Buyono siyasi (Surayt)

Last edited on Mar-08-2015 at 11:06 PM (UTC3 Nineveh, Assyria)
 
Aẖnone w Aẖwoṯo,

Ucdo kit hjomo qawyo cal aq qëryawoṯo du Xabur maţ ţaye fašist du Dacëš. Kit qaţlo d 4 gerilla şëroye mu xabro d maţi l Awruppa.

Meqëm b zabno, bëṯër mi masale d Kobane, mërwoli i dawle d Kamalo u ẖayf gëd maydole maş şëroye, ucdo bë šrolo kmaydole w gëd maydole.

Harke bu Face, ğalabe clayme dlo maḏco kẖozën gerilla şëroye cam tfënge w tarte kbodën bu gëyoco d “Gabbare, gabore....” Amma lë kobi ray w mnaqši, ag gerillani b mën ẖalene? W qay jbiri d maydi li tfënge.

Aẖnone,

Miyodo di tfënge kubacle caqël, doktrin caskari, strateji caskari,... ẖawrone bi Gozarto, lojistik, calaqa cam aq quwwat d këtne mqabël daţ ţaye,.... b hani kulle maḏco mena ḏacif këtlan w mena ste yaḏoce d nuqli hawxa maḏco nëquşo këtlan.

Bi manţëqa u dëžmën rabo tarixi d këtlan i dawle d Kamal’yo. Bu tarix a nẖore rabe hiyya masëmila. Ucdo ste hiyya kmasëmolën, ramẖël hiyya naqla ẖreto gëd masëmolën.

Awwël dë ftiẖ masale d cito, abico d marfiyolan bë ẖḏoḏe, kowe w lo lë kowe cito. Bas hiyya, bu pilanano, mẖaḏarla aydarbo gëd mëẖyo i Gozarto w ucdo këlle bdela.

Bu rišo ẖreno ste, sëmla calaqa cam i YPG w cabiri lašan u qawro d këtla, kit mede taẖt maṯe ste, u cboro latyo cal u xalyo.
Ucdo këtli kmo širat...

Ag gerilla şëroye, b ğalabe mëdone ḏacifne, harke b Awruppa mën diplomasi, koordinasyone caskari, siyasi,... kiban d sayminalle?

Harke bu Face, huwena mqabël dag gerilla d këtlan ëlla mdafcina aclayye? Ayna kayisyo?

Kiban sayminalle propoganda dlo klayto siyasi? Aw lo?

Mën ray këtxun, mena mnaqšinale w mena ste mancëlina u Dacëš w i dawle d këtyo bëṯër mu Dacëš, i dawle d Kamalo klozëm d mancëlinala.

Kiban maẖtina boyqoţ, mal mi dawle d Kamalo dlë šuqlina? Mën këmmitu?

In reply to message #0
 
Buyono siyasi

1

Aẖnone w Aẖwoṯe,

I dawle d Kamalo, bu tarix macëšlalan mërore mayire. Hul ucdo ste dlo kloyo këmdawmi am mërorani. Sayfo, Sayfe, qaţle, nẖore,... ğalabe masëmla bu tarix aclayna. Këtwo zabno malyunewan, ucdo hawina kuxo d këṯoṯo. Qay? Maḏco nëquşo këtlan!..

Baq qaţle d sim, gawre nẖiri, gawre qalibi cal 30, niše, nacime, bnoṯo,... ntiši, jbiri bi quwwe du sayfo, simi 30. Harke u dëžmën dayëm mëstacmele i ḏëcfiye d gabayna, mawxa lë qadërina d mëẖena ẖaşe bi arco.

Aẖnone, Aẖwoṯo,

Adyawma ste këtlan aḏ ḏëcfiyat d këtlan, cal iḏe du dëžmën kquncina l cito, l madrašto, l čay, lë šlomo,.... w huwwe cayne li ẖile. Aṯmël ste mëranwolan hano yacquboyo, hano nasţërnoyo, hano malkoyo, hano marunoyo, hano katolik, hano përuţ, hano ortodoks,... w ẖa b ẖa qţëlina.

Adyawma këllan heš b cayni ẖawya! Fliğena, mbarbëzena, ortodoksna, katolikna, përuţna,... w haj mën kowe aclayna, nëquşo këtlan.

Aẖnone, Aẖwoṯo,

Mdarbe d uxlina u başro dë ẖḏoḏe, kiban mcawnina ag gerilla ḏacif d këtlan aw lo?

U ray diḏi, man këtle caqël b qarce, klozëm mqadëm dë mcawën, dlo, i Gozarto cëmra hawi qariwo! Gëd quţli hul lak këṯoṯo d këtlan tamo.

Haka lebayxun gëd foyëẖ, w gëd ëmmitu “oxyay!” lë mtanetu, mdawemu bu štoyo du wiski.

Haka d ëmmitu lo, mën kiban cam ẖḏoḏe d saymina?

In reply to message #0
 
2

Heš baš 70’yat, bdewole d korëx propoganda di waldër-ẖaramtiye baynoṯayna. Man d mëžğalwo cam siyasi kurmanj, qurewo kṯowo cal kurmanj,.... ëmmiwo: Hano kcowëd cam ak kurmanj!

Hënne cam man cëwdiwo? Nošo hul l adyawma lë mšayele!...

Aẖnone,

Nafël hawxa kewo d falj aclayna. Raẖëqina mu qariwo w mu raẖuqo. Haw qrelan lo cal ruẖayna w lo cal ğer mënayna. Fayišina ẖëţëm!

Aṯën ad dardat, ab balawat, aq qaţle,... aẖna damixe bag gale!.. Siyase layt! Caqël layt! Ramẖël layt!

Hawxa mdabarlan kul mede w naţërina, ema gëd noẖët nacle šmayoniṯo cal u qaţolo!... Kulan b caynayna ẖzelan, mede lë naẖët w lë knoẖët!..

Ucdo ste cayni propoganda bdela kbërmo, haṯe dezinformasyon’yo, i ğaye mena, d fayšina pasiv, rafye,... bëṯër gëd ëmmina “oxyay! Ma l man mërlellxu msaku tfënge?”

Aẖnone,

Tfënge dlë mëskina ste gëd quţli! Këtlan tajrubat ğalabe mu tarix. Bu Sayfo, lak kuhne b ğalabe dëkoṯo, ţralle u camo d maslëm u silaẖ d këtle. Bu silaẖano d layëm aq qaţole qţëlle ẖa b ẖa maş şëroye!

Aẖnone,

U silaẖ namusyo! Dlo mene cal arco w cal camo dëfoco, aydarbo gëd howe? Këtla ëmkan?!

B Ciwardo, b Hazax, b Ḫaẖ, bi Dayro du Şlibo, bi Rayëţe,.... dlë hëwewo silaẖ, man gëd fašwo cal i rağlo?

Mẖasyo d Bëhnam Caqrawi, ẖasyo b Hazax mërle lar rabe: Abri i arco namus’yo, qumu malemu ruẖayxun w mi saleẖu, mdafecu acla! Alo mbarëx cal kulxu, ëno w u şlibo acmayxun! Qaţlo du dëžmën aclayxu w acli ẖalalyo!

In reply to message #0
 
Buyono siyasi

3

Ha Gozarto ha!
mdayën gabëxna, miṯe sağ
dlo fëršono, kulan tamona!

acmayna, ruẖo d Hazax
Ciwardo, Ḫaẖ,....
kyumena, heš lë mayëṯo!

msawyo mnayšenu bu kalaš
b lebe du dëžmën marfawu
ẖanak layt, aţlahiye lëbetu

miṯewan, maẖëslan!
jriẖewan, nayëẖlan!
ţawicewan, nxëšallan!

kaṯina mdayenu!

Hay hawaryo aẖnone!

ma miṯe hatu, ẖës latxu?
ẖaru bote! Ciwardo aṯmëlwa!
Baban, eman, ẖëltan w camṯan
Alo tamo bëzze šanan admo

ma ţacitu Hazax?
tamo yaqëḏ babe d Camar Naji Bag!
ẖawro d Anwar, d Ţalcat, d Jamalo
cal iḏe daf fëdawiye d Ḫanna Gabre

Aloh b kurmanji mërwole lu yaqiḏo
du dëžmën ţayo b kurmanji:
Ame čacve dëžmën yakko, yakko darenën!
Am xalke Hazaxe’na! Warën lawo!

bac b Ciwardo mëqqa mhawarre
fëdawiye d şëroye b kurmanji:
Warën şabbavno warën!
Am bandi wana!