Assyrian Forums
 Home  |  Ads  |  Partners  |  Sponsors  |  Contact  |  FAQs  |  About  
 
   Holocaust  |  History  |  Library  |  People  |  TV-Radio  |  Forums  |  Community  |  Directory
  
   General  |  Activism  |  Arts  |  Education  |  Family  |  Financial  |  Government  |  Health  |  History  |  News  |  Religion  |  Science  |  Sports
   Greetings · Shläma · Bärev Dzez · Säludos · Grüße · Shälom · Χαιρετισμοί · Приветствия · 问候 · Bonjour · 挨拶 · تبریکات  · Selamlar · अभिवादन · Groete · التّحيّات

Qriṯo şërayto bu Ţuro, aydarbo qalibo w hawyo ţayayto?

    Previous Topic Next Topic
Home Forums Religion Topic #65
Help Print Share

Atouradmin

 
Send email to AtourSend private message to AtourView profile of AtourAdd Atour to your contact list
 
Member: Dec-10-1996
Posts: 1,880
Member Feedback

Qriṯo şërayto bu Ţuro, aydarbo qalibo w hawyo ţayayto?

May-10-2011 at 04:30 AM (UTC+3 Nineveh, Assyria)


Qriṯo şërayto bu Ţuro, aydarbo qalibo w hawyo ţayayto?
How a West Syrian village in Turabdin in Upper Mesopotamia became Muslim?

Jan Beṯ-Şawoce. May 19, 2010.
http://www.atour.com/religion/docs/20110509a.html

I qëşşaṯe d laltaẖ, nafiqo b šëkël ğalabe karyo, bi gazeta d Zaman (Papaz kim? Ali Bulaç, 5 Mayıs 2010) i ţayayto bë Sţanbul. Cal d nafiqo li ẖolo, ẖzeli d ëbeno kula, xëd kityo lu qaroyo, kayis gëd howe lašan d miḏëc i masale bu asas mënyo?

Bu şurayt këtlan maṯlo hawxa komër: Komo xu qiro. Yacni zëd mu komo komoyo. I naqqa, nošo aw mede d mitaẖwewo ğalabe pis aw negativ, hawxa bu qiro miwaşafwo. Hedi hawxa, aš šamoce uḏciwo, hano mën mede ẖarboyo.

U tarix di citayḏan, madënẖayto w macërbayto, ğalabe ğalabe komoyo. Bu maṯlo d komër ”qiro” heš zëd ste mu qiro, ğalabe ğalabe komoyo i naqqa ẖa d uḏacle. Haqqa ẖarbuṯo kito b gawe du tarix di cito. Han naqqa i ẖarbuṯaṯe d këmmina, mënyo? Du šrolo, i masale mudu mi benamusiye w slaqu l lalcël w nẖatu eba hul l laltaẖyo. Bu samo du negativano mcaramţo w mliṯoyo i cito.

Aẖna më meqëm, d oṯe w huwewolan dawle, baẖ ẖabsat diḏa % 90 da ẖbisoyo, dayëm gëd huwanwo kuhne. U jaza yaquro ste mënwe, aclayye gëd mëqţacwo, mudu mu šnoqo w hul lu rjomo, w hul lu ẖabis yarixo. Dawle lawilan, mawxa nošo mënayye lë qadër d maẖët kuhno bu ẖabis.

U tarix qiro mqarqërano ste, lašan dlë miḏëc, i cito bdela ksaymo şansur acle. U kṯowo, d kuḏci tahlukayo bu mëstaqbël, mawqaḏḏe, mẖalaqqe, mzabanne w mdahdarre. Mën fayiš bi ẖarayto? Han naqqa fayiš, kul kuhno pis w ẖarbo. Hani ste, hënne b iḏayye kṯëwwe acle. Mdëẖẖe w maclalle li šmayo. U kuhno d këtwe kayiso ste, ya lë kṯëwwe acle w ya ste manẖatte lu ẖëşẖaş di arco, bi kṯawto.

U tarix komano, klozëm d nofëq li ẖolo. Du šrolo, klozëm d manfëqinale li ẖolo. Zëcṯo, abadan lë kowe d zaycina mene. Hul ucdo zayicina, mën mëstafadlan? Mede mcadlo, mede msawyo w mede kayiso, b caynoṯayxu kẖuzetu, ẖatta harke b Awruppa, lë sëmlan.
Mu tarixano gëd maẖkeno sahmo. Bu šëklano, kito alfowat dë ẖkeyat. Hul d oṯe meni, hawxa bu šëklano, gëd këṯawno hën mënayye. I ẖkeye d laltaẖ, ğalabe catëqtoyo, bu nëquşo kibe hawila 100 šne.

Hano mën qašoyo? Lëmmitu! Adyawma ste kito ğalabe xëdwoṯe…

Larwal d Mëḏyaḏ, këtwo qriṯo şërayto. An noše d gawa, këtwolle qašo b rišayye. An noše di qriṯo, mu qašano latwayye mamnun. U qašo ẖa benamuswe, bi qriṯo, şxërle i madrašto dan nacime, mawqaḏle a kṯowe du yëlfono w cayne bu mal w bu mëlk dan nošewa. An noše şëroye ğalabe cajizewën mene. Abici dë mğayrile. Šan d hawxa, bu sër, ar rabe di qriṯo, sëmme kmo naqqat knëšyo cam ẖḏoḏe. Bi ẖarayto maţën l qanaca, klozëm d mawḏëci i ẖale d këtne eba, li faţëryarxuṯo b Mërde. Qralle lu šamošo, uḏacwo qrayto w kṯawto, mawmalle cal u Mgalyën dlë maqër cal u sër dëṯṯe. Ymele. Qanici bu ymoyayḏe. Bëṯër, makṯawwe maktub ebe, cal u şxoro di madrašto, cal u yqoḏo da kṯowe w cal i benamusiye du qašo. Šrëẖẖe kul mede bu maktubano. Bëṯër mi kṯawto, qralle u maktub, kulle raḏën cal gawe. Qralle l ẖa qaşëd mi qriṯo, maẖkëlalle mën gëd soyëm w layko gëd ëzze. Mšayacce u qaşëd, acme maktub li faţëryarxuṯo, li Dayro du Zacfaran.

U šamošo dë kṯëwle u maktub, bu talyo azze l gab u qašo. Maẖkëlele an noše bi qriṯo, mën faẖo ksaymile. U qašo hëzle qarce w mërle: Šamoško tawdi. Aloho mnaţarlox w dayëm iḏe du yamino, d huwyo aclox! Aloh koroẖamnox ğalabe. Koẖozat b iḏi, kalla aw mal d obenox, latli. Ḫur kit i ẖurmayhe du bayto baroyo, zox l sida. Marla ”lu qašo mšayacleli” hiyya gëd fëhmo aclox. Maqḏay šuğlox w tox disa l sidi i naqqa d howe mede acli bi qriṯo.

U qaşëd azze, huwle u maktub w dacër... Mi faţëryarxuṯo, zabno yarixo, nošo lo foṯo w lo xabro luwle li qriṯo. An noše jbiri d saymi ẖarake ẖaṯto. Naqla ẖreto bu sër, layimi bu knëšyo. Huwwe w šqëlle cam ẖḏoḏe cal i masale du qašo. Harke bu knëšyo, maţën li qanaca, li faţëryarxuṯo më ẖaṯo kṯawto ẖreto, haw këtla macna. Ţralle femo mi faţëryarxuṯo.

Maţën disa cam ẖḏoḏe l qanaca ẖaṯto, han naqqa gëd mašmëci i masalaṯṯe lu šëlţono Cabdël-Ḫamid bë Sţanbul. Ḫšëwwe, šëlţonoyo w ẖokumeyo, balki bi quwwa di caskar di Ḫamidiye d mëfqile lu qašo mi qriṯo. Qanici hawxa kulle. Naqla ẖreto qralle lu šamošo. Aṯi. Mawtawwe, amţalle u Mgalyun, mawmalle. Ymele. An noše mëralle, han naqqa gëd këṯwi lu šëlţono. U šamošo mëdle lu qalam w lu warqo, bdele bu carabi kkoṯëw lu šëlţono. Kṯëwwe maktub ẖreno yarixo. U šamošo tayëm šuğle, qayëm azze l bayte. Qralle lu qaşëd, šrëẖalle mën gëd soyëm. Mëdle u maktub w azze lu wali b Mërde. Huwle u maktub w dacër.

U šamošo, naqla ẖreto bu talyo, azze l su qašo. Maẖkele lu qašo ar rabe mën sëmme… U qašo naqla ẖreto, maškarle u šamošo, han naqqa hulele ëšmo d bayto ẖreno d ëzze, gab ğer ẖurma. Azze l sida w maqḏele šuğle.

An noše di qriṯo naţiri d oṯe xabro mu šëlţono Cabdël-Ḫamid. Naqla ẖreto zabno yarixo naţiri, më tamo ste, xabro lë madcarre aclayye. B karyuṯo, lašan d xulşi mu kuhno pisano, nošo mede lë sëmlelën.

An noše di qriṯo naqla ẖreto jbiri d saymi knëšyo bu sër. Bu knëšyano hawilën mamro w tënoyo cam ẖḏoḏe. Ḫzalle, lo bi arco w lo bi šmayo, ẖuwwe latte. Bdalle cam ẖḏoḏe d kurxi cal čara: Mën saymina? Yarixo, huwwe w šqëlle cam ẖḏoḏe. Bi ẖarayto ẖzalle, dlo hënne b iḏe d ruẖayye ẖayki qarcayye, čara latte!

Abici, b iḏe d ruẖayye, hënne d kurxënne cal čara. Xabro marke w ẖa më tamo. Këzzën w koṯën baš širat w baf fëkrat, mënyo i ţawto? Bi ẖarayto, mërre lë ẖḏoḏe: Gëd nëfqina mi qriṯaṯe, gëd ëzzan lë qriṯo ẖreto. Tamo, kulan gëd hëwena ţaye w xulşina mi masalaṯe b naqla ẖḏo. Bu knëšyo, nošo mqabël lawi. Mëdde qarar cam ẖḏoḏe, hawxa gëd saymi. Maẖëtanne yawmo ste lu nfoqo mi qriṯo, ema gëd howe.

Aṯi u yawmo, blalyo, rabe w nacime, niše w gawre, ksaymi ruẖayye kar, dlo ẖës knëfqi mi qriṯo. Kmalxi baš šalwe w baţ ţurone bas sacayat. Foṯe d şafro, kmoţën lë qriṯo d ţaye. Kcubrila, baroyo mu bayto qamoyo këmšayli cal u bayto du šex. Kmaẖwanne w këzzën lu bayto du šex. Maţën li darga, dëqqe cal i zëqqaţa du tarco, kmo naqqat w naţiri. Aṯi more du bayto, ftëẖlelën u tarco. Mšayalle: Ma hano u bayto du šex di qriṯoyo?” u šex madcarle: E, mën xeryo? Mën hawi? Mën këbcitu? Këmmi lu šex: Yabo aẖna mšiẖoyena, këbcina d huwena ţaye. U šex b kul fëşẖo mëstaqbëlile. Macbërile li dërto du baytayḏe. Mdayfile muklo w štoyo, qroţën, crayto, ẖšëmto ..... axër. Bi ẖarayto, u šex omër ”De han naqqa qumu! Ëzzan cam ẖḏoḏe lu jemëc, tamo mšahedu cal iḏi, w bëṯër mşalawu acmi i şluṯo.” Kulle qayimi malize li rağlo. Këmhaḏri w kmaltëmi ruẖayye lu mazlo.

Qëm di darga u šex komër: Accccaw! Adyawma mën yawmo mqadšo w mbarxoyo! Ḫuru li ẖëkme du morayḏan! Këtwolan malla lo šţaw maẖ ẖaḏire, mẖase. Meqëm mënayxu, hama kibe balki bë kmo d sacayat, aṯi l sidi ẖa qašo. Hawxa b šaqle w faşal! Bi šaqlayḏe kmarcël aţ ţurone! Cayn xëdwoṯayxun, huwwe ste abëc d howe ţayo. Bac ţaw mawxa mayko kit? Ya rab! Hama bas bërkoṯo kfax aclayna! Aloh gëd samno huwwe malla alxu!

Aş şëroye ẖšëwwe, këlle hawën ţaye w gëd xulşi b naqla ẖḏo. Të macna ste, lë qadiri d obi, li masale d cabiri eba. Hawxa mwakalle cal Aloho, w azzën lu jemëc. I naqqa d cabiri li dërto du jemëc, bac b caynayye, mën d ẖozën kayistoyo?! Kal këlle u qašo di qriṯo tamo kalyo! Këtle b qarce šašëke! Gabe u šamoško, lwišo jule daf faqqa. A tre, meqëm mënayye aṯën w hawën ţaye ste. Ucdo u qašo gëd howe malla aclayye! U šamoško ste faqqa! E de han naqqa toxu mşafawulla!

Aş şëroye, ẖzalle ruẖayye, më ẖaṯo, daciri naqla ẖreto, li xane qamayto. Hawën ţaye ste w lë manfacla. Cabiri l cayni gihano! Bi dërto du jemëc hawi ”ğëlo-ğëlo” bayn daş şëroye. Ḫzalle i ẖalaṯṯe mede lë mğayër eba. Hën bdalle b şurayt këmhawri ”Haw kuwena ţaye! Ducrina lab botayḏan!”

U šex laḏëc mënyo? Bdele b kurmanji këmšayël: Mën hawi? U malla ẖaṯo mjawable: Mandamme, haw këbci i ţayuṯo! Këbci d ducri li mšiẖuṯo! U šex mdaywën. Këtwole nëţure taẖt më iḏe bi dërto du jemëc. Mhawarle aclayye: Kundëro! Šuviyo! Şxaru i darga du jemëc! Azzën rahoţe, şxërre i darga. Han naqqa, haw kibe nošo ste d mahzëm.

Aş şëroye mẖarẖašše ruẖayye, abici dë mqawmi mqabël... U šex mërle: Bi ţayuṯo dcoro layt! U ẖa d docër, darbe mawtoyo! Ma lë kuḏcitu! Aş şëroye hjëmme li darga w las siyoğene lašan d mahzëmi w maxlëşi. U šex mhawarle: Mẖammad şalawat! Ak këfure loxune! U admaṯṯe ẖalalyo! U qaţlaṯṯe ẖalalyo! Wajëbyo d quţlitunne!

Hjëmme cal aş şëroye. U ẖa dë msik bi dëkṯo, pazzëki nẖir. Mi zëcṯo an noše kalën haw mahzamme. A qţile, ẖa b ẖa mgargëši, mẖalqi b gawe di čačma du jemëc.

Hawxa aş şëroye d fayiši jbiri d maqbëli i ţayuṯo w u malla ẖaṯo cal riše d ruẖayye. U šex mhawarle: Yalla kulxu lam mëssinat! Mašeğu ruẖayxu mu garwo di mšiẖuṯo! U ẖa manxu dlo mašëğ, foṯe du morayḏe lë kẖoze bi malkuṯo!

Aş şëroye kulle, kul ẖa b dawre, msëkle li mëssine w azze l riše di cayno dam maye. Mlalle maye, mašëğğe, manḏaffe ruẖayye mi mšiẖuṯo. Mşalalle l qul du šex, jbiri hawën ţaye.

Alert   IP Print   Edit        Reply      Re-Quote Top

Forums Topics  Previous Topic Next Topic


Assyria \ã-'sir-é-ä\ n (1998)   1:  an ancient empire of Ashur   2:  a democratic state in Bet-Nahren, Assyria (northern Iraq, northwestern Iran, southeastern Turkey and eastern Syria.)   3:  a democratic state that fosters the social and political rights to all of its inhabitants irrespective of their religion, race, or gender   4:  a democratic state that believes in the freedom of religion, conscience, language, education and culture in faithfulness to the principles of the United Nations Charter — Atour synonym

Ethnicity, Religion, Language
» Israeli, Jewish, Hebrew
» Assyrian, Christian, Aramaic
» Saudi Arabian, Muslim, Arabic
Assyrian \ã-'sir-é-an\ adj or n (1998)   1:  descendants of the ancient empire of Ashur   2:  the Assyrians, although representing but one single nation as the direct heirs of the ancient Assyrian Empire, are now doctrinally divided, inter sese, into five principle ecclesiastically designated religious sects with their corresponding hierarchies and distinct church governments, namely, Church of the East, Chaldean, Maronite, Syriac Orthodox and Syriac Catholic.  These formal divisions had their origin in the 5th century of the Christian Era.  No one can coherently understand the Assyrians as a whole until he can distinguish that which is religion or church from that which is nation -- a matter which is particularly difficult for the people from the western world to understand; for in the East, by force of circumstances beyond their control, religion has been made, from time immemorial, virtually into a criterion of nationality.   3:  the Assyrians have been referred to as Aramaean, Aramaye, Ashuraya, Ashureen, Ashuri, Ashuroyo, Assyrio-Chaldean, Aturaya, Chaldean, Chaldo, ChaldoAssyrian, ChaldoAssyrio, Jacobite, Kaldany, Kaldu, Kasdu, Malabar, Maronite, Maronaya, Nestorian, Nestornaye, Oromoye, Suraya, Syriac, Syrian, Syriani, Suryoye, Suryoyo and Telkeffee. — Assyrianism verb

Aramaic \ar-é-'máik\ n (1998)   1:  a Semitic language which became the lingua franca of the Middle East during the ancient Assyrian empire.   2:  has been referred to as Neo-Aramaic, Neo-Syriac, Classical Syriac, Syriac, Suryoyo, Swadaya and Turoyo.

Please consider the environment when disposing of this material — read, reuse, recycle. ♻
AIM | Atour: The State of Assyria | Terms of Service