In reply to message #0
Qliḏo d lešono
– Xëzna b Urhoyo men
Dayroyo Yoqën, Dayro d Mor Awgin, Ţur-Izlo. B masale d lišono, xëd camo, qimena cël më gliḏo ţwiro … ha-ha kǧayrina taẖt mam maye. Mën saymina? Nošo račeta lë kmanţe! Sabab? An noše d këmnaqši, kulle, i masale kmaydila b masale d barbariye l iḏo. Hawxa kşuxri qëm darbo d nëqošo w kritik. Kmolën qatore w kmayli l xaşra. Hedi knuţri, kulle laşye, hul d nofëq bala ẖreno ẖaṯo l ẖolo. Ëno ste këtli kritik lu cwodo d hawi. Bas u kritik diḏi, abadan latyo qimo, qay kaṯowo sëmle hawxa cwodo? Bu caks, kumarno dayëm w kubacno ste dayëm d howe zëd mawxa cwodo!
Ma qay lo? Dayroyo Yoqën, b masale d lišono maḏco, huwwe ste taqrib xëd ac citonoye d këtlan, ele lišono d kit w d layt: Urhoyo’yo. Hano, adyawma cal foṯe di arco, kmo mëžǧëlone këtle b 24 sacat d yawmo? W lo ẖa! Urhoyo, këtle camo b ẖaşe? Lo!
Dawla? Lo!
Cito? Lo!
Bac l manyo? Lë kuḏcina! *** Aẖnone, Aẖwoṯo, Kuḏac u šrolo mayiroyo, bas klozëm d yulfina dayëm d ëmminale. Lë kowe d zaycina mene. I naqqa d zaycina gëd qolëb aclayna kewo dlo darmono. Mawxa muhim kẖuzeno d ëmminale. Nuqţo 2- dayroyo sëmle hawxa Xëzna, šaqole kmone? Haka nošo ǧer meni këtle maḏco, raja harke ţro umarle. Harke bu Face, noše d këmmi w d mërre “cafarëm!” l dayroyo, kmo kṯowe šqëlxu mene? *** An noše d nafiqi b Assyriatv, xëd kuḏacno l ǧalabe noše, hani ste kayiso kuḏacnën. Mënayye Caziz ẖawšo, kaṯowo şëroyo – madënẖoyo, macërboyo – këtle kṯowo, frësle kṯowo d loqe buwwe dlo mamro kšuqele. Kṯowo d dayroyo Yoqën, l qul cayni ẖzeli šqile. Xëd kul naqqa d komër mërle: Klozëm mcawnina kul kaṯowo d këtlan, dlo aydarbo gëd maciši i marduṯo d këtlan. Caziz latle yëlfono d univarsita b kise, elo këtle lebo mparpëţo lašan hama d huwelan mede ţaw mëd këtlan. Haṯe ste mu lebo ksamla! Awgin Be-ẖaninke kaṯowoyo, mede ţabici gëd mcaqëb a kṯowe dë kmëfrës, ma hawxa dlë soyëm aydarbo gëd mazëd maḏco d këtle lašan kṯowo ẖaṯo? Këtla ëmkan? Lo! Eliyo b Göteborg kowe, haqqa maḏco latli acle, mawxa harke b dugle laybi umarno mede. *** Han naqqa uṯeno lu kritik asasi d këtli ... Bu ray diḏi, dayroyo Yoqën d maẖëtwo haqqa tacbo cal şurayt ţawwe, kulan rabe w nacime gëd huwewolan stifada ţaw. Mën xabro d manẖatwo, cam šroẖo b şurayt, gëd huwewo zangana w xëzna l lišono d emo d këtlan. Hawxa lo sëmle, maḏcafle eman! Ţëryole mpartakto. Harke kẖuzeno, tacbo tëẖito cal urhoyo, dlo macnawe. *** Xabre d këtte macna b tarix, joǧrafya, falsafe, ẖšowo, dino, arco, šmayo,... haka kaṯowo latle yëlfono d madrašto clayto, dlë cobër bënne ţaw kẖuzena. Walaw harke kmo faqqa, kamţën marke w mtamo “hë këlla! ẖzawu b caynayxun! ... flan ẖa hawxa komër, ẖreno hawxa komër ...” lë kmadël cwodo d yëlfonoyo. Bar-Bahlul aw ǧer më Bar-Bahlul cal MM (Meqëm më Mšiẖo) b cayno d şuǧḏe-şalme ẖërre. Kulle l dino ẖaṯo dëžmënwe. La’an l tamo dcoro lëbciwo, huwwolën tark diḏe. Adyawma 2017, aẖna ste hawxa ẖayrina bu zabnawo? Ëlla lo? Kmaẖtitu bolo an noše da 30 hawxa kẖayri bënne, ucdo ste cayn xëd meqëm d sëmme kmaẖrëwënne w kţëwrënne.
Aẖna ste hawxa saymina? Haka këmmitu: E!
I naqlayo mën frišuṯo kit bayn laẖna w lënne bi masalaṯe? Kubac kul nošo dlo zëcṯo w dlo nëkfuṯo, d koṯëw u ray w u fëkër d këtle harke.
| 
