share

 Home | News | Armenian, Assyrian and Hellenic Genocide News

Armenia: Perspectives of Rafael Hambardzumyan
ՆԱԽԸՆՏՐԱ ԿԱՆ ԾՐԱԳԻՐ (in Armenian)

by Rafael Hambardzumyan — historian, human rights activist. March 16, 2012.

Posted: Friday, March 16, 2012 at 02:13 PM UTC


ԱԶԳԱՅԻՆ  ՄԻԱՍՆՈՒԹԵԱՆ  ՈՒԽՏ

Oukht National Union

Երեւան, Մարշալ Բաղրամեան 24 գ, XI յարկ, թիւ 134 սենեակ, հեռ.589.431, 093.840.342
Yerevan, Baghramian 24g, tel. 589-431, 093.840.342 E-mail: hrafael [ a t ] inbox.ru


Ն Ա Խ Ը Ն Տ Ր Ա  Կ Ա Ն   Ծ Ր Ա Գ Ի Ր

Մուտք

                       ՀՀ պետականութիւնը կորցնելու վտանգը ու երկրի հայաթափումը այլեւս անվիճելի իրողութիւն է: Համայն հայութեան ջանքերը պէտք է բեւեռենք կասեցնելու մեր ժողովրդի գլխին կախուած արհաւիրքը:
Հայոց պետականութեան կորուստը, ժողովրդի համատարած չքաւորութիւնն ու հայրենալքութիւնը կասեցնելու ելքն այսօր ԱԺ առաջիկայ ընտրութեանը միասնական համընդհանուր գործողութիւններով եւ քարոզչութեամբ ազգի հայրենապաշտ ընտրանուն իշխանութեան բերելն է: Դա իրագործելու համար հանրութիւնը պէտք է ընդունի եւ համայնացնի իր գաղափարատու ընտրանու` ստորեւ ներկայացւող նախընտրական բացառիկ ծրագիրը, որի հիմնադրոյթները («Հանգանակ հայ ինքնութեան») երկրի գիտակրթամշակութային հանրայայտ ուժերի մասնակցութեամբ կազել եմ  20 տարում:  Ծրագիրն ընթերցող իւրաքանչիւր մարդ կհամոզուի, որ այն ներառելով հայոց ազգային աւելի քան 4500-ամեայ գաղափարաբանութեան առանցքային դրոյթները, երկրի կործանումը կասեցնող ամենաիրական ուղին է այսօր, որի կարիքը հայութիւնը ունի աւելի քան 20 տարի: Հայ  քաղաքական մտքի պատմութեան մէջ աննախադէպ սոյն ծրագիրը ՀՀ  բնակչութեանն ու համայն հայութեանը հնարաւորութիւն է տալիս կարողութիւնները նորից բեւեռել մէկ համազգային գերնպատակի շուրջ, ինչպէս եղաւ 1988 թուականին: Հետեւաբար` առաջարկւող ծրագիրն ընդունած ՀՀ ամէն մի քաղաքացի կուսակցութիւններին ու անհատներին պէտք է յորդորի խորհրարանի առաջիկայ  ընտրութեանը նախընտրական ծրագիր հռչակեն ազգի սերուցքի առաջարկած սոյն ծրագիրը ամբողջովին կամ` ծրագրի հիմնադրոյթները: Ասել է թէ` ՀՀ  բնակչութիւնը առաջիկայ ընտրութիւններին ոչ թէ պիտի ընտրի որեւէ կուսակցութեան կամ անձի, այլ ՄԻՄԻԱՅՆ  ներկայացուած  այն ծրագիրը, որի հեղինակները ընտրողի կարծիքով ի զօրու են կասեցնել երկրի գլխին կախուած արհաւիրքը եւ ազատուել աւելի քան 20 տարի ՀՀ-ն հեղինակազրկող եւ բնակչութեանը ունեզրկող վարչախմբից:

Նախաբան

             Մարդկութեան պատմութեան ամենաահաւոր բռնապետութիւնը մէջտեղից վերացրեց համայն հայութեան կոթողած 1988-1991թթ. Արցախամարտը` ազատագրելով ոչ միայն Հայաստանի հայութեանը, այլեւ կայսրութեան լծի տակ յեծող Եւրասիայի բազմաթիւ  ազգերի:
            Սակայն օտար ուժերը մեր ազատագրուած երկրի բովանդակ իշխանութիւնը ՄԷԿ ՄԱՐԴՈՒ ձեռքով իրականացնելու եւ Արցախականով նուաճուած մեր իրաւ անկախութիւնը կեղծ ժողովրդավարութեան հաստատումով վերացնելու համար 1991 թ. ՀՀ-ում հիմնեցին նախագահական վարչակարգ: Սրանք իրենց ձեռնասուն ՀՀ նախագահի ձեռամբ.              ա.Արցախը Հայաստանին միաւորելու 1989 թ. դեկտեմբերի 1-ի պատմական որոշումը զորազրկեցին կեղծ  անկախութեան հանրաքուէո'վ:
բ.Փոշիացրեցին Արցախեան համայնամարտի մեր  յաղթանակներն ու ազգային անբաղդատելի միասնութիւնը:
գ. Համայն հայութեան ազատագրած մեր երկիրը դարձեալ գցեցին օտարի տիրապետութեան տակ:  ՀՀ-ն 1992 թուականին որպէս գաղութ գամուեց մարդու եւ ազգերի ազատութիւնը մերժող մեծապետական յետամնաց Ռուսաստանին , որը 1992 թ. Անկախ պետութիւնների համագործակցութիւն(ԱՊՀ),  իսկ 2002 թ. Հաւաքական անվտանգութեան պայմանագիր կոչւող կառոյցների հիմնադրումով վերականգնեց կայսրութիւնը:
դ.Բազմաթիւ նուիրեալ հայրենահոգ գործիչներին մէջտեղից վերացնելով կամ հանրային կեանքից հեռու պահելով, նրանց փոխարէն իշխանութեան բերեցին քաղաքական յետաԳՆԱՑ տականքին, որի միջոցով երկիրը մխրճեցին բարբարոսութեան մէջ,  իրականացրեցին բազմաթիւ սպանութիւններ, նաեւ կեղծ դատավարութիւններ. զանազան խոչընդոտներով, հարկերով, հայրենամերժ օրէնքներվ ու այլ գործողութիւններով հանրութեանը զրկեցին տնտեսական գործունէութեամբ զբաղուելու տարրական ազատութիւնից, Հայաստանը դարձրեցին համազգային ունեցուածքը  կողոպտելու անվերահսկելի սակարանի:
Աշխատատեղ, գործելու եւ դրամ վաստակելու ազատութիւն եւ բաւարար ապրուստի միջոցներ չունեցող հարիւր հազարաւոր  անիրաւուած ՀՀ  քաղաքացիներ ուտելիք, աշխատանք եւ արդարութիւն  գտնելու փնտրտուքով` գլուխներն առած փախան եւ փախչում են անկախ  յայտարարուած Հայաստանից...
ե.Հայ ժողովրդի ազատագրական ոգին ուժաթափելու եւ մեր  ազատագրուած տարածքները մայր հայրենիքին միաւորելը ի չիք դարձնելու դիտաւորութեամբ բազմաթիւ սադրանքներով ու արիւնայեղութիւններով վիժեցրեցին հայոց այլ տարածքների հայրենատիրութիւնն ու Արցախի ազատագրուած տարածքների բնակեցումը, որը  Արցախը Հայաստանին վերամիաւորելու հիմնական պայմանն էր:
զ.Մի քանի անձանց հարստացնելու համար դրանց արտօնուեց երկրի հաստոց-սարքաւորումները եւ հանրային այլ ունեցուածքը կողոպտելով վաճառել օտարին, իսկ նախապէս ամբողջ երկիրը հոսանքազրկելով- լուսազրկելով, դրսից էժան գներով ձեռք բերուած մոմն ու վառելիքը  Հայաստանում վաճառել գերթանկ գներով` ջերմանիւթից եւ լոյսից զրկուած տասնեակ հազարաւոր անձանց մարմնական ու հոգեկան առողջութիւնը խաթարելով-գամելով անկողնուն` մարեցին հայութեան երբեւէ ունեցած ամենաբազմաքանակ զարթօնքը:
է. Հայաստանեայց Եկեղեցին հայ մարդու հոգուց վտարելու համար հովանաւորեցին Հայաստան ներխուժած հայ ժողովրդի միասնութիւնը խաթարող սատանայապաշտ բազմաթիւ աղանդների, գլխաւորեցին Հայաստանի նորագոյն պատմութեան անօրինակ  խեղաթիւրումը:
ը. Հայասպան ուժերի ձեռքով վերսկսուեց իրագործուեց Հայաստանն առանց հայերի հարիւրամեայ արմէնոցիդը:
ՀՀ բարձրագոյն ղեկավարութիւնն էր, որ 7-8 մլն սփիւռքահայերի հայրենադարձը պետականօրէն կազմակերպելու փոխարէն կատարում է հակառակը. 1991-2011 թթ. ընթացքում  ՀՀ ղեկավարութիւնը երկրից տեղահանել է մէկ միլիոն հայ, անտանելի անիրաւութիւններով գաղթեցել հայ բնակչութեանը, ՀՀ հողն ու տները վաճառել է  օտարին, երկիրը լցրել եւ լցնում է բազմաթիւ այլազգիներով:Սա  հայ տարրը Հայաստանից հալածելու, հայութեանը մեր երկրում ձուլելու-այլասեռելու, մեր տեսակը մեր երկրում փոքրամասնութիւն դարձնելու հայրենամերժութիւն է, որը ուղեկցւում է մամուլով  ու հեռուստատեսութեամբ օտարածնութեան եւ ապօրինի խառնամուսնութեան վարձու քարոզով :
ՀՀ 1991-2011 թթ. բարձրագոյն ղեկավարութիւնը  նշուած ու բազմապիսի այլ հայրենադաւ ոճիրների համար  պէտք է անպայման կանգնի դատարանի առաջ:
20 տարի շարունակւող տնտեսական, աննախադէպ դաւանական, գաղափարական, կրթական, հոգեմշակութային նախճիրից եւ բարոյախեղումից ազատագրուելու ամենափորձուած միջոցը հազարամեակներ շարունակ մեզ համար եղել եւ մնում է մեր հոգեկրթամշակութային մեծագոյն զօրութիւնը` հայոց ազգային գաղափարաբանութիւնը: Երկրի տնտեսական, ընկերային, քաղաքական եւ հոգեմկրթամշակութային աղէտը պետականօրէն կասեցնելու հրամայականը պարտադրում է հայոց ազգային գաղափարաբանութեան շուրջ համախմբելովով` մասնակցել Ազգային Ժողովի առաջիկայ ընտրութիւններին: Նպատակին հասնելու համար նորակերտ ծրագիրը, յատկապէս գործելակերպ-գործելաոճը պէտք է արմատապէս տարբերուեն 20 տարի շարունակ իշխող եւ ընդդիմադիր ուժերի ծրագիր-գործելակերպից: Ցայսօր գործող հնացած-ցնցոտիացած-արժեզրկուած- այլամերժ ուժակորոյս գաղափարներով եւ գործելակերպով նոր սերունդը բացառւում է որեւէ էական ձեռքբերում ունենա:

      Երկիրը աղէտից դուրս բերելու նպատակով հանրութեանը միաբանուել եմ յորդորում նախընտրական հետեւեալ գաղափարների, ծրագրի եւ վճռական գործողութիւնների շուրջ.

1.Պետութեան կառուց, հանրային սեփականութիւն, տնտեսութիւն, արդիւնաբերութիւն, դրամ, առեւտուր:

ա.Հայաստանի Հանրապետութիւնը համայն հայութեանը պատկանող  քաղաքական, բարոյական  ու տնտեսական շահագործումներից զերծ ԸՆԿԵՐԱՅԻՆ պետութիւն է, որը պարտաւոր է ապահովել բնակչութեան արժանապատիւ ապրուստն ու ազատութիւնը:

բ. Հայաստանի Հանրապետութեան հարստութեան տէրը ՀՀ ժողովուրդն է, ուստի ՀՀ  ռազմավարական ունեցուածքը(ջուր, հող, վառելիք, էլեկտրականութիւն եւ այլն)պէտք է ՀԱՆՐԱՅՆԱՑՒԻ-ՊԵՏԱԿԱՆԱՑՒԻ:

գ.Առանց ազատականացման, զարգացումը բացառւում է: Մարդիկ որեւէ արժէք են ստեղծում այն դէպքում միայն, երբ վստահ են, որ այն իրենցից չի խլուի: Մինչդեռ ՀՀ ամբողջ տնտեսութիւնը կեդրոնացուած է դրսի ելեւմտից եւ այլ  կառոյցների կամակակատար մի քանի ընտանիքի ձեռքը, ՀՀ քաղաքացիները բացարձակապէս զրկուած են տնտեսական-առեւտրային որեւէ ինքնուրոյն-անվտանգ գործունէութիւն իրականացնելու հնարաւորութիւնից... Հետեւաբար` մրցակցային ազատ տնտեսական միջավայրի արմատաւորում ամենուր, որտեղ պետութեան դերը հիմնականում պէտք է լինի երկրի հողատարածքի, տնտեսութեամբ զբաղուելու ազատութեան եւ մտաւոր սեփականութեան պաշտպանութիւնը:

2. Արտաքին քաղաքականութիւն:

   Համայն հայութեան եւ ՀՀ արտաքին քաղաքականութեան առանցքը Հայրենատիրութիւնն է: Աւելի քան  չորսուկէս հազար տարի հայութեան արտաքին քաղաքականութիւնը  եւ մեր ազգի պատմական ճակատագիրը եղել եւ մնում է արեւելքի եւ արեւելքի տնտեսութիւնն ու մշակոյթը հաւասարապէս հարստացնող, այդ երկու քաղաքակրթութիւնների հանդէպ չէզոքութիւն պահպանելը: Հայութիւնն իր չէզոքութիւնը որեւէ երկրի հանդէպ խմբագրել կարող է  միայն հայոց Հայրենատիրութեան հանդէպ այդ երկրի դրսեւորած ժխտական քայլերի դէպքում...

3. Կրթութիւն, գիտութիւն:

                        Մեր երկրի մեծագոյն հարստութիւնը բնակչութեան գիտամշակոյթն է : ՀՀ-ում հայոց  միջնակարգ եւ բարձրագոյն դպրոցը եւ գիտութիւնը առաւելագոյնս  զարգացնելով, ամբողջովին  պէտք է հասցւի միջազգային այնպիսի մրցակցային մակարդակի, որպէսզի այն դառնա ՀՀ ազգային  եկամուտի ու շահոյթի աղբիւրներից մէկը:
Հայոց դպրոցն ու հայոց լեզուն եղել են, կան եւ պիտի լինեն համայն հայութեանը միաբանող-պահպանող` ի վերուստ մեզ տրուած անզուգադիր պարգեւը: Իսկ հայոց մայր լեզուն աշխարհաբարի զոյգ տարբերակների եւ մեր բարբառների հիմքը գրաբարն է: Աշխարհի այդ ո՞ր երկրը պիտի հայոց գրական լեզուների եւ բարբառների ՄԱՅՐ լեզուն, մեր լեզուական մշակոյթի անբաղդատելի գանձանակ գրաբարը մոռացումից փրկի ու վերադարձնի տիրոջը, եթէ ոչ Հայաստանի Հանրապետութիւնը... Հետեւաբար հայոց բոլոր դպրոցներում եւ ուսումնական այլ հաստատութիւններում իբրեւ հայոց մայր լեզու պէտք է պարտադիր դասաւանդուի գրաբարը, որի պահպանում-վերականգնում-յարութիւնը պէտք է դառնա հայոց պետականութեան գերագոյն խնդիրներից մէկը:
Ոչ մէկ կասկած, որ գրաբարի յարութիւնը դա հայութեանը վերամկրտելու,այն է` հայ ազգի  հոգենորոգումը վերսկսելու մի նոր սրբագործութիւն է, որն իր էութեամբ, տարողութեամբ եւ նշանակութեամբ հաւասարազօր է 301 թ. ազգովին Քրիստոնէայ դառնալու եւ Ե դարում  հայոց Ոսկեդարը հրաշակերտելու հայ ազգի տիեզերահունչ ոգորումին:
ՀՀ ամէն մի աշակերտ, առաջին դասարանից սկսած`  պէտք է մշտակայ պարտադիր դասաժամերով ըստ ամենայնի տիրապետի արդի գերժամանակակից համացանց-ինտերնետին:
ՀՀ դպրոցներում հարկ է իրականացնել կիրառական անգլերէնի խորացուած դասընթացներ, իսկ բարձրագոյն ուսումնական հաստատութիւնների ընդունելութեան քննութիւնն անցկացնել միջազգային անգլերէն ստանդարտ թեսթերով(TOEFL, IELTS):
ՀՀ  ԲՈՒՀ-երում եւ գիտահետազօտական  հիմնարկներում միասնական կառոյցներ հիմնելու եւ կրթական համատեղ ծրագրեր իրականացնելու համար անհրաժեշտ է պայմանագրեր կնքել աշխարհի լաւագոյն գիտական հիմնարկների ու համալսարանների հետ` մասնագէտներ հրաւիրելու, համատեղ միջազգային գիտաժողովներ եւ գիտակրթական ծրագրեր իրագործելու համար:

4 .Կառավարման համակարգ, սահմանադրութիւն եւ օրէնսդրութիւն:

ՀՀ կառավարման համակարգը հիմնաւորապէս բարեփոխելու իրական քայլերը հետեւեալներն են.

1.Հայաստանի Հանրապետութիւնը պէտք է առաջնորդուի երկրի  բոլոր քաղաքացիների ԱԶԱՏՈՒԹԻՒՆԸ  պահպանող սեփական արդար, ամէնքի համար պարտադիր հաւասարազօր ու անխտիր օրէնքներով ու անկախ դատավարութեամբ:
2. Երկիրը պատուհասի մէջ գլորած 1991-2011 թթ. կեղծընտիր բոլոր ղեկավարները պէտք է դատի տրուեն:
3. ՀՀ  նորընտիր Ազգային ժողովը իր գործունէութիւնը պէտք է սկսի.
ա. 100 տոկոսանոց համամասնական ընտրակարգ սահմանելու,
բ.պատգամաւորների քանակը կիսով չափ, իսկ ՀՀ նախարարութիւնները առնուազն մէկ երրորդով կրճատելու-իրար միացնելու,
գ. ՀՀ  Նախագահական  վարչաձեւը  լուծարելու եւ
դ.ՀՀ ազգային սահմանադրութիւն կազմելու համար Սահմանադիր ժողով հրաւիրելու որոշումներով:
4. ՀՀ սահմանադրութիւնը պէտք է կազմւի հայոց սահմանադրական մտքի աւելի քան  1700 ամեայ յուշարձանների հիման վրայ` անպայման ներառելով հայերիս ինքնութեան եւ ազգային գաղափարաբանութեան հիմքերը կազմող «Հանգանակ հայ ինքնութեան»  Հայ, Հայ ժողովուրդ, Հայաստան, Հայոց լեզու, Հայադաւանութիւն սահմանումները.

     Ա. ՀԱՅԸ ազգային ինքնատիպ նկարագիր, հոգեկան կերտուածք ու անշփոթելի խառնուածք ունեցող, ընտանիքը սրբութիւն դաւանող, հայերէն մտածող, հայախօս, մարդաբանական արմէնոիդ տեսակը բնորոշող, բարին, յառաջադիմութիւնն ու նորարարութիւնը ի ծնէ բնազդօրէն իր մէջ  ագուցած անհատների ՄՇՏԱՐԴԻ հաւաքականութիւն է , որը Հայկական լեռնաշխարհում բնակուել կամ բնակւում է նախամարդ Ադամի եւ Նոյ նահապետի  շառաւիղ  Թորգոմի որդի Հաբէթեան Հայկ Նահապետի ժամանակներից£ Հայ են նաեւ ազգային լեզուից, դաւանանքից, մշակոյթից, իրենց հայրենիքից հեռացած բոլոր այն հայկազունները, ովքեր չեն ժխտում իրենց հայկական ծագումն ու հայկական քաղաքակրթութեան ժառանգորդ լինելը, Հայաստանը համարում են իրենց հայրենիքը, հայերէնը` մայրենի լեզուն, հայադաւանութիւնը` ազգային կրօնը եւ բարենպաստ պայմանների առկայութեան դէպքում բնական են համարում հայութեան համախմբումը իր պատմական հայրենիքում` հայութեան կենսաբանական եւ բնախօսական բուն ՄԻՋԱՎԱՅՐՈՒՄ:

Բ. ՀԱՅ ԺՈՂՈՎՈՒՐԴԸ` համայն հայութիւնը, մեր անցեալ, ներկայ ու ապագայ սերունդների միացեալ, համագոյ ու անզատելի ամբողջութիւնն է: Իսկ մեր ժողովրդի յաւերժական առաջնորդը նրա չորսեւկէսհազարամեայ սերուցք-ընտրանին է, Գարեգին Նժդեհի ձեւակերպումով` ազգը`  Հայկ Նահապետից մինչեւ այսօր:

Գ. ՀԱՅԵՐԻՍ ՀԱՅՐԵՆԻՔԸ ՄԵԾ ՀԱՅՔՆ Է`իր տասնհինգ աշխարհներով` Բարձր Հայք, Ծոփք, Աղձնիք, Տուրուբերան, Մոկք, Կորճայք, Պարսկահայք, Վասպուրական, Սիւնիք,  Արցախ, Փայտակարան, Ուտիք, Այրարատ, Գուգարք, Տայք` ներառեալ Փոքր Հայքը, Միջագետք Հայոցը`  Մծբին կենտրոնով եւ Կիլիկեան Հայաստանի թագաւորութիւնը` 1198-1219 թթ. տարածքներով:

Դ. ՀԱՅԵՐԻՍ ՄԱՅՐԵՆԻ ԼԵԶՈՒՆ հայերէնի բարբառներն ու խօսուածքներն են, ԱԶԳԱՅԻՆ-ՊԵՏԱԿԱՆ ԼԵԶՈՒՆ` լեզուների հիմք ԳՐԱԲԱՐԸ եւ արդի հայերէնի ԱՐԵՒՄՏԱՀԱՅԵՐԷՆ ու ԱՐԵՒԵԼԱՀԱՅԵՐԷՆ տարբերակները,  որոնք Գրաբարի հետ միասին ՀԱՒԱՍԱՐԱԶՕՐ ԳՐԱԿԱՆ լեզուներ են:

  Ե. Հայերիս ազգային կրօնը ս. Գրիգոր Լուսաւորիչի հաստատած Հայաստանեայց առաքելական սուրբ Եկեղեցու դաւանութիւնն է`  Նոյ նահապետից եկող քրիստոնէական ճշգրիտ ու անբիծ վարդապետութիւնը`ՀԱՅԱԴԱՒԱՆՈՒԹԻՒՆԸ :    Հայադաւանութեան պատմահոգեբանական հիմքը Հայկ Նահապետի մեծագործութիւնն է, որով հայութիւնը մեզանից 4500 տարի առաջ  սկզբնաւորեց կռապաշտութեան եւ բազմաստուածութեան դէմ մարդկութեան հոգեմարտը: Ասել է թէ`հայերս ոչ միայն սկզբից ի վեր եղել ենք ՄԻԱՍՏՈՒԱԾ, այլեւ սկզբնաւորել ենք քաղաքակրթութեան պայքարը կռապաշտութեան ու բազմաստուածութեան դէմ, որը միաժամանակ նաեւ խղճի ազատութեան համար առաջին ազատամարտն էր մարդկութեան պատմութեան մէջ: Հետեւաբար` հայերս 301 թուականին ազատագրուելով եկամուտ բազմաստուածութիւնից, վերականգնեցինք մեր ազգային ճշմարիտ  դաւանանքը, որի  մշակն ու պահապանը Հայաստանեայց առաքելական սուրբ Եկեղեցին է: ՀԱՅԱՍՏԱՆԵԱՅՑ ԵԿԵՂԵՑԻՆ արեւմտեան եւ արեւելեան քաղաքակրթութիւնների խաչմերուկներում հազարամեակներ շարունակ մարտնչող ՀԱՅԿԱԿԱՆ ԻՆՔՆՈՒՐՈՅՆ ՈՒ ԱՆՇՓՈԹԵԼԻ ՔԱՂԱՔԱԿՐԹՈՒԹԵԱՆ խտարանն է, համայն հայութեան հոգեւոր միասնութեան վէմը, հայ ազգի ՀՈԳԵՒՈՐ ՀԱՅՐԵՆԻՔԸ, որը հայոց պետականութեան հետ ՄԷԿ ԱՆԲԱԺԱՆԵԼԻ ԱՄԲՈՂՋՈՒԹԻՒՆՊԻՏԻ ԿԱԶՄԻ, ինչպէս հոգին ու մարմինը:

Զ. Հայադաւանութեանը ներհիւսուած է Հայկ Նահապետի հիմնած, Հայոց Ոսկեդարում ս. Թարգմանիչների, ս. Վարդանի եւ Մամիկոնեանների համակարգած-յետագայ դարերում լրացուած եւ Ի դարի առաջին կէսին Գարեգին Նժդեհի ու իր գաղափարակիցների վերականգնած, ամբողջացրած, զօրացրած ու նաեւ ՏԱՐՕՆԱԿԱՆՈՒԹԻՒՆ անուանած հայոց ինքնապաշտպանական համակարգը` ՈՒՏ ՄԱՄԻԿՈՆԷԻՑԸ:

  Է.ՀԱՅ ԱԶԳԻ ԸՆՏՐԱՆՈՒ ՆՊԱՏԱԿԸ եղել եւ մնում է երկրի  բոլոր քաղաքացիների ԱԶԱՏՈՒԹԻՒՆՆ ապահովող սեփական արդար ու անխտիր  օրէնքներով քաղաքական, բարոյական  ու տնտեսական շահագործումներից զերծ պետութեան մէջ իր ազգային դաւանանքի ու մշակոյթի միջավայրում բարգաւաճելը` ի կատարումն եւ ի խնդիր  հայ ժողովրդի գերագոյն բաղձանքի` ՀԱՅՐԵՆԱՏԻՐՈՒԹԵԱՆ:

Ը. Հայութեան համազգային նպատակներին հասնելու ճանապարհը Հայաստանեայց առաքելական սուրբ եկեղեցւոյ նուիրագործած` ս. Օգոստինոսի հետեւեալ բանաձեւն է. ՄԻՈՒԹԻՒՆ` Ի ԿԱՐԵՒՈՐՍ, ԱԶԱՏՈՒԹԻՒՆ` ՅԵՐԿԲԱՅԱԿԱՆՍ, ՍԷՐ` ՅԱՄԵՆԱՅՆԻ

(Կարեւոր խնդիրներում` միութիւն, վիճելի-թէական հարցերում` ազատութիւն, ամեն ինչում`սէր):

Ը. Մամիկոնէից Տարօնականների  ԱՂՕԹՔԸ

ՏԷ'Ր  ԱՍՏՈՒԱԾ, ՓՐԿԵԱ' ԶԱԶԳՍ ՀԱՅՈՑ ԵՒ ԺՈՂՈՎԵԱ Ի ՀԱՅՐԵՆԻՍ ՄԵՐ:                                  ԱՐԺԱՆԱՑՈ' ԶՄԵԶ ԼԻՆԵԼ ՏԷՐ ԱՂՕԹԱՏԱՆՑ ՄԵՐՈՑ, ԳԵՐԵԶՄԱՆԱՑ ՍՐԲՈՑ ՄԵՐՈՑ ԵՒ ՇԻՐՄԱՑ ՆԱԽՆԵԱՑ ՄԵՐՈՑ: (Տէ'ր Աստուած, փրկիր հայ ազգը եւ ժողովիր մեր հայրենիքում, մեզ արժանի արա տէր կանգնելու մեր աղօթատներին, սրբերի գերեզմաններին ու նախնեաց շիրիմներին) : 

1989- 2011 թթ.  ՌԱՖԱՅԷԼ  ՀԱՄԲԱՐՁՈՒՄԵԱՆ

---                

ՅԱՒԵԼԱԳԻՐ.   Ազգային  միասնութեան ուխտ կուսակցութիւնն ամբողջովին ընդունել է սոյն ծրագիրը եւ պատրաստ է մասնակցել ԱԺ ընտրութեանը:  Առաջարկւող ծրագիրն ընդունած ունեւոր անձինք  յորդորում եմ հոգան ընտրապայքարին պաշտօնապէս գրանցւելու համար կուսակցութեանն անհրաժեշտ ծախսերը... Օգնել ցանկացողները դիմեն.  հեռախօս` 093.840.342, գրասենաեակ` 589.431,  E-mail: hmbrafael [ a t ] gmail.com, հաշուեհամար`   Erevan, ARDSHININVESTBANK, Hambardzumyan Rafik, դրամ -  2470100 85873  0010, դոլլար($)- 2470100 85873 0020 :

2012 թ. մարտի 14



Armenian, Assyrian and Hellenic Genocide NewsArmenian, Assyrian and Hellenic Genocide News


Do you have any related information or suggestions? Please email them.

Armenian, Assyrian and Hellenic Genocide News