Heš hat zcurko hat (Surayt)

Heš hat zcurko hat (Surayt)
Jan Beṯ-Şawoce

In reply to message #0
 
Heš hat zcurko hat

Jan Beṯ-Şawoce

1

Ḫur yabo ebi, haka šamoco hat
Gëd maẖkenox mi sayasa d gaban
Bu mamrayḏi ”xilaf” layt ha!
Hamma d maẖisët ”Alo kit”
Rahoţo tox, bi šuqo mšayël
Hawxa ylaf w mawlëf

Ḫur lawo, heš hat zcurko d aṯmël hat
Bi sayasa cadeyo këmmi:
Alah hawhe he d ëmmat laẖmo d tanuro lo xile…
Mawxa, kobac d šoraẖnox, be mën mërore,
cëḏḏabat, šaqqawat, carat, bahdalat, kalbuniyat,…
grëšlan…

In reply to message #0
 
2

Këtwaylan Mtakazto,
Way caynox lë nëflo acla,
Amţela l quman laẖmo
”Xulu! Xulu! Hano laẖna sëmlan!”
Kula dugle b dugle…

Mëthaymën, heš ucdo ẖaṯo maẖëslan, ẖzelan
Hano këlle du Bacaṯ caraban…

Mawlëfallan pransibe mu fulaḏ
ṯabute, asasi w ǧalabe saǧlam,
De han naqqa:
Aydarbo gëd mdaglët
Aydarbo gëd gënwët
Aydarbo gëd marẖëqët
Aydarbo gëd fëlǧët
Aydarbo gëd malwëšët…

Hul l ucdo ”lẖamdëlla” krucena hawxa...

Haṯe han naqqa heš i naynewa, i nayne
I tërnayne bëṯër aṯyo, xalaş ste layt mena
Mlalle cebayna farxe d kurfe du Bacaṯ caraban

Blalyo
Acccccccccccaw! Mëqqa duwşiwo, kako Brawo!
Bimomo mëqqa marfanwo, kaylo latwo lu xroţo…

Han naqqa b riša këtwolan Mahdi Gabriel Afram,
Barane ţov Arsan Arsan, bu Mirsidis w BM double
Bakkoye Cawen
Alyaske Mala Šahin u qumarji
Gabroke Mala Bar-qašok u filipparji
Hawo d Mor Yacqub d ǧarëq ebe…

Ëmmiwo:
”Kul qaroyo šuciyo, acme lo mahwo w lo šqolo, mnico!”
Haaaa haṯewa i gëmṯo bi Mtakazto d Bacaṯe caraban…

In reply to message #0
 
3

Bac këtlan cito, kul man dë ẖzele taẖta zawlo, ymela
”Bu qayso dë şliw Moran kyumena, latyo diḏan!”
Bac i pistiyaṯe du reẖo natinano mënyo?
”Kyumenalxun baj jurẖe d Moran, l noše tamo maẖtile!...”

Mhaymanlan, mawdelan, dcelan, mşalelan w mancelan
Kul bišo…

***

Kuhne cebayye, kisayye, qurco b katfayye malyo…
Hani d manne?
Yabo hani zadiqene zadiqe, da mhayëmnene,
hiwënne laq qadiše…

Gëd maẖtinalle baq qawraṯṯe,
Ma lo hënne ste kubacce mëklo?!
Žare dlë fayši kafine!..
Hama xer dëṯxuyo lawo!...

Naqla d lozëm, balki nuẖti l gab Šexo Samyo,
Šuqlënne bajane semaqto w kamto,
Ma lo hënëk ste këtte ẖoriyat w čëlpaẖşar bëṯrayye…
Heš!.. Ba man gëd ẖoyarre?!

Şëţrayo gëdi, maşţeru aclayye! Ma lo dëṯxunne?!
Mu başro w mu admaṯxunne!
Ma kowe dlo ẖayrutunne?
Ba hatu kuḏcitu!..

I nuro di gihano, kala konuţro!..
Alah kul faţëryarxo, tamo këtle qayso b iḏe,
komẖarak bu dasto,
De han naqla haṯe hawxa iḏaculla!..

In reply to message #0
 
4

Harke hawi mëdone!

Harke hawi mëdone ha!
An noše cal ëšme d noše sëmme sujat,
Gëd obe ẖšowo kul nošo, lu tarix dan noše,
Ema w ayko lë kmiḏëc?
L man w aydarbo lë kmiḏëc?

Bas ëlla yawmo, gëd obe noše ẖšowo…
Hani a mhayëmne du cëlmo ẖreno layto,
Tamo balki, gëd misamme šëkël dë ẖšowo,
A mhayëmnanëk layto, bi nuro di gihano balki
yqoḏo d yuqḏi hul colam colmin…

Cal mune?
Cal foṯe du kef w du hërz, w du kin,
w du fiyoẖo d lebo d hën,
Šqilo w yaqiḏo i ruẖo d hën.

W hawxa an ammoṯo mtabxën,
Mparpëţ w mkawzër lebayye,
Bam momo lan ammoṯani noše, gëd obi ẖšowo
Man koḏëc balki ramẖël, w balki ste cal qariwo.

In reply to message #0
 
5

Dawse aw tarte … laf i demoqraţiye

Kṯaw yabo kṯaw, hul d oṯe menox kṯaw
Qëşoro lë mqaşrët bu şurayt ha!..
Haṯeyo i demoqraţiye d kubcina,
Qalam! Mẖarëk rišox! haṯe knuţrina,

Kṯaw yabo kṯaw, hul d oṯe menox kṯaw
Ţër cëlmo hawxa oḏëc, šomëc, obëc,
Han naqla wayla lawo heš dlë fahëm
Masaleyo ha!...

Maqţeru u qaţiro, maẖetu rawbe,
Mucu u gawdo, këbcina dawǧe,
Manfequ i zëbdo gëd lëzmo!

In reply to message #0
 
6

Këtwolan grece l Bë-Mahmado,
Kuḏcitunne Bë-Sacido w Bë-Xalaf,
Hawën aǧawat w mërallan:
”Itawu warox! Mën mqawëm aclayxun!
Mën arco arco kţëlbitu? Mayṯitu yatume gurrin priţe!

Këlle këtlan dawle kayisto, ţëwyo u qaẖfo d qarcayxun!
Mën këbcitu abri?! Alo šqile mënayxun!
Aloh dlë mbaţlitu gëd maškena cal kulxun!

Abri rkadu! Qayëṯxu laẖmo du sosyal!
Msamemu w lë mtanetu! Man kit ţaw më Kamal!
Sëmlelxu madani, maẖëtlelxu qërawa, badle w šafqa…
Heš mën këbcitu?! Abri sawëcitu laẖmo mbayţarxu!”

***

Hani lë baswo…
Aṯilan Galloye Vëžžo, këtle b iḏe xariţa, kyome w komër:
Walid Janpolaţ, Nabih Barri, Ḫasan Naşralla, Mar Marun,…
Hani kulle acmaynane! Gëd maqëmina Jënd ël Šam!
Hatu lë ẖarëwxu, maru ”e” w toxu bëṯri!

Yabo klay, klay! Hawxa lë macjëzët ruẖox!
Ba l man këmmët?!

In reply to message #0
 
7

Xwazi, ëno heš bi qale…

Xwazi, ëno heš bi qale d uṯewo ẖaşi bi arco,
Xwazi, ëno heš bi qale d huwenowo qallës,
Xwazi, ëno heš bi qale d huwenowo čiz,
Xwazi, ëno heš bi qale d mëşwacnowo bu admo
Xwazi, ëno heš bi qale d huwenowo daẖiẖo
Xwazi, ëno heš bi qale d huwenowo barane cagid

I masale hawxa gëd miḏëcowa,
Zabnowe gëd ëmmiwoli ”xaşoro!”
Ašër aẖuno lawi hawxa.

Dayëm bi pëše-pëše aṯëlli
Më la-xalf mxanjëralli
W bu tarix lo ẖšëwalli…

In reply to message #0
 
8

Ḫur kayiso bëno abro!
Haka hat gëd ëmmët
”Ëno camono! Kubacli qullo!”
I naqlayo kobëc d yëtwët w mëftakrët
… gëd ẖëšwët:
”Ëno mën kubacli? Barex aw qadeš?!
Ḫţiṯo, këdo-këdo aw žare-žare…
Hani kmanfëci?!”

Haaa heš aṯmëlwe…
Hani kulle, ẖa b ẖa mjarbilox
Ḫzelox b caynox manfaca b qërš lawëlle
Hani b naqla ucdo ţrayyën l xaşra

Maclay rišox, ẖur lë ẖḏorox
Ylaf! An noše mën ksaymi?
Mëd yalifët hedi mawlëf
Bëṯër dlo zëcṯo harke malëx

Kṯaw tarix-siyasi ẖaṯo
Hanoyo d kubaclox!

In reply to message #0
 
9

Heš i masale lë tayimo ha!…
Aṯilan noše, kulle šëferin, mëcawënin dac carabat
Mu Dörtyol d Mëḏyaḏ.

Yalife di pisiye d Bab-ël-Şor b Mërde…
Mërre: Aẖna garwonoye!... Hawxa mlalle garwo
b Gare, bu Ţuro, bi Gozarto, b Urmi w b Awruppa.

Eeee lawo, b caynox kẖozët, mëqqa hawilan laẖmo samyo
Axul w luxlët, tiyomo latle!
Gëmṯo axul! Adyawma kit ramẖël layt!

Mhawarre b Bonn, ”toxu anarya, anarya!” l kulan
Maţina l Barn, Bruksal, Barlin, Hamburg…
Mërre ”msawyo lë Stockholm!” w kalina

Bëṯër?!
Han naqqa maẖetu taqqoz warox!
Kul ẖa l bayte w qulayte!

In reply to message #0
 
10

Tox yabo d uṯena lë ẖḏoḏe…

Ya aẖuno, tox qamayto saymina ëšmo dë ẖšowo…

Mi niye d këtli cënt lowët, lowët! Ëno ste lë këweno
Ţurena mu mërli w mërlox d sëmlan, ẖaru baytayna!
Ma mën këmmët cal hawxa?

Ḫur ëno ste w hat ste cayni hawa knuqẖina
Ma kmalëqlan ayko d huwena dë mčaplina?!

Këtli baţ ţacne fëkrat lašan ramẖël, du ẖreno
Ma kul naqla kowe hama d luţšatte ţino w šarce?
Han naqla b iḏox ste d lowe mede šrolo, ma kowe?

Këllox hat ste b kul zabuqo bër w hay bër këmmët
Hama bu nëquşo xëd këtno myaqërli, mën këmmët?
D ëbcët cam ẖḏoḏe bu zabuqo kiban mbarbërina

Dlo şucre, dlo ciyoqo…
Ma emox latyo emi? Aydarbo kkorëx femi acla?!
Bac ẖoṯox, camṯox, ẖëltox, dadox, qaštox,…
Ma lo ahël diḏine?!

Ḫur be mën niye këtlox, latyo ẖarbo ha, li ţawtoyo,
Marli ”Qum!” gëd qamno acmox, d ëbcët li nuro
Katfo b katfo gëd nuẖtina, li dëkṯo d këbcina!

Mhawrina, mzacwëqina w rumena hawarat
”Qumu aẖnone aẖna abne dë ẖḏo ëmṯona!”
Ma lo ẖa cafro këtlan!?

Cam ẖḏoḏe dlë ẖëlmina w dlë zëmrina
Ma kowe šqolo? Haka kowe marli!
Këbcët hawxa d saymina?

In reply to message #0
 
11

Aẖ ẖayani Aloh diḏanne…

Yabo Aloh aẖ ẖayani haka ẖarbo w haka ţawwo, diḏanne
Mëqqa d mabrëmina w mëqqa d maftëlina, Aloh diḏanne
Këllan bënne kcayšinalle

Aẖ ẖaye dlo kloyo këmdawmi ha!…
Han naqla hani ban 24 sacayat
Kmo mawsimene? Maḏco latli!

Naqlat naqlat, këmwaţët şadrox qumayye
Naqlat naqlat ste kţucnët u ǧamo d këtte
w kmiẖayfët qumayye

Xayifo kmaẖisët w këmjawbët: Alo kit ẖubo ste!
Ḫaşra w ẖëşoro ste, hani kfëlǧatte cam noše
Kfëtẖi sefayye, kẖuḏnilox, klayfilox w knušqilox
Han naqla kbodët hat ste kmawdët…

Naqlat acmox d lëzza lu rišo, hën kţurallox
W hën ste širat manfëcone hama kmaẖtilox
Hawxa kbodët d micarqëlët bu darbo d këtlox

Kmëftakrët bas macna abadan lë kuṯelox
Kmaclët idoṯox, kbodët d guršët nafas yarxoxi,
Damce d gaẖxo, d baxyo kulle dlo kloyo knuẖti

Hul d koṯët lu lebo, kẖozët hawi rabëc dlo maḏco
Hano kule lo cal bolo tëštëcniyo rabo d qumaryo
Kito buwwe qmoro li ẖubo, laẖ ẖaye w lu rẖomo

Lë ţocët haaaaaaa! Bi ẖarayto kit tiyomo lawxa
Bac aẖuno Aloh b iḏi čara layt, hanoyo u cëlmo
Kibe fëkrat, kibe ţimoṯo, kibe cëlmone mšakle

Lëḏḏe, dardat, ẖaye ǧalabe ǧalabe mšakle
Han naqla aẖuno gëd umarnolox ”harke i xaşra ẖarbo”
Kul ẖa komër ”bu cëlmayḏi këtli ẖaq!”

In reply to message #0
 
12

Wa şurayt!...

Wa şurayt, ma kibox d ëmmatli
Qay an nošayḏox hawxa karrin w samyene
lafelox?

Ma lo hat sëmilox noše?
Mawḏëcloxlën ”Alo abne d noše hatu!
Akjar lë ţucetu ha!”

W ţrallox bayn dal lappat d hano w d hawo
Hano ntëšle, hawo ntëšle w kulle ntëšše
Ma širat latwolox alle?!

Lo ašër, hani dad daqne w daj jëbbat kome
lë ţralle d ubeno aš širat d këtwoli w d latwoli
Mërli: Ba hënne kuḏci! Nurone w nuhrone!...

Ma hawxa kowe? Ba mayko aḏëcno,
abne w bnoṯo gëd maxini?! W gëd ţayri!
Ba ynëqqe ste hul d ëmmat: Bas!...

Ba kmaẖwe ẖalwo ẖaramwa!....
Loooo!... Amar ẖašša! Ḫašša diḏox!
Ma emo kowe d howela ẖalwo ẖarram heš!?

Pak lu zamanano!...
Ḫuru lu cëjbano, ǧer mu şuroyo
Ma man komar lu ẖalwo di emo ”ẖaram!”
Mede he d lawi bac cojube di arco!...

L më rabbane, toxu lafeli!
Yatumkat emo lo krëẖmi!
Alah bat tantelat di arco w di šmayo

Hawxa he lo hawi!..

In reply to message #0
 
13

Hama jaşara

Maẖwayli hama jaşara
Aloh kul nošo kiban d maydina mqabël

Maẖwayli hama jaşara
Kiban ruẖqina, kiban d ëzzan w ţurena

Maẖwayli hama jaşara
”hat” heš xabro dlo kṯowo d maylatle më lebi

Maẖwayli hama jaşara
Balki kibox d quţlatli

In reply to message #0
 
14

Latlox ëmkan

Aloh dlo ëmkan hat lašani
Fayëšlox mede warox!

Ḫëšwanwo b kul qërniṯo u zlam
D këtli w d latli, hat wayt!

Lawǧël, larwal b kuli
Ḫzeli, dlo ëmkan hat

Camër bayto! Hama maẖway jaşara
Balki, më ẖaṯo d cëbrët b lebi

Kẖëzyono ašër dlo ëmkan hat
Elo ǧalabe camuqo w qawyo hat

Bas mën fayde, dlo ëmkan hat
Lu lebo d këtli, dlo darmono hat

In reply to message #0
 
15

Hama sëmliyo zmërto

Mšayëcli hama kmo xabre dë šlomo
Kṯawli ”ëno krëẖamnëx!”

Ţrowe mamro kṯiwo, ma mën gëd howe?
B riše mar ”Kul mede gëd bosëm!”

Maṯlo, maẖët şërto rsëmto ste
D huwena ëno w hat biyya

Aw d ëbcët, hama sëmliyo zmërto…

Suma w hat lë ẖaruwlox, acli ţrowe d fayiš.

In reply to message #0
 
16

Lë qadërono d ëmmono…

Ma lo ”Ḫawronena” mërle
Šalyono lë qadërono d ëmmalle ”bele aloh ẖawronena”

Mërleli ”Kruẖamnëx”
Šalyono lë qadërono d ëmmalle ”ašër ëno ste krëẖmallox”

Mërleli ”Ţcayli”
Lë qadërono d ëmmalle ”Laybi ma kowe d ţucyallox”

Mërleli ”Ëno fşëẖoyono”
”Bac ëno lo!” lë qadërno d ëmmalle

Mërleli ”Këtli ẖḏo”
”Yabo këlli ëno heš gaboxno” lë qadërono d ëmmalle

In reply to message #0
 
17

Xayalat cayn xëd u ẖamrone

Këtli xayalat b meẖi cayn xëd u ẖamrone
Ţacmayye basimo bas xayifo kmëski meẖi
Këtli xayalat b meẖi cayn xëd u ẖamrone
Kmaẖwën šafire, kmaqnëcili, lë kţuceno ste

Këtli xayalat b meẖi cayn xëd u ẖamrone
Kubac, b meẖi cayn hawxa dlë kolën

Latyo mede cëjbo!...

In reply to message #0
 
18

I ẖubo rabṯo mënyo?

Më lawǧël kuṯeli herizat dë mhawarono
”Qumu warox!” l kul nošo b nafas ẖaroyo
Qrayto mac cëmqe dac cëmqe d këtli

Ya rab hawli ẖubo, d howët ”hat” biyya
Ţruwyo ẖubox d qudrono malxono
Bu darbo d kuḏcono

B barkoṯi hama ẖaylo ste dlë foyëš
Këbcono ẖubox d huwyo acmi
Ya rab bas b lebi