1
hano
qay nošo latle kritik?
kmaẖtitu bolo lawxa!
ẖuru yabo!
ëno dlo qëşoro
kẖuzetu, harke w tamo, ksamno
2
aẖuno! ẖoṯo!
këmarno këtlan meẖo
yëlfina w mawlëfina
aydarbo mene mẖalqina
cito, citonoyuṯo
maḏhab, maḏhabtiye
Bardayşan
Ţiţyanus
Afrëm
Nasţur
Yacqub
Marun
...
noše faylasufwën.
3
aẖnone! aẖwoṯo!
šato kamëlto kfayto
kṯowo mënyo?
qrayto layto!
maraq
ẖšowo
bëwobo
camlo
cwodo
...
Alo qumayna kit
yawme, šabe, yarẖe
mëstaqbël!...
ma b şucre, b ruqe, b ǧëbën
kowe?
hano qat, lë kmëžǧëlina!
4
këmmina:
aşlan layt lëzum,
ma mën mbaẖsina?
hani tam 2 alfo šne
hawxa msalena w macëšina
ma lo basla!
ema bodina mënfoşina?
nuţrina 2 alfo ẖrene?
ma hawxa ţaw gëd howina?
1
dayëm ...
caşino caşyo
b xabro ëšme
Šrolo!
më iḏi
më femi
më lebi
më meẖi
më hawni
hano, lë marfeli!
2
cayn xu başmoro diqo
hawo d fayëš l colam
w colmin
cal u qayso şliwo
hano, lë kmëţce!
l colam ste
w l colmin ste
tamoyo!
3
hano sidi, huwweyo
quwwe d nëbco
ba mëqqa aṯi mene
bëşuşe
lahbe
gëmre
ihuḏe
kulle, b gawi nuro!
4
Accccaw ẖannëka!
haqqa zabno yarixo
Aloh cajobo!
lawët qaţmo
w ţafët!
5
Yabo hanowe darbo
ucdo ste, ramẖël ste
haka këbcët
bahro b dukṯe d cëtmo
qum! cayn xi ẖayye
šlaẖ galdox!
mǧayere b ẖaṯo!
balki cëtmo, jahale, samyuṯo..
qëlbo l mede ţaw!
1
ucdo ...
Bë-Xalaf, Bë-Sacido,...
Cito, Mtakazto, Carabke’ma,...
bayto d mërre “kit”
huwwe latwo,
aẖuno!
Aloh këlle hayëd!
maẖëtwolle sëllam,
sulqiwo buwwe ...
layko? ...
eee layko hatu azole?!
aẖuno!
Aloh l cëlmo du halak!..
toxu laẖ ẖorikat! kulle b zoţëkat!
e, e, hawxa ste baš’yo!
ma xwarzo!
hawxa, latyo ţaw mëd layt!?
2
Mtakazto ...
b riša Mahdi Gabriyel Afram
maţi l falgo bu sëllam
omër “palaaaaq!”
nafël cal qadre d ẖaşe,
maye ste l riše lë maţi
caršone aṯën b šeno
bac cayno ţër lë ẖëzyo!
b mën ẖal! way këdo!
3
ay gidi zamano!
golëke faẖël!
Arsane mala Arsan!
hawi ţawro! masëwle!
niro, abzoro w masoso ste
haw kmanfëc!
ayyyy gidi rënjat!
fayšitu dlo maye d ẖaşo?!
ba gëmṯo!..
aydarbo gëd zaydat?!
ma nošo lo mërlelax!?
4
ba Mtakazto!
këtwola Gaboro!
mala diyata Gaboro!
b Hënd w b Sënd!
ẖašowo d kalla acle,
Aloh latwo!
e, e aẖnone!
toxu laẖ ẖabuškat!
kulle şpahi w semoqene!
xulu w maru!
moryo mẖasen!
Aloho mẖasele!
1
koṯe ǧalabe kayiso l boli,
gëmṯo, mën masalewa,
i naqla d fahëmno
ẖzeli qumi kit, baẖër d maye
rabo, yarixo, rwiẖo, šalqat,...
bac mën d umarno?!
cayno, ǧer më maye, mede
ẖzoyo lë kẖëzyo, zayëcno
lu gabo ẖreno, aydarbo ëzzi?
mdarqël b meẖi, kalino.
2
ẖzeli kubacli qayyëke...
mayko kmiqafyo, kit aw lo?
de toxu marulli d uḏacno!
maţili šira d ẖawro
mërle: aẖuno ţaw mede, qum!...
zox gab Skandare Bë-H̱attina!
azzi l side,
“Šlomo cammo Skandar!
ẖaylox Alo!”
madcarle:
“ahla w sahla Jan!
alo ubelox u ẖaylo!
xeryo?!”
3
madcarli acle:
“ašër xeryo, kubacli qayyëke!
ma kibox saymatli?”
mërle:
“abro Jan, ẖur bi dëkkano!
gazëkat lẖuḏe kibi samno!
haka d rëẖmët, kibi samnox
gazëke d mažbëho l qayyëke
këbcët?!”
kalino ...
dacër acli:
“haka sëmoli, kibox biyya
quţcët darbo huuuul
Camariqa!”