Political and Historical Declaration (Şurayt)

Political and Historical Declaration (Şurayt)

Buyono
1

Caman!
Qumox haw ţre darbo, naqla ẖreto d nëfqët li ẖolo!
Ya mawto w ya qiyomo, hani këtlox!
Zabno dlo kloyo kmalëx,
Klozëm dë mnaqët!
Ayko gëd malxët?

Këtwolox yawmoṯo, rišox b Qafqasya w caqwox b Başra´we, b Beṯ-Nahrin, b Asuristan, b Suristan, bu Anadol w bu Madënẖo kulewox. An noše bi cëtmo, hat mëftakratwo, mayko w aydarbo gëd oṯe u nuhro? Yalifët bë Nşiwën, b Urhoy, b Ḫarran, b Qënnëšrin, b Riš-Cayno, b Saliq, b Omid, b Meliţini, bë Qţisfon, b Ḫaḏyab, b Beṯ-Lapat,… mën kit bi arco w mën kit bi šmayo? Bu yëlfono hawëtwo moro d ëšmo w qolo! Maqëmlox li nošuṯo malfone yalife, yaḏoce b maḏco. Mi cëtmo, ţrelox noše d malxi lu bahro.

Këtwolox ẖaylo, ẖubo w haymonuṯo. Hawxa maţët l Beṯ-Ḫuzaye , l Gurjistan, l Armenya, l Ponţus, l Carabistan, lu Şin, lu Hënd, l Uyǧur, l Indonezya, l Qërgizistan, l Qazakistan, l Moǧolistan, l Turkmanistan, l Sibirya, l Ruşya, l Tajikistan, l Ozbakistan, l Afǧanistan, l Viyetnam, l Laos, l Qambočya, lu Yapan,…

Këtwolox cayno ǧalabe sawëcto w ǧalabe rwëẖto. Azzox lac came, huloxlën mën kit b meẖox w mën kit b lebox. Dlo aţlahiye ẖa bëṯër mu ẖreno maẖësilox. Hawxa kulle yalifi w qayimi li raǧlo.

Hul d aṯi menox kṯëwlox, lazëmwe l ramẖël w lu ẖreno. Bas ayko maẖtilox? Adyawma layt maḏco?

Adyawma b kul dukṯo b qarco kibona, ayko malxina haw kuḏcina? Ylofo w yëlfono hawi ẖaram. Hawilan zurba d samye, zurba d karrin, zurba d lalin,… bac mëqqa hawi ganowe, mxapyone, ǧašime w maǧëšone? Hawxa bi pëše pëše sëmina fërḏine, msawena cam arco. Azolo kdoyëš, aṯoyo kdoyëš aclan.

Mor Gabriyel nţar! Aṯoyena!

16 ẖzirën 2012

In reply to message #0
 
Buyono
2

Aẖe w Aẖwoṯo

Gabayna w gab ǧalabe came, kito maṯle maẖ ẖaye cal i ciyeše daẖ ẖaye. An noše, hani l mën kul naqqa këmmënne? L mën dayëm kmaḏkërënne qëm dan noše ẖaḏire? Këmarno qay latyo lašan šëfro d cëlmo?!

Këtlan maṯlo hawxa komër: Yabo an noše lo bu sloqo du cëmro, bu ciyošo kowën more d jarabune...

Madrašto daẖ ẖaye u tarixyo. Kul nošo w kul cëlmo kmoyëd w kobëc d moyëd dars mi madraštaṯe. Bu cëlmo kito ǧalabe came, mëdde dars, bdalle këmǧayri ruẖayye. Du šrolo, kito heš ǧalabe came d kobi qale lašan dë mǧayri ruẖayye.

Aẖna xëd camo, harke dukṯyna aykoyo? Bu mǧayro, bu kmiǧayro aw bu gëd miǧayro…

***

Beṯ-Nahrin ẖzela ǧalabe haroše. Hën mah harošani aṯën, kalën zabno karyo w hën zabno ǧalabe yarixo. D kalën zabno karyo, mẖawtëki mlaf hani d aṯën w fayiši zabno yarixo.

Bu tarix mqabël dah harošani, aẖna xëd camo, mën sëmlan? Qayimina li raǧlo mqabël dëṯṯe? Aw lo? Mqawamlan? Aw lo? Hani kobëc d kurxina aclayye w mëfqinalle li ẖolo.

Ah haroše, adyawma d fayiši cal arco d Beṯ-Nahrin, b xaşra tërk w bi ẖreto carabne. Bu tarix catiqo, ab babe qamoye daş şëroye ëmmiwo lat tërk ”dac cayne čire”. Ucdo ste, heš an noše d këtne bu cëmro rabe, koṯe l bolayye d hawxa miţamërwo aclayye bu Ţuro.

Ac cayne čire bi badaye du doro dac 10 i naqla d aṯën mëqqawën? Alfowat? Malyune? Aw mëqqa? Aṯën cam as sayfe w cam ax xënejëraṯṯe. Bu qaţlo w bu tëqţilo, rawici cël mu aṯrayḏan hul l adyawma. Qţëlle b kul zabno ag gawre w acma ste ntëšše kul emo w kul barṯo d aṯyo qumayye. Hënne yawmo cal yawmo zayidi w aẖna yawmo cal yawmo naqëşina. Qayo? U sabab mënyo?

Bi xaşra ẖreto an noše du Kačal, aydarbo cabiri lu aṯrayḏan? I naqla d aṯën mëqqawën? Alfowat? Malyune? Hënne ste aṯën cam sayfe w xënejër. Hënne ste qţëlle w maqţalle. Mqabël dëṯṯe aẖna mën sëmlan bu tarix? Qţëlina? Nẖërina? Qalëbina 30? Hul ucdo dlo kloyo, u karano kmalëx aclayna bu Cëraq, b Suriya, b Lëbnan, bu Urdën, b Mëşër w bu Iran.

Maḏco cal hani kulle, nëquşo këtlan, qay?

Mor Gabriyel nţar! Aṯoyena!

Jan Beṯ-Şawoce
27 ẖzirën 2012

In reply to message #0
 
Buyono
3

Mawtoooo!...

Haka gëd oṯët lafeli, bi masale di dacwa du ẖaq
Be mayko gëd oṯët? Më tamo w hul gabi
Këmarnox: B šayno! Itox! Lë zaycët!
Maẖ 75, Jan bu rëbbat bi frezo di jabhayo

Mu yawmo d yawma, hama bdeli kuḏacno këtlan ẖaq
Ymeli, hano bi zoriye di qale gëd madne!
Bu darbo, be mën dëglo, benamusiye w xiyene
Hawi, dlo kloyo gëd mhaškarne w gëd mnagalne.

D lëweno hawxa, i qale lë këwyo b ẖaq
Sumu ẖëzbe, bëṯër mbalbeşu u qarco
Bu darbo du ẖaq w du naẖaq, kit mazlo
Bas dcoro lo!...

Hedi u tarix b iḏe ţër maẖët i lakke
Ḫḏo këmto w ẖḏo ste ẖëwërto
Tam b dukṯa…
I cade hawxayo!...

***

Kaṯowo ruşi Dostoyevski komër:

”Ma latyo cëjbo?
U nošo dë kmaẖtinale cal qarcayna, b kul dëglo d këmdagël , kkërxinale cal mede hama d howe šrolo.

Han naqla bu caks ste, u ẖa d latyo maẖto cal qarcayna, b kul šrolo d komër , kkurxinale cal dëglo.”

Hano tam 40 šne, harke b Awruppa dlo aţlahiye b hanar, hawxa ksaymina bi barbariye mqabël dë ẖḏoḏe. Af faẖe d sëmlan lë ẖḏoḏe, bnoyo latte. Ǧalabene! Bac ar ruqe, aş şucre d malẖaqlan lë ẖḏoḏe, kmëmle canbare mënayye. Bac ad dugle dë xlëqlan, dë mbarbazlan,… ẖšowo latte. Man mëstafadle mu medano d sëmlan? U camo? I cito? Aš šutose? Ag gabe? At tukoze? Ag gawre? An niše? An nacime?... Man? Maclumyo kobëc jawab lašan d marḏena ruẖayna.

Aẖnone w Aẖwoṯo,

B dukṯayna, man ţër mëžǧël hani? Haka kit nošo ǧer mënayna, dlo nëkfuṯo, mi ẖase ayko d këtxun, marulli…

Maẖëtlan bu ëšmo qumayna ”Aẖna camona, aẖna ëmṯona,…..” w malaxlan. Bëṯër më 40 šne cwodo, ma lo kobëc d huwewolan mede bi ẖolo, lašan d ţurelan ”aẖna camona!” cal i raǧlo.
Adyawma mën këtlan lawxa? Haka nošo koḏëc, ţër omër!

Jan Beṯ-Şawoce
30 ẖzirën 2012