In reply to message #0
4 Adday w Aggay, aṯёn lu Ţuro, acmayye bu qurco këtwolle bёšra l falsafe dë Mšiẖo. “... Toxu hwawu suryoye!” Maḏco adyawma d këtlan, bu zabnano, lo l nošo mërre w lo l nošo ste mbaẖasse hawxa xabro. Mamro waẖido d këtwolle, “... toxu hwawu cam Mšiẖo’we!” Acmayye këtwolle, kṯowe, kṯawyoṯo b yawnoyo cal Mšiẖo w cal falsafe d këtwole Mšiẖo. Bu zabnano heš falsafe dë Mšiẖo lë cabërowa l lišono d Urhoy. Bu Ţuro, l lišone d këtwo bu Ţuro, lašan noše d fëhmi, tërjomowa propoganda d këtwolle. Bu zabnano an noše fëhmiwo, fahëmiwo aclayye ‘tam’ maḏco latlan. Bas mede kayiso dë kmiḏëc, bu Ţuro mšiẖuṯo xayifo lë mbarbëzo. Sahmo rabo man noše fayiši, şuğḏe-şalme. Hani mën wayye, man wayye, kit kṯowe mu zabno du arkeoloji, kul man d obëc kibe korëx aclayye w yolëf. Bu Ţuro, cal d nafëq antikat, kṯawyoṯo, kefe,... ẖaṯe, kmaẖwe këtwo xabro d şurayt. Hano darëjwe. Cal d këtwe darëj cabër b qëwole w hën kṯawyoṯo. Hani Robert Rollinger, The Terms “Assyria” and “Syria” Again, Journal of Near Eastern Studies, Vol. 65, No. 4 (October 2006), pp. 283-287, cwëdle w kṯёwle cal ẖḏo mënayye. Bu zabno d qumayna, bam momo gëd nofëq mëdone ğer ste. Hano latyo mede cajobo! La’an ay yaḏoce dlo kloyo kcёwdi... mu cwodo d kuwalle ste, kmašmëci cëlmo w kobi maḏco b mën laqën w mën ẖzalle. An noše d këtte rёğgo l hawxa, kkurxi... bu kroxo ste b mede d laqën, kquralle. Hawxa kyëlfi, mën nafëq w mën lë nafëq l ẖolo. *** I naqla šato BM d maţyo l ẖarayto d 100 w qalibo, sahmo bu Ţuro mšiẖoyowe. Heš cito, dayro,.. bnoyo lawi. Hani bёṯёr aṯёn. Bu zabnano, hën b talyo w hën ste ba cmarat d këtwolle d şuğḏe-şalme mšabẖiwo l falsafe d këtwole Mšiẖo. Kuḏcina ğalabe kayiso ste, bёṯёr i naqla camo d Ţuro maqbele Mšiẖo, mšiẖuṯo maqlable ab bënyone d këtwolle d yawme d şuğḏe-şalme. Mor Gabriyel, Dayro d Zacfaran,... hën mënayyene. I naqla d hawina mšiẖoye, ğalabe cadat catiqe, malaxxe acmayna. Hani sahmo mënayye, an noše d aṯёn mu Ţuro kuḏcënne. Hën mac cadatani, cito mëncila ste, camo lë ţralle! Maṯlo l hawxa, siyomo d ẖarše, b mëštuṯo qëm ẖaṯno w kalo nuro bë ftilo... Aṯina l Awruppa, nošo mënayna b Awruppa dlë kёṯawwe, gëd mëţcoyi! Hano folklor d camo’yo, kul camo ste këtle hawxa folklor!
|