i masale haṯewa!

4

hani lë baswo!...
mi qalto nafëqlan
fërfëše
fërţacne
qalme
tlawce

yadeeee! l më rabbane!

kulle Mtakze, cabiri b ẖuḏre
toxu lac carabkat
toxu lab bacaṯkat
toxu laẖ ẖaflat

ay gidi gëmṯo!...
ma aydarbo gëd qaymatwo
dlo mani!

5

urhoyo mqadšo,
ẖarf mqadšo,
cito
qadiše
yalife

kulle, cal iḏe d Mahdi Afram
maţën l parriye dë šmayo

këtxu mede l mamro?


1

Aẖnone,
gëd ëmarno du šrolo
ëno, latno mhayëmno mšiẖoyo
ma ayko qreli d huweno?

emi, babi, jëddi, qašti
hënne ste lë qralle, mawxa
latwayye mhayëmne mšiẖoye

abadan latno ǧalţo, šaš,..
suhḏe këtli lawxa, ǧalabe
mu tarix ...

2

noše, ma hatu ste hawxa hatu?
aw lo?!
këtxu lebo dë mjawbitu?

haka këtxu, mašmecullan
kmo babe w kmo ammoṯo
qralle w mhaymanne!

3

Aẖnone ...
u mede d šamëcne
gëd maẖkene l kulxu

aḏnayxun, kayiso ftaẖunne
Mšiẖo, cajëz ǧalabe
mad dugle d këtlan

w komër: harke, cal arco
bi nuro hatu, lalcël ste cayni
hawxa bi nuro gëd huwetu

4

am miṯe d këtxu, këllën sidi
b caynayye, kul mede ẖzalle

kmo mënayye, mšaycili l sidayxun
bas naqla ẖreto, cal cayni këmdawmitu

mërli: kit cëtmo, harke ste w tamo ste
cayniyo, farq latla

bas hatu kmaţcetu b ruẖayxun
zëd mawxa, ma mën kibi d umarnolxun?


1

Aẖnone ...

kulan kuḏcina këtlan
kanšo ǧalabe kayiwo

kibe jurẖe,
ǧalabe camuqe

zaqţe, ǧalabe catiqe
lakkat, daqqat, ẖappoṯo, kërëkyoṯo

w hani lë kmëbnoyi.

cam hawxa, naqla ẖreto
b dugle, b alfo talaqat kyumena

bac mëqqa këmşacrina,
krayqina, këmhawrina, këmzacbërina

këmmina: Aloh dugle!...

2

bac kul nošo hawxa ksoyëm
ma aẖna kowe d huwena noqëş?
Lo! Lë kowe!

3

bas d koṯe dawro
b uždan ǧalabe ṯniẖo

këmdaglina cal ruẖayna
w cal ǧer më ruẖayna

cal meqëm, zëd w zëd
hawi hawxa adyawma

han naqla dugle...
hawxa lo hayalla!...

kulle b qarne xëd yakkana
ẖëwore ẖwartone xu şadaf

mede cëjbo, lo b iḏo kmëmsoki
w lo l cayno kmaẖwën.

4

yabo hatikeyo, hatikeyo!...
bac l man këmmët?

sëmlan qalëb, hawi asas
ymelan w yatëwina b gawe

noše kayisena! manne kayis?!
Ba man kibe d omër: Lo!

5

ha haṯeyo şërto mparwazto
b dahwo d këtlan

aẖuno mdawemu, b dugle maru:
camona! camona!

bac li duglo jaza latla!

caybo, nëkfuṯo zaţan
b naqla latla!

ma qay gëd howe?

6

hawu nuro, nuro! li duglo

Aloh man d omër:
warox lalin hatu!
b lišonayxu
qraye, kṯawto latxun!

madceru acle:
warox hat w babox lalin hatu!
abre di ţërre, hano l man këmmët
lalin!

ma lë këlle kuḏcina carabi, tërki,
ingilizi, alamani, swedi w hollandi

ma hani lë basyo!..


Haka kibëx,
marẖëq meni!
zëx marẖëq, ţrayli b ruẖi

meqëm
këtwoli lebo

zabno ste, ǧalabe yarixo
fayëš b cebëx, kule lašanëx

ucdo
haw kubaclëx! ţwir!

qay?
ëno ste ‘tam’ maḏco, latli!

bë šrolo ste këmarno,
latli!

haka d ëbcët, bxay
më caynëx damce

kubac d ẖuzeno
kruẖamno d ẖuzeno

balki, hani howën
ẖaroye d maţfën nuro
d lebo.


1

Naqla mede
hama ţrowe šuǧle d ẖanak
mjarebu cameşu caynayxun

w ẖzawu ...

dlo zaẖme
be mëqqa mëdone gëd ẖuzetu?

amţawu l bolo
nëcmuṯo ...

tanuro, dawëqto
qašmëšto, qaşyo
kackuno, kalo

bac i ţlamṯo w i lwaše
salo hul femo malyo,
kule laẖmo, šaẖino

2

hani ẖayewën ...
hawxa bëdanwo
bi qamayto

hën, cam nëqušo d cito
šëmcinawo ţëfanwo
ẖaye d këtwolle

ruhţinawo rahoţe
li cito, kit laẖmo
cal ruẖe d miṯo

bac mëqqa b ẖaşrawe
laẖmo d farmo
w basimo

3

axxx kacbe, zarre, rëǧayat,
ẖaţro-pallo, baluţe, ǧazale barriye,
ţërra-şahro b qërš w yëşpara

mëqqa misalenawo boxu
b lebo šafyo?
qale, şucre, qallës w dëbolo

mamro, kṯawto, qrayto
l ẖëlmo d hawxa yawme
ma ucdo qay layto?

4

nacime! zcure!
qurbane d caynayxu, rabëcyo!

mawbelu af fare, aş şafure
li marca!

ẖţiṯoyo, Aloh bciji lawǧël!
mërla qašto.

5

zoxu, mawbelunne
ţruxli w šotën

cël maš šaqfe w šënoṯo
hama hënne ste,
ëšmo ţër mčaqzi!

hatu ste amţawunxun
bërzëǧlayle, perapënţe,
ẖafrofe, ẖlawloye, mëšẖo-kalo

lë ţucetu, kubaclan ẖaršaf

şawmo’yo,
a ţlawẖe cël mi tfayo
kubacce heš rṯoẖo

6

aẖ ẖaye sloqo w nẖotone

kducena: xwazi d huwanwo,
hama xëd başmoro,
be aydarbo kmidëq w kcobër,
hawxa xayifo b gawe d qayso.

ašër u mamro basimoyo,
bas cayn xëd u baxyo,
gaẖxo ste bi ẖalaṯe,
haw fašwo b arco

lo!
hawxa lo!
kobëc d fayšina noše
naqla cam baxyo
w naqla ste cam gaẖxo.


1

b nëqošo,
bë kritik aw b nëqodo
b diyalog,
aw b mahwo w šqolo
mdoẖo, šëbhoro
ya ste tëcliyo d nafšo ...
i naqla nafšo ẖreto
b iqoro d šëmco
d obo aḏno
l mamro, l fëkër aw lë šroẖo
d kit gab i nafšo,
kowe fhomo

2

hano gabayna,
këmmina: nëquşo’yo

ëno këmarno:
wariḏo d iboco, latle!

ma hano këtle šuqo?
kibe tamo ẖa šoqël mene?

haka kit?!

ma hano b kallayo?
dlo kallayo?

ašër maḏco latli!

3

haka nošo koḏëc
këtle maḏco?

hama b xer dëṯxu
marulli!

Alo gëd kuṯawla side
xer, mena loxu
w mena ste l qayës d këtxu!

ma hawxa bašyo?

4

Aẖnone!
qumayxun këlle maẖëtli
be mën šëwolo këtli

zëcṯo, d umarno lawili
Aloh kowe dugle

mawxa, hjomo acli
këmarno, latyo ẖaq!

hawxa kayisoyo?

haka madcarxun “e”
han naqqa dawro
dëṯxunyo, mšayelu.


1

këtlan maṯlo komër:
mëqqa d bëlšët ban nëẖre,
haqqa reẖo gëd nofëq.

hawxa bdelan bu tarix
më aṯmël

Alo mënwan?
mën sëmlan?
w mën ţrelan?

ma hano ẖaqyo?
aw lo?!

2

hawxa hëzlan iḏayna
w malaxlan l adyawma

ma layko maţina?
këtxu xabro?!

hën mënayna këmmi:
l Fëndëke-Boţa

w hën ste këmmi:
lo l të dëkṯo!

ma u šrolo hanoyo?

3

ba aẖnone!
qẖoro lë mëqẖëritu!

kuḏac
Aloh i ẖaqiqa mayërtoyo,
ba mën samno?!

hani 2 alfo šne
mënayxu tëlyoli

bas më Alo ...
laybi w lë tëlyoli

lë qadërno!


Kef kef diḏan’yo

1

Meẖo d aǧatiye,
Aloh këtlan!

kanšo bebav d feodaliye
Aloh këtlan!

dugle lë këmdagalno
bu Ţuro haniwan

amţelan acmayna
kul xëlofo

aẖuno!
zrëclan w hay zrëclan

ayko?
b Awruppa!

2

Hawxa ste bašyo yabo
kobëc cwodo w tacbo

ma lo gëd mšaylilan
azzoxu l Awruppa

ma tamo mën sëmxu?
ba b dugle

layban ëmmina:
axilan nëẖre!

gëd ëmmina du šrolo
Aloh, Aloho wakilo’yo

hani tam 40 šne
babe dë ẖḏoḏe

dlo kloyo w dlo aţlahiye
mawqaḏlan!

de han naqla d ëbcët mëtyaqën
w d ëbcët ste lo!

aşël hatat!


1

këmmi kritik madani
ǧalabe kayisoyo

han naqqa cam man?
cam dë kfohëm i macna

ha haṯeyo d kobo fëşẖo
l man d hawi

2

Aẖuno,
bu lišono haka materyalist hat

i naqlayo këtlox ẖubo

ẖarf b ẖarf, b iḏox kmaydët
kmaqlëbët w kmaţrëşët

hawxa knofëq li ẖolo

kul šëfro, kul ẖalyuṯo
be lišono mën kobe?

kubatte w kmaẖwatte

fekiye cal şëfro
mu ẖamuşo hul lu mayiro

ţacmo b ţacmo.

Alert   IP Print   Edit        Reply      Re-Quote Top

Forums Topics  Previous Topic Next Topic


Assyria \ã-'sir-é-ä\ n (1998)   1:  an ancient empire of Ashur   2:  a democratic state in Bet-Nahren, Assyria (northern Iraq, northwestern Iran, southeastern Turkey and eastern Syria.)   3:  a democratic state that fosters the social and political rights to all of its inhabitants irrespective of their religion, race, or gender   4:  a democratic state that believes in the freedom of religion, conscience, language, education and culture in faithfulness to the principles of the United Nations Charter — Atour synonym

Ethnicity, Religion, Language
» Israeli, Jewish, Hebrew
» Assyrian, Christian, Aramaic
» Saudi Arabian, Muslim, Arabic
Assyrian \ã-'sir-é-an\ adj or n (1998)   1:  descendants of the ancient empire of Ashur   2:  the Assyrians, although representing but one single nation as the direct heirs of the ancient Assyrian Empire, are now doctrinally divided, inter sese, into five principle ecclesiastically designated religious sects with their corresponding hierarchies and distinct church governments, namely, Church of the East, Chaldean, Maronite, Syriac Orthodox and Syriac Catholic.  These formal divisions had their origin in the 5th century of the Christian Era.  No one can coherently understand the Assyrians as a whole until he can distinguish that which is religion or church from that which is nation -- a matter which is particularly difficult for the people from the western world to understand; for in the East, by force of circumstances beyond their control, religion has been made, from time immemorial, virtually into a criterion of nationality.   3:  the Assyrians have been referred to as Aramaean, Aramaye, Ashuraya, Ashureen, Ashuri, Ashuroyo, Assyrio-Chaldean, Aturaya, Chaldean, Chaldo, ChaldoAssyrian, ChaldoAssyrio, Jacobite, Kaldany, Kaldu, Kasdu, Malabar, Maronite, Maronaya, Nestorian, Nestornaye, Oromoye, Suraya, Syriac, Syrian, Syriani, Suryoye, Suryoyo and Telkeffee. — Assyrianism verb

Aramaic \ar-é-'máik\ n (1998)   1:  a Semitic language which became the lingua franca of the Middle East during the ancient Assyrian empire.   2:  has been referred to as Neo-Aramaic, Neo-Syriac, Classical Syriac, Syriac, Suryoyo, Swadaya and Turoyo.

Please consider the environment when disposing of this material — read, reuse, recycle. ♻
AIM | Atour: The State of Assyria | Terms of Service