Siyase aw barbariye, ayna klozëm maydina l ramẖël? (Sura...

Last edited on 03/10/2014 at 08:02 AM (UTC3 Nineveh, Assyria)
 
Siyase aw barbariye, ayna klozëm maydina l ramẖël?
Më Jan Beṯ-Şawoce
9 oḏër 2014

Siyase aw barbariye, ayna klozëm maydina l ramẖël?

Haka kul lebo, d qudarwo d roẖëm,
baẖ ẖaye, fliǧuṯo luwewo.
Kul raẖomo, d huwewo abre du babo,
i naqlayo i ”ẖubo” zaţi haqqa
raxis lëwyowa!

Jan Yujal (Can Yücel)

In reply to message #0
 
1

Bu zabno ẖaroyano, cël mi adro siyasi d këtlan, hawi qar w qir… Hano mën šëkëlwe? Bu teori di siyase nošo lë mqarawlele. Ţrelan bu ”mërli w mërlox”. Fayde l ramẖël, lu ẖreno, këtle? Nošo hawxa lë mnaqašle.

Aẖnone, Aẖwoṯo,

Mu nëqošo du fëkër, pozitiv-negativ, lë mëgrëšitu. Hul d oṯe mënayxu, b nafas d Xalaf w Sacido lë mnaqšitulle… Xşara rabṯoyo. Bu šëkël du clošo dab Bacaṯkat ste, nëqošo heš zëd cayboyo. Bad dugle d amţela li cito b naqla ẖḏo, kobëc b maḏco d ëmmina ”Lë kowe!”

Camona, kulan gëd mëftakrina cayni, mede zaẖmeyo. Kul ẖa mënayna bu bayto ynëqle ẖalwo d emo w kul ẖa ste b qërniṯo. Hën bi qriṯo, hën bu qaḏa w hën bi walaye. Kul ẖa mënayna mede mëdle mi bëcaye d qayëm biyya. Harke mëdlan ylofo, axlaq, tarbiya, ḏëlëm, baxyo w gaẖxo.

Hën bi dëkṯo, yalëfina ḏalomo-ḏlimo, dayošo-dišo, mayoşo-mişo, ẖakomo-ẖkimo,… haṯe dabara d siyasewa.

I dabaraṯe b Ţurcabdin ẖëzyolan cal iḏe du aǧa kurmanj, du caskar w du polis du tërk. Bas hul d aṯi mënayna mkaselan cal ḏëlëm d këtwolan lawǧël. B caynayna ẖzelan ǧalabeeee, bas mcamşolan, tlelan w lë maqërlan. Qay? Hani noše mënaynawën d sëmme, lëwewo d maqërina aclayye. Bi dëkṯo d lazëm ste, ymelan, mqatelan, mhawarlan,.. mdafaclan aclayye.

Haṯe bi siyase ëšma ”xal w xwarzetiye”yo. Yacni xu maṯlo d komër: U qaşlo d cayni lë kẖuzene, bas du mqabël dayëm kẖuzene.

In reply to message #0
 
2

”Cël mi adro siyasi d këtlan, i hawa, kul mëqqa d koṯe, cayn xu rëşşaş kyëqro…
Bu lebo, ksaymolan ǧamo,… ǧamo dlo čara… Ma fayšina hawxa dlo čara?”

***

Aẖe w Aẖwoṯo,

Bu tarix, cal qarce d kul nošo, aṯi bala w aṯi balawat mšakle. Ucdo ste koṯe, ramẖël ste gëd oṯe, lu ẖreno ste gëd oṯe. Mqabël du bala, bu tarix, noše qayimi li raǧlo, hën bu caqël w hën bi aẖmaqiye, abici d maklën u bala w ab balawat komani… Harke hawi damce, baxyo, kafno, şahwo, maciquṯo, ǧala, qaţlo, admo w Sayfe.

Hani, lašan dlë mëţcoyi, lašan d mimëd dars w cëbra mënayye, kṯiwi. Hani adyawma kqurenalle, kyëlfinalle… Gabayna hawën cëbra, mëdlan dars mënayye? Hatu ste makrexu caynayxu w maqnecu lebayxun, haka hawxa kowe sidayna, aw lo!..

***

Bu tarix d këtlan, la-xalf, mëqqa d ẖayrina raẖuqo, bi rišuṯo, bi dabara, bu caqël, bi šira, bi falsafe daẖ ẖaye d hawilan w d këtlan, kẖuzena i cito. Sëmlalan darbo, mërlalan ”Yalla, harke cayne mcamşe malexu w maru acmayna: Amin w xalëş qurye-layson!” w malaxlan. Hawxa mëqqa malaxlan? Nošo mënayna, mi zëcṯo di nuro di gihano, lë majrele dë mšayël.

Aẖnone, Aẖwoṯo,

Haka kzaycitu, lë mšaylitu! Nţaru hul d oṯe ţufono ẖreno cal qarcayna.

In reply to message #0
 
3

Maṯlo komër: Camo d foyëš dlo şënca, këmmi ”u wariḏo d kubele ẖaye, kowe qţico ….”

Aẖnone, Aẖwoṯo,

Bu zabno gëd ducarno 50-60 šne la-xalf. Bu rišo Mëḏyaḏ, bëṯër aq qëryawoṯo d këtwo lë ẖḏor d Mëḏyaḏ, iḏicewën bi şënca d këtwolle. Taqriban hawxawe baw walayat rabe ste. Aş şëroye, an armënoye, bëṯër mu Sayfo aṯi ǧala rabo aclayye b Beṯ-Narin i clayto. Qriṯo, qaḏa w walaye cal raǧlo lë fayëšwo. Bu Sayfo kulle ẖariwi, hayidi w yaqiḏi. Am more qţili, tayihi w hawën grece saţ ţaye lu fako du laẖmo.

Cal hawxa kit ǧalabe ẖkeyat. A ẖkeyatani malye damce, baxyo, ẖëzën, dardat, ǧame,… Sahmo rabo mani, adyawma maţëllanne cal iḏe d hani d këtwolle şënca.

Maṯlo gëd ubeno. Kfarze iḏëctowa bu biyoḏo das sëfoqe du mëklo. A mbayḏone kfarzoye, karixi ǧalabe qëryawoṯo, meqëm d şëroye, armënoye, kaldoye,… bëṯër mu Sayfo d maţën l iḏe dak kurmanj, tamo cwëdde bënne bi biyeḏa. B caynayye ẖzalle an niše bu zor d simi ţaye, an nacime w ag gawre d simi grece w ţaye. Hani latwën ẖa w tre w tloṯo… ban alfowat nafšoṯo…

Hën mani cal iḏe daş şëncatkarani qadiri d mahzëmi w xulşi. Kit hawxa ẖkeyat. Hani kowe mënayye tiyatro w fëlimat adyawma.

U cammo Aẖo di cito, bu aşël mi Kafro Claytoʹwe, aṯiwo l Mëḏyaḏ. Hawiwo şacor li cito di Mort Šmuni, yalëfwo šërboto dab bote bu kalšo. Aṯiwo zabno hawiwo šërik cam u Lalo Bë-Mašalla. Cam ẖḏoḏe cwëdde zabno.

U cammo Aẖo bëṯër hawiwo ẖëmyono d Malfono Bedros Šuše.

U zabno, ẖarayto dan arbciyatyo <1940>. U cammo Aẖo koṯe lu šërboto dab bote li Bšeriye. Tamo kfoyëš baš. Koṯe lë qriṯo, gëd cowëd b bayto d aǧa. U aǧa ẖa kurmanjwe. Këtwole 7-8 niše. Ḫḏo šafër mi ẖreto. Maẖwewo aclayye, këtwolle šëfro d şëroye w armënoye. Ba man kmajre mëžǧël!.. Kit qaţlo, kit mawto! Ḫaq du şëroyo, qërš mënyo, lë kţowe.

Cwëdde bu yawmo qamoyo ëšmo, hawi caşriye, maklalle u cwodo. Meqëm d ëṯyo i ẖšëmto, u cammo Aẖo, b şurayt kmëžǧël cam u ẖawrayḏe. Ḫḏo man niše du aǧa kšëmco, xayifo aḏico d këtne şëroye. U aǧa latwe bu bayto, maẖšamme, bëṯër griši lu dmoxo.

Fayët kmo sacat bi ẖolo. I aṯto du aǧa aṯyo l rišayye, zayici, b kurmanji mërlalën: Lë zaycitu! Aṯyono dë mšaylono, ma hatu şëroye hatu?

Ba man kibe mjawëb ”e” aw ”lo”. I aṯto du aǧa aḏico, mërlalën: Lë zaycitu! Ëno armënaytono, këbcono d maxlëşitulli! Lë këbcono d fayšono ţayayto!.. Qurban d caynayxun maxleşulli!

W azza l šuǧla.

In reply to message #0
 
4

”Cayn xi ẖëbro d hëwyo bëzto bi ẖolo, u wëswoso, kul mëqqa d koṯe, baynoṯayna kzoyëd, hawi xi lakke mbarbazto…”

***

Mdawmina bi ẖkeye du cammo Aẖo di cito…

I naqla d mërlalën ”ëno armënaytono” i zëcṯo d gawayye qalibo l fëşẖo. Ba mën kibën d saymila? Bu zabnano ẖaq du şëroyo, qërš mënyo? Lë kmanţe! Dlo mede, nošo d maẖës bënne ”şëroyene” u qaţlaṯṯe ẖalalyo. Han naqqa d saymi mede w d mëmsoki, heš apyas kowe.

U lalyo kule mẖarmo i šanṯo cal u cammo Aẖo w cal ac cawode d kit acme. Hawi şafro, nahër u yawmo, qayimi d cëwdi. Aṯëlle fţur. Lo më lebayye kuxli, kẖayri lë ẖḏorayye, nošo, siyoǧo,.. šamëc u mamro d mërla li armënayto ëlla lo!?

Mkamalle w qayimi lu šërboto. Bu zabnano heš pompa du šërboto latwo, këtwolle maknëšyoṯo daq qaşle yarixe, bënne mšarbëtiwo u këlošo. Naqla ẖreto hawi caşriye, maẖšamme lac cawode, hënne mžide lë dmoxo i armënayto aṯyo l rišayye naqla ẖreto, mërlalën ”u aǧa yawme dë cruto azoloyo l dëkṯo raẖëqto, lu bayto xayifo lë koṯe, hatu ema gëd mkamlitu?”

U cammo Aẖo huwle jaşara lruẖe w mërlela ”Bu yawmo d malëx u aǧa sëm ruẖëx kar, gëd mawbalnëx!” Mbasamle leba, w azza.

Aṯi yawme dë cruto, u aǧa şafro huwle ẖaq dac cawode w azze b šuǧle. Ac cawode cwëdde hul čacčocin, mkamalle šuǧlayye. Marke gëd ëzzën lë qriṯo ẖreto. Tamo ste cayni mede gëd cuwdi.

Gani u yawmo. U cammo Aẖo mbawable mën gëd soyëm? Maẖkele u pilan diḏe laẖ ẖawrone, mëralle ”tamam cammo Aẖo!” Bi cëtmo nafiqi mu bayto w mi qriṯo. Bu darbo kmalxi, i armënayto maẖwela ruẖa bu darbo lënne.

U cammo Aẖo qţic maẖ ẖawrone, ţuro-ţuro mẖele darbe laf Mëḏyaḏ. Bu lalyayḏa klozëm d roẖëq mi mantaqa di Bšeriye. Hawxa foṯe d şafro kmalẖëq l Mëḏyaḏ. Koṯe lu bayto, kuxli fako cal i raǧlo, kţore i armënayto dë mǧayro jula w kubela ţacno d maẖtole cal katfa, hawxa kmalxi bu zabuqo di cito di Mort Šmuni, halxo yalla li Qamëšlo. Mẖele qume aq qëryawoṯo dač čalkoye, Anẖël, Kafro Taẖtayto, lu ẖëdud, gani u yawmo.

Bu zabnano mayënat heš latwo, cabër ban arcoṯo di Qamëšlo. Qariwo lu ẖëdud këtwo taqsiye, mëbliwo an noše b ẖaq dëṯṯe l gawe di Qamëšlo hul sam more. Maţën hënne ste hawxa gab taqsi kalyo, mëžǧalle acme w rawixi. U cammo Aẖo w i armënayto, yatiwi bi ẖarayto. Qlëcle lu taqsi. Bdele lu qaloco d ẖoyër bënne mi mëraye mcalaqto d këtle lašan d ẖoze bëṯre ac carabat. Bdele kmëžǧël cam u cammo Aẖo b kurmanji. Xabro mawo w xabro mawo, u qaloco kẖoyër bi armënayto, kmažbahla b nošo, bas mnakëf dë mšayela. Hiyya ste cayni mede…

U qaloco huwle jaşara lruẖe omër ”ẖoṯo! ma hat ëšmëx latyo flan mede?” madcarla ëmmo ”Bele! Ma hat ste latat flan ëšmo?” omër ”Bele!” maklele u taqsi w maẖëtle lu baxyo w këmhawër ”ẖoṯiiii! Man umarwo gëd ẖuzenëx!?” Bac mën mede trajedi! Bac mën mede b ẖëzën! Baxën w haw kmarfën ẖḏoḏe.

U cammo Aẖo mërle lu zlam: Aẖuno ma mayko gëd uḏacnowo gëd luqeno box! W hat u aẖuno! Hay gidi dënya! Mën amţelëx l qarcayna! Aẖuno adlalyo ëno klozëm d ducarno! Madam maţyo lam more, ëno šuǧli haqqawe w tayëm. Madcër riše di caraba w maẖëtli bi dukṯayo d mëdloxlan, gëd ëzzi ducarno.”

In reply to message #0
 
5

”I siyase, latyo ẖa (aw ẖḏo) d maẖwe ruẖe qëm di mëre cam poz šafiro … bu caks ẖa këmnaqe ţalabe, iboce,… malye zaẖmat w šaqa … ẖa kyotëw, kmëftakër lašanayye bu caqël di siyase, heš bëṯër anjax kamţelën šroyo.

Harke, kito mede ţabici, lu šëryono gëd howe fëkrat mšakle, am more gëd cëbri b nëqošo d čiz, hul li ẖarayto. Karyo aw yarixo, maclumyo hani gëd maydi zabno. Bas lë ţucena, hani kxulqi zangane du maḏco, hawxa gëd fëtẖi qëm kulan darbone şxire.”

***

Mdawmina bi ẖkeye du cammo Aẖo di cito…

U aẖuno di armënayto, maẖëtle ruẖe bu dasto raṯuẖo: Sëmlox acmayna i kayëstaṯe, ema kmarfenoooox!... Gëd mawbalnox l sidayna, gëd fayšët gabayna …

U cammo Aẖo qţëcle b qamuṯe ”Ya aẖuno! Kit mawto qumi w qëm ẖawroni! Marla l ẖoṯox haka kito xlaf bu mamrano!..” Hëzla qarca w mërla lu aẖuno ”Adlalyo klozëm d docër!”

U zlam lo më lebe, madcarle riše di caraba w baroyo lu ẖëdud naqla ẖreto. Maţi, kali, manẖatle u cammo Aẖo. U zlam mẖalaqle iḏe l kise mën kalla d këtwole mnawele lu cammo Aẖo. U cammo Aẖo mërlele: Ḫur yabo ẖoṯox ẖoṯiyo ste, hawxa mede cayboyo dë mqadmët, madcerën l kisox. Ḫoṯi aydarbo gëd amţena w madno kalla mena!...

U zlam baxi, ẖḏënle u cammo Aẖo, ţlëbbe xaţër më ẖḏoḏe, kul ẖa hedi azze b darbe.

U cammo Aẖo mẖele cal darbe, baroyo li Bšeriye, foṯe d şafro maţi laẖ ẖawrone. Bëṯër b yawmo qayimi lu cwodo, xëd layt mede.

U aǧa koṯe lu bayto, kẖoze ẖḏo man niše d këtle nëquşto. Man, man, man… man kit ǧer mac cawode du šërboto?! Layko azzën? Maḏco layt?!

Uḏacwo mëḏyoyene, sëmle ruẖe kar, gëd ëzze l Mëḏyaḏ. U cammo Aẖo w aẖ ẖawrone latte xabro. Mkamalle šuǧlo, tre, tloṯo,… aṯëlle xabro më Mëḏyaḏ ”Nuriko Bë-Mahmado këmšayël aclayxu …”

U aǧa azze l Mëḏyaḏ, maẖkele mën aṯi b riše lu aǧa d Mëḏyaḏ. Mrajele mene dë mšayël w dë mdabër i aṯto, mvayco. Mašëkle, ǧer mac cawode l nošo lë mëblole, layko mëblulle? Ayko tëlyulle? Maḏco layt!

U cammo Aẖo w aẖ ẖawrone koṯën lu bayto l Mëḏyaḏ. Bu yawmayḏa cammo Aẖo ksolëq lu bayto d Nuriko. Kdore ”Šlomo!” w komër l Nuriko: Mën xeryo, mšayelox acli!...

Qayëm Nuriko mšayëlele cal i aṯto du aǧa. Abëc d uballa lu aǧa. U cammo Aẖo mërlele: Nuri, kuḏcët aẖna aş şëroye cawodena. Kkurxina baq qëryawoṯo, ucdo ste mu cwodo ţrelan w aṯina, mšayaclox bëṯrayna. Ma aydarbo koṯe l bolox, aẖna këzzan bëṯre du fako du laẖmo, harke w tamo, gëd maydina aṯto, han naqla aṯto d aǧa!... Ayna şëroyo kmajre soyëm hawxa mede!... Ma hano, kcobër b caqël diḏox?! Aǧayo, këtle dost w këtle nayar … ma aẖna mayko kuḏcina!? Sëmlan šuǧlayye w azzan l šuǧlo d ǧer… Ma aydarbo gëd malẖëqina l hawxa?!

Nuriko, mërlele: Basyo Aẖo! Fahëmno i masale! Aḏëcno meri şëroyo hawxa lë ksoyëm, mërli lu aǧa ste cayn hawxa. Hatu barye hatu!

Hawxa xalëş u cammo Aẖo mu bala du aǧa b Mëḏyaḏ w bi Bšeriye.

In reply to message #0
 
1

maaaaa!
man zmërlelëx zmoro l ẖiruṯo?
”ašër abri w lo nošo!...”
qay?

yabo ma lë kobëc
caqël, ftakar, hawno
qrayto, kṯawto, nëhoro

ma hani
mi qaẖwe bu skambil
mi cito bi barbariye
mi mtakazto bi bacṯiye
baẖ ẖaye laṯën w lë koṯën …

tamo dugle, xiyene, faẖe, benamusiyat
mëqqa malye …

aydarbo gëd howe xloşo
mu carab, mu fërs, mu tërk?

bi šira du Xalaf, du Sacido
zaţan maţina lu ẖëşẖaş di arco

In reply to message #0
 
2

hani ëšne,
blalyo, bimomo rahëţina
qţilan w maqţelan ruẖayna

sëmlan bayto, kule mu skambil
”hano alo baytoyo!”
qanëcina w maqnaclan an noše

ucdo kẖuzena, kuxo ste
ašër lawi!
Ma bu kuxo, man kit?

cadeyo, tamo kowe
këṯoṯo, calokat, calowat, zoǧe
kyëtwi, kqaymi cam ẖḏoḏe

u zoǧo mërle:
šqilëx ruẖayna bu ”waq waq!”
šamëcina këtlëx lu liyodo bëcto!…
Qum, nẖat li mëdco, luda!
Mëṯnëẖ! Maṯnëẖ!

Haaaa hawxawa gabayna
siyase di barbariye, di bacṯiye
bi cito, bu ẖuḏro, bu ẖuyoḏo
bu caza, bu cëmoḏo, bi mëštuṯo

Yalëfina …
ymoyo, šabaš, şluṯo, daca, klilo, bëroxo …
ytowo, qiyomo, ftoẖo d iḏo …
b dugle

Yacni, karyo w ẖalyo
gabayna hawi
foṯo w ţizo, dlo farq ẖa!

In reply to message #0
 
3

Bi siyase …
a ẖkeyat, haka kobi bësmo lu lebo
u meẖo kowe moţor, tam 24 kcowëd

i naqlayo …
Bi šayyarune, kobi l gabo
şurca ẖëşto d šoyër

haka a ẖkeyat … bu caks
d howën ẖarbo
këmšawši, kmaklën, kmadcëri
gabo w hawno la-xalf

hawxa kkole …
lebo, meẖo, zabno, doro
koṯe dawro, li cëtmo
cal kul ruẖo, hawxa kmišalţo

In reply to message #0
 
4

Këtwolan …

b zabno maz zabne, sniquṯo lë ẖkeyat ẖaṯe
qayëmwolan mawxa Mahdi, bu aşël faqqa
hawxa yalëfina hano ”ẖalal” w hawo ”ẖaram”

l ramẖël, lu ẖreno …

li gëmṯo, li manfaca, li maşlaẖa, cwodo cam šiḏo
ǧamo layt! ǧamo layt! ţawtoyo li gëmṯo!

bi ẖarayto du darbo, i ẖaqiqa nafiqo
Bacaṯkat, Cito, Xalaf, Sacido,.. huwwe

kobi baţ ţacne caqël, šira, siyase, barbariye, kalla,
şucre, ruqe, zawlo, qalto…

u ǧalţo ẖaroyo di ẖkeye …

mažbahle lu başlo, yawmo cal yawmo
qlëfto bëṯër mi qlëfto, knëfqo li ẖolo.

In reply to message #0
 
5

Karyo aw yarixo, ma mën kforëq?
Yabo këmmi: hanine aẖ ẖaye …
Naqqat naqqat, u mede dë kẖuzena, cajobo ste d howën
lo cal bolo, ǧalabe naqlat ma lo kmicajbina w kfëtẖina femayna
Kfoyëš hawxa ftiẖo, lu mede d kobi aẖ ẖaye
Naqlat naqlat, aloh koṯe yawme, ẖa lë kmalẖëq d omër: ẖayf w ǧabine!..
Mi zoriye ẖa kuṯele gaẖxo
Hedi kţëlbina şabër lu mede dë ẖzelan
Naqlat ste, b ǧafle ẖzelox aṯi
Mede xëd bëşuşo nacimo, kobe fëşẖo
ẖa koṯe d foyër
hedi kǧaytina w kmayṯina mu gaẖxo
Hawxa koṯe w hawxa kmalëx ste
Hamma ẖzelox w lë ẖzelox, këlle maţët lu yawmo ẖaroyo
Han naqla hano karyowe aw yarixowe, ma mën kforëq?
Hanine aẖ ẖaye w alo cayëšatte…
han naqla harke, talyo mën këtwo w mën latwo!..
Yabo aẖ ẖaye haniwën …

In reply to message #0
 
6

Ya nafšo

U mamro lašanoxyo,
mena ẖšawe waşiye w mena ste daca
Kul naqla baẖ ẖaye;
Qamayto, rẖam ruẖox, bëṯër
Mqabël d kul nafšo hway nsani
W lo naqla, lowët faloǧo, lowët mbarbëzono
Dayëm hway mcawnono w marẖëmono
Mar i ẖaqiqa, mar u šrolo, mar u msawyo
Hani ţrowën namus w ǧire lašanox
Hway yalifo, iḏo d Callo w Jallo lë mëskët
Hway ẖiro, cadël, klay si ẖaqqiye
Ţrowe sidox haymonuṯo, axlaq, adab
Dayëm gaẖoxo w fşiẖo hway
Mafşëẖ, mšabhër w ẖur la-qëddam
Mëftakër bi kayisto, suma w maceša
Harke maslëq i taqa d këtlox
Suma sabro, quwwe, şëẖẖa w ẖubo
Marwëẖ şadrox, marwëẖ u bëhën diḏox
Manqëş hawxa u ǧamo w u dard d këtlox
Hawxa mabhër foṯox d huwyo nahërto
Hway msamẖono, iḏox, lebox ţrowën lu xer
Li ţawto, li brëkṯo w li fadakariye d ramẖël
Lë ţocët! Hani ucdo w kul naqla klëzmilan.

In reply to message #0
 
7

Gabayna cito w kohne…

Gabayna b gawe di cito
mëqqa kito qërnawoṯo, gude,
maḏbëẖe, şaţre, beṯ-qadiše, hërore,
qëmësyoṯo, jëbbat w badlat,..
mcafnëke?

Ya noše!
hani këtxu xabro mënayye?
haka e, maru!
haka lo, maru!
ţrowe!

Mi zëcṯo d lalcël
hani tam tralfo
w čike ste acma
šato bëṯër më šato

Bu mamro ẖassani
lu cloyo w lu taẖtoyo
bi kohnuṯo, mërlan:
ẖasye w kohne mcalaye,
barëxmor!
madcarre: Alo mbarex ya greco!

Rabe w nacime, kulan kuḏcina
lo mu lebo këmmina b mamro
b dugle ste kmaydina jawab
gaban dost w dëžmën hawxana

Aẖnone, Aẖwoṯo,

haṯe bayn lu greco w lu moro
siyaseyo, hawxa grëšina
lam maye di duglo

Han naqla, sẖay w lë soẖët
l arco, mţoyo layt!
ga mërre: rawmoyooo loooo!...
ga daciri mërre: baẖër!

Bi ẖarayto nafiqo i duglo
ẖzelan këlle oqyanus …

14 šboţ 2014

In reply to message #0
 
8

Ya mimro,
be mën ẖale këtlox, yabo hat ẖzayya

haw fayišët b iḏi
ţreli menox, fëš b ruẖox

ëno lë malẖaqli Yacqub
b gawe du gubo, mẖalaqli Yawsef
b gawe du baẖër Muše

ţacino Yawnon b gawe di nënto
be qay?
U xaloqo han naqla lë ţacila

Ya mimro,
han naqla ẖiro hat
fur …
nẖat b šëbbak d nošo ẖreno

ţreli Šlaymun bu baxto d ruẖe
mëdli lu kursiyayḏe, manẖatli cal meẖe
b cayne ţër ẖoze, mënyo kursi d Balqis?
Lë qadërno a tre d malẖaqno
Cërqole maẖëtli baynayye
Be qay?

haymonuṯo l mën bu mimro
w l mën haymonuṯo b mamrono
kkoṯëw mimro b tarte daqayëq
këmẖalëq kul kṯawto ste bë kmo

mawqaḏli Abrohom b gawe d nuro lahëbto
be qay?

Ya mimro,
kumarno han naqla gëd maṯno
acmi hat ste hama mkamela w muṯ
de ẖzay be mën ẖale këtlox, maqḏayya

mamroyo, mawto abadan latle
kul mqadšo, lë ţocët, kmoyëṯ
haṯe balki latwa šrolo
maqbela xarţa

xu mimrano
heš lë ẖzeli hama ẖa, daywono dë mhaymën

In reply to message #0
 
9

Ḫur yabo gëd umarnox, šmacle
qarcox, la-qëddam li kayfatle
lebox, abadan lë ţëwratle
baxyo lë boxët, lë mašmëcatle

larwal, šalqat d dewo kit ha …
aṯoyene, fërqoco gëd mfarqëci ha
hanine am maǧëšone, lë ţocët ha
lebox, abadan lë ţëwratle ha

kul dard d qoyëm li raǧlo
dlo kloyo, mšayece lu cloyo
marle, ”heš këtli yawme, ţrayli d sëwacno”
lebox, qume abadan lë ţëwratle

haka këbcët d ẖozët baẖër
maftël i naqlayo foṯox l bëṯër
cayn xi šmayoyo, latyo ţawtër
lebox, abadan lë ţëwratle

kul buǧro, mëd marfelox azze
kul darbo ste bu halxo këzze
kul jaza mëd axilox këzze
lebox, abadan lë ţëwratle