- Part 1: Kritik aw nqodo: Qay kmisëm? Hano klozëm? Aw lo?,
Jan Bet Sawoce
 , Dec-17-2017 at 11:22 PM, (1)
- Part 2: Kritik aw nqodo: Qay kmisëm? Hano klozëm? Aw lo?,
Jan Bet Sawoce, Dec-17-2017 at 11:24 PM, (2)
- Part 3: Kritik aw nqodo: Qay kmisëm? Hano klozëm? Aw lo?,
Jan Bet Sawoce, Dec-17-2017 at 11:26 PM, (3)
- Part 4: Kritik aw nqodo: Qay kmisëm? Hano klozëm? Aw lo?,
Jan Bet Sawoce, Dec-17-2017 at 11:27 PM, (4)
- Part 5: Kritik aw nqodo: Qay kmisëm? Hano klozëm? Aw lo?,
Jan Bet Sawoce, Dec-17-2017 at 11:30 PM, (5)
|
Jan Bet Sawoce
   
Member: Sep-14-2011
Posts: 448
Member Feedback |
Dec-17-2017 at 11:22 PM (UTC+3 Nineveh, Assyria) |
In reply to message #0
1 Maṯlo komër: danwo lašan d howe qimo, čak, mën kobëc siyomo… Qamayto gëd ubeno maṯlo mu ẖaywan, aydarbo ksoyëm lašan d maẖwe ruẖe qawyo w ǧer mene b quwwe, nošo akjar layto lë ẖḏore! Cël mi qalto, i naqla d howe ẖa zoǧo lẖuḏe, b ẖiruṯo, ema d obëc ksolëq cël mi qalto, tamo krofës b raǧloṯe zawlo më xaşra li ẖreto, hul d boṯël, bëṯër kkole. Kmaqëm danwe čak w kqore... naqla, tarte, tloṯ,... bëṯër më ẖḏoḏe. Nošo mqabël diḏe cal d layt, ak këṯoṯo, rahoţe koṯën l side. Kborëm aclayye, ksolëq cël më ẖaşe dë ẖḏo bë ẖḏo, këmfaše aclayye, këmbasëm lebe. Cayni mede, kalbo ste, i naqla d kowe lruẖe, kmacle danwe, kmaqëmle čak w knowëẖ... hul d boţël! *** Aẖna ste, b Awruppa taqrib hawxa sëmlan b šëwolo du kritik. Këtwolan mgale, gabe,.. darbo ǧer mu fëkër d ruẖayye l nošo luwwe. Ucdo ste këtlan ţboco-froso, gabe,... cayni mede ksaymi, darbo ǧer më ruẖayye l nošo, lë kobi! Hano ǧalţoyo!
| |
Alert IP |
Print Edit
Reply
Re-Quote Top | | |
|
Jan Bet Sawoce
Member: Sep-14-2011
Posts: 448
Member Feedback |
Dec-17-2017 at 11:24 PM (UTC+3 Nineveh, Assyria) |
In reply to message #0
2 Maṯlo komër: I naqla laymun d mëcşër cël mi ẖalawe, mën ţacmo kowe bi ẖalawe? Aẖnone w Aẖwoṯo, Kit šëklat dë kritik. Kritik lë kṯowo, kritik l siyase, kritik l nafšo... Kaṯowo aw kaṯëwto, i naqla d këṯwi kṯowo, knuţri dayëm d howe kritik; pozitiv w negativ. Han naqqa harke kfoyëš cal stediye du kritik ...lu kṯowo hën kmaydi stil, hën lišono, hën fëkër, hën u qşido d gawe,... Kul ẖa b šëkël, këmzangini kul xaşra d kit gab u kaṯowo... Mëqqa basimoyo aẖna d huwelan hawxa mede! I naqlayo u maṯlo d lalcël, koṯe l dukṯe, i ẖalawe mijarëb d mitaẖët acla ǧer ţacmo ste ... hano latyo ǧalţo! *** Kritik siyasi ... hano kfëlaǧnole lë tre fage, ẖa l dëžmën, hano ste ẖanak d lowe buwwe, kobëc gawe d hawxa kritik howe malyo, mamro kibe ẖaq! Maṯlo, i naqla d saymina kritik dawle d Kamalo... harke gaẖxo w faqşa layt! Nafas ste d oṯe mënayna, lë kţurena d maydo. La’an këtlan acma tarix yarixo b admo, ḏëlëm, ẖiyoko, qšoco,... mi arco d emayna w babayna. Harke, b foṯa gaẖxo abadan lë kmëgẖëx... yacni u kritik gëd howe buwwe ideoloji, falsafe siyasi, tarixi, joǧrafi,... hano ẖaq diḏan mqadšo klozëm d uḏcinale. La’an këtlan acma qale ţfoyo latla! W lë kuwela! *** Kritik da tre harke, kowe l gabe w tukoze d këtlan... W lo ẖa mënayna, l arco, kamilo më kul mede, hawxa arbco-arbco laṯi! Mawxa klozëm d ubena darbo lu kritik, lašan d fëhmina w mafhëmina masale d këtlan kayis lë ẖḏoḏe. Yacni gëd huwena caks w mqarras b ǧalţo, i fayde mënyo? Ma lo klozëm d minaqšo? Haka mşacarlan, haka rëqlan cal ẖḏoḏe, haka ǧbënina më ẖḏoḏe, i masale kşëfyo? Ëno këmarno: Lo! Dayëm ste gëd ëmarno: Lo! Klozëm d howe gab kulan jaşara d ëmmina: Lo lu ǧalţo! Duwal kuwalle siyase ǧalţo, knëfqi qëm du cëlmo d këtte, dlo nëkfuṯo, këmmi: Sëmlan ǧalţo, kţëlbina šëbqono! *** Kritik da tloṯo, b gawe d šutoso, gabo, ẖuḏro,... ẖawrone kuwalle ǧalţe, mede ţabici, klozëm mënqodi b axlaq d ẖawruṯo. Kul nošo kibe soyëm ǧalţo b maḏco aw dlo maḏco. Hawxa ǧalţe, b kaft w laft, bam momo šroyo lë kuṯalle. Harke klozëm d howe noše ẖakime b caqël d šorën hawxa šëwole. I cade hawxayo, dlo u šutoso cëmre kowe karyo. Aẖna, harke b Awruppa, hawxa sëmlan?
| |
Alert IP |
Print Edit
Reply
Re-Quote Top | | |
|
Jan Bet Sawoce
Member: Sep-14-2011
Posts: 448
Member Feedback |
Dec-17-2017 at 11:26 PM (UTC+3 Nineveh, Assyria) |
In reply to message #0
3 Maṯlo komër: Aẖuno cwijo yëtwina, amma msawyo mëžǧëlina. Zawno yarixo harke bu Facebook, nafëq nqodo mšaklo; pozitiv w negativ cal kurmanj, gabe d kurmanj w cal Suriya. Nëquşo mtaneli, bas qreli sahmo rabo mu mede d nafëq harke. ***
Lebayna, tarixi jriẖoyo, mene admo, hul ucdo kloyo lë koḏëc mënyo, më foṯe di ţayuṯo. Ayna zabno, ayna doro, ayna yawmo,... d ẖayrina, këtlan samo mena, la’an grëšlan ǧalabe-ǧalabe mena. Hul larke kibi d fëhamno, an noše d këtlan, xaşaţan calaqa d latte b siyase w b maḏco d siyase. Kẖuzena haṯe normal! La’an baẖ ẖaye kṯowo lo cal ruẖayye w lo cal ǧer më ruẖayye, hawxa noše lë qralle. Bu bayto mën šamici... cël mënayye maẖëtte ţacno d şucre w ruqe xëd bëharat w tamo kalën. Bëṯër? Bëṯër ste Alo rabo! Huwwe, b iḏe, gëd qorëf qḏolayye! Ma hawxa hawi? *** Aẖnone w Aẖwoṯo, Mede më qëm ruẖe, mahwo, zaẖmeyo d howe! Hano pransib d ţabicayo! Sëmxu mede, mẖaḏarxu, cwëdxu, mëftakarxu,.. amţalxu l ẖaye? Hano kowe! Mede ẖreno më qëm ruẖe, lë kowe! Yalëfina mi cito, la’an bu tarix, hiyya mašëǧla meẖayna b mamro: Dcawu w mşalawu w nţaru l Alo d obe! Kulxu kẖuzetu, Alo mede luwle! Aẖna yawmo cal yawmo naqëşina, u dëžmën yawmo cal yawmo zayëd! *** Këmšayalno harke l ẖawrone d maclalle Suriya, Baššar, u babo w u Bacaṯ l parriyat di šmayo ... Meqëm mu ẖarb d hawi b Suriya, b Suriya man majrowe samwo (mëžǧalwo) mede mqabël d ǧalţo d këtwo mi ẖkume? Baẖ ẖabsat mëqqa këtwo siyasiye ẖbise? Mani mëqqa nafiqi l maẖkame w ẖkimi lašan siyase d këtwolle? *** Man kit ǧer mag gabe kurmanj, muxalëf mqabël dë ẖkumat b Tërkiya, bu Iran, bu Cëraq w b Suriya? Ak kurmanj latne malaxe d šayno, gëd misomi kritik, kritik ste siyasi, tarixi, joǧrafi,... Harke aẖna mën sëmlan? Hano, kubac mnaqašne acmayxun!...
| |
Alert IP |
Print Edit
Reply
Re-Quote Top | | |
|
Jan Bet Sawoce
Member: Sep-14-2011
Posts: 448
Member Feedback |
Dec-17-2017 at 11:27 PM (UTC+3 Nineveh, Assyria) |
In reply to message #0
4 Masale d Dawronoye, dë Mtakazto,... kubac d ţurena l bëṯër, kmëtmaneno, kul nošo d këtle mamro, maḏco,... d cobër, bas ẖa mede, huwena raẖuqe më masale d şucre w ruqe. La’an masale d siyase, masale d şëncayo, lë kowe d macbërina l gawa barbariye d aǧa w qašo, d cëbro, kowe mena xşara, w hawilan hul ucdo mena ǧalabe-ǧalabe xşara w ḏarar! *** Gabayna qroyo dë kṯowo, më zawno mẖarmoyo, maţi l darǧo, ëšme ẖatta haw këbcina d šëmcinale! Han naqqa aydarbo malxina la-qëddam? B cayne samye? Aẖnone w Aẖwoṯo, Li cito, heš may yawmoṯo qamoye di mšiẖuṯo, bë stediye, b şënca,... hedi-hedi cal iḏo d Aprem Suryaya (Afrëm Suryoyo), marẖëqina mi qrayto d cal cëlmo, mi kṯawto, mu ylofo, mu caqël w mu mëstaqbël d luzamwo howe b iḏayna... Fayiš b iḏo d cito w d kuhne d maqëmla, layko maţina? Kumarno qay mazlo l gab qoḏe lë kobëc?! Aw hatu mën këmmitu? Qumayna ţre bas, cito mën këmmo! Hano ste bas b mamro, më maḏbëẖo d cito, më femo d kohno, lo më femo d cëlmoyo! Hawxa ftiẖi tarce du aṯro cal qadro d ẖaşo l haroše carab, kurmanj, tërk, moǧol,... b zabno këtwolan demografi b malyune, ucdo, kuxo d këṯoṯo ste lë fayëšina! Qay? Bi cito, cayn xëd mërlalan; dcelan, mşalelan, şayëmina, tayëbina, maşlawlan, mëşţacraflan,... W naţërina Alo d marẖëm aclayna w huwwe b iḏe d ţowër qḏolo d qaţolo w dëžmën d aṯi aclayna! Adyawma šato 2017, ma hawxa hawi? Haka kit nošo d omër: e! Maru! Lë minakfitu!
| |
Alert IP |
Print Edit
Reply
Re-Quote Top | | |
|
Jan Bet Sawoce
Member: Sep-14-2011
Posts: 448
Member Feedback |
Dec-17-2017 at 11:30 PM (UTC+3 Nineveh, Assyria) |
In reply to message #0
5 Aẖnone w Aẖwoṯo, Maţina l ẖarayto d šato ẖreto... Meqëm d cubarno bu mede d kubac maẖkeno harke, xëd kul ẖarayto d šato, kmëtmaneno l kulxu: Ceḏo d mawlodo d moran w rišo d šato ẖaṯto, brixo! Saṯwoyo, cal arco kit talgo, gliḏo, galaḏ, maye, nuqre, cëllat w tëllat bu darbo, qloco b caqël qlacu, malizo, xayifo, b dewuṯo, b aẖmaqiye, b čiz, b ẖëngaliyo,... lë qulcitu! La’an b hawxa ẖale, balki şaniye lë gorëš šqolo d ruẖo w mazlo mu cëlmano. Yacni yawme d fëşẖo d kit, b iḏayxun lë ţuretu d howën yawme d caza w baxyo. Haṯe b iḏayxunyo! Latyo b iḏo d Cëzro! *** Bi šato ẖaṯto, haka këbcina d huwelan ẖale kayis, kobëc d qurena kṯowe. Yëlfina w mawlëfina ab babayḏan mën sëmme laẖna? Bëṯër mënayye, aẖna mën sëmlan l ruẖayna? W ramẖël, bëṯër mënayna mën gëd foyëš l jil w jilat ẖaṯe mënayna? Mšaylina: Qay tarix diḏan, ẖaṯo w catiqo, lë kuḏcinale? Man klozëm d fërasle w yulafle? Kowe meqëm mënayna nošo d yulafle? Hano ţacno d manyo? Qay lišono d femayna, buwwe qrayto, kṯawto, kṯowo, kaṯowo,... latlan? Man klozëm d yulafle? Aẖna aw ǧer? Man? Qay kcaqlan më lišono d këtlan? Qay lë krëẖminale? Qay krayqina w kdayšina acle? *** Këtlan cito, mu arco w lu qarco, ǧëţto b ẖërara d benamusiye, d dugle, d zëne, dë gnowo, d ẖaramitiye, d bebaviye, d muxabarat l Suriya, lu Cëraq, l Tërkiya w lu Iran,... w aẖna acla bas mfarjone! Ma hawxa kowe? Harke b Södertälje, këtlan tre ẖasye, a tre ǧiţe b kul ẖarbuṯo d latla calaqa cam nošo, kmëtmaneno, a tre b šato d qulbina 2018, howën šmiţe b iḏo d hadome d cito. At talafonat d këtte, blalyo w bimomo kmëšmoci w kkorëx bënne mamre, ẖa koṯe d čoyër jule i naqla d šumacce. Yawmo meqëm b yawmo, klozëm mitašlëẖi w mišayci li Sëcudiye. Tamo ţër cayši ẖaye d fayëšše bu cëlmano. Adyawma gabayna i cito, darǧa naẖët w hawi taẖt mu jemëc b ǧalabe. Mdawmina w ëmmina “aẖna lë ẖaruwlan mena!” Aw saymina darbo d caqël w maxlëşinala më iḏo di Mafya d kiba? A tre ẖasye, yawmo meqëm b yawmo, lo bas më Södertälje, mu Swed klozëm xayifo d mitanfëqi.
| |
Alert IP |
Print Edit
Reply
Re-Quote Top | | |
|
|
