In reply to message #0
7 Aẖnone, Aẖwoṯo, Harke, kmaẖtitu kulxu bolo, dlo kloyo kkёṯawno. Nošo mënayxun, këtle ẖiyërto, kritik, tëzido,... latyo caybo, harke hawulle. Ëno ste, cayn xëdwoṯayxun kqureno kṯowe mšakle, kyulafno w bёṯёr kfëlağnole harke acmayxun. Bam momo noše b lebe kit d koṯёw, më sidi mamro: Kṯawu! *** Mede d maţino, haka ğalţono, kṯawu!... Cito b Ţurcabdin, b falge dan 1300, hul dë fliğo w sëmlala b šato 1364 faţёryarxo qamoyo (iğnaţiyos Sobo, 1364-1389, Şalёẖ) l ruẖa, heš xabro ‘suryoyo’ latyo cabiro b Ţurcabdin. Bu zabnano, kit ğalabe citawoṯo, dayre banye, kulle aclayye ёšmo d qadišo aw d qadёšto kṯiwoyo. Haka qadišo, be maykoyo bu aşёl, kṯiwo kowe cal cito. Maṯlo, haka më Mawşal w lë ẖḏora’yo, kṯiw “... oṯuroyo” acle. Haka mu Ḫabaš’yo kṯiw “... ẖabašoyo” acle. Cito b Ţurcabdin, sëmlala faţёryarxe l ruẖa, hani kulle rize w mşanfene bë kṯowo d Tarix d Ţurcabdin, kṯёwle Afrëm Barşom, faţёryarxo, heš huwwe dayroyo b Dayro d Zacfaran. Hano kit b urhoyo, b carabi, b tërki w bu ingilizi. Cito b Ţurcabdin, zabno yarixo, cal cito, b cito xabro ‘suryoyo’ lë kmëstacmëlo. Sida b kul dukṯo d kit kṯowe, kṯiwi b Urhoy aw b ğer walaye rabṯo, kit bënne xabro ‘suryoyo’. Hano qay bu Ţuro lë naẖёt bayn d camo, kobëc mëbcët acle! Hul aẖna d aṯina l Awruppa ste b falgo d 70’yat, hul ẖa d lëzzewo l cito, më femo d kohno aw šamošo šamёc xabro ‘suryoyo’ noše hano lë mëstacmele. Baq qëryawoṯo, nošo b feme stëcmal l xabro ‘suryoyo’ latwole. B dukṯe şuroyo, şurayt camo mëstacmalwo. Hano, dlo caksiye w dlo mqarrasiye, klozëm mi naqëš w mëbcët acle. Dlo hawxa saymina, sabab d kit aw d hawi, mënyo, aydarbo kiban yulfinale? Haka këtxu darbo ẖreno, marulle! Bёṯёr ğalabe mak kuhne, kit kṯowe kṯiwe cal hawxa, këmmi: Xabro ‘suryoyo’ b macna yacni mšiẖoyo’yo. Hal hano, bu asas šroloyo aw lo? Këtxu ray, fëkër, maḏco, ylofo,... kṯawu!
|