In reply to message #0
10 Meqëm mu Sayfo, bu Sayfo, bëṯër mu Sayfo, mën hawi b Mëḏyaḏ? Hano dlo kloyo, dayëm karëxno d howe maḏco acle. Mena lëno w mena ste luxatu... Adyawma b iḏayna maḏco cal hawxa kit, amma klozëm u cwodo dlë kole, maltëmina heš zëd mawxa. W kit heš ǧalabe maḏco dlë kuḏcinale. *** 2 ţëbbax 1914, i dawle, rasmi clëmla gëd maltëmo Safarbarlëk. Bi ẖarayto dan 1914, yarẖo d aylël, tëšrin-qamoyo, ẖaroyo b Mëḏyaḏ w bu Ţuro ste bde bu tëltimo lu Safarbarlëk. Manẖatte nëqqara w zërnaye. An noše b fëşẖo kmitašmëci. B raqḏo, kef, hëlholo, zmoro,.... Taqrib b kul qaţlo d hawi, hawxa bi qamayto mosiqa kmidëq, bëṯra koṯe qaţlo. Mede cajobo, lo şëroyo w lo armënoyo l bole xayifo lë koṯe cal hawxa mede d hawi më meqëm!.. Baq qëbole d sëmli cam şëroye mi Rayëţe, Ţuro d Izlo, Ţuro Cloyo këmmi: Më Mëḏyaḏ H̱anne Safar, mšayacle caskar l gabayye, bu zor maltamme gawre lu Safarbarlëk. Amţanne maşre l Mëḏyaḏ li şaraye di ẖkume. Më Mëḏyaḏ w maq qëryawoṯo, qëm i şaraye di ẖkume b Mëḏyaḏ layëm cël më 2 alfo rëẖwoṯo d gawre, kulle maşre bë ẖḏoḏe. Yacni këmmi u dawro maţiwo mi şaraye w hul lab bote Bë-Skano cal u darbo d Karjos. Hawxa qlici malxone l H̱asno, bu asas azole l H̱asan-Qalca naqla ẖreto b halxo. I naqla d maţën l H̱asno fayiši 500. An nëţuro d rišayye caskar, kmaydi qëflo b qëflo mi ẖarayto du dawro, kquţlënne. *** Bi badaye d 1915, bdele koṯe noše l Mëḏyaḏ. Niše, gawre, nacime,... kmaẖkën cal u qaţlo d hawi bad dëkoṯo dë ţralle. Bë-Hërmëz ftëẖẖe ab bote d këtte lan nošani, ẖwanne l gabayye. Kubanne mëklo, štoyo, ẖëmoyo,... Bu zabnano, b Mëḏyaḏ ar riše maẖësse kit mede? Gëd howe mede? Raǧam da problame d këtwo baynoṯayye, qadiri d laymi bi cito di Mort Šmuni bu sër. Harke, rwiẖo mëžǧalle cam ẖḏoḏe. Ymalle cal u Mgalyën gëd mcawni ẖḏoḏe w lë kowe d mëfqi u sërrano l larwal. Mid qarar: Bë-Hërmëz gëd šuqli barud w tfënag. Gëd misëm siyoǧo cloyo lë ẖḏor d Mëḏyaḏ. Kul gawro b Mëḏyaḏ gëd misalëẖ. Bë-Hërmëz xayifo bdalle d saymi calaqa lašan d šuqli barud w tfënag më larwal. Amţalle, maẖtënne gabayye ba mcare w ban axorat d këtte taẖt mu bayto. *** Azze šabṯo aw zëd cal u knëšyo d hawi bi Mort Šmuni. B Mëḏyaḏ u qaymaqam hawile xabro bu knëšyo sërri d sim, l noše şëroye më Mëḏyaḏ, huwwe xbariye cal u knëšyo. U qaymaqam qrele l H̱anne Safar d oṯe l gabe, aṯi. Mërlele: H̱anne Aǧa! An armënoye qayimi cal i dawle, acmayye ak katolik w ap përuţ ste... I dawle ucdo bëṯre d hani këzza, hatu aclayxu mede layt! H̱anne Safar, hawi mamnun. Nafëq w malaxle b darbe.
|