Last edited on Mar-08-2015 at 11:07 PM (UTC3 Nineveh, Assyria)
Qašo Išoc Be-Muro (Şengül)
1915-2015 Ciwardo, bi sëbbe du qewomo d hawila bu Sayfo mqabël di caskar tërk, kurmanj, mẖalmoye,... këtla bu tarix ëšmo rabo. Hawili zabno baš, harke mfatašli, maltamli ğalabe medonkat d komiḏoci w dlo komiḏoci. Disa, heš kit ğalabe medone, dlo kuḏcinanne cal Ciwardo. Hani hedi-hedi kolozam d laymi, lboy d howe tarix kobe maḏco... Aẖnone, Aẖwoṯe, Bu cwodo d këtli, lo Sayfo w qewomo l ẖuḏe komšayalno... Komšayalno cal meqëm w cal bëṯër mu Sayfo ste mën hawi? Qay w aydarbo hawi? Hani kobëllan sababe, adyawma qay bi ẖalaṯena? W hani layban tolinalle, aşlan lë kmëtloyi!... Mëqqa d tolinalle, yawmo ëlla, li ẖalo gëd nëfqi. Cayn xu Mgalyën d komër: Gelo taẖt me kefo lë kofëyš, yawmo ëlla gëd nofaq l larwal. Qašo Išoc, meqëm d howe qašo bi qriṯo muxtarwa. Harke cam i muxtariye bdele d komaltam bnoṯo nacime w komawballe lë Sţanbël. Tamo mfalağwalle b kalla cal aş şuroye, cal ar rum, cal an armënoye w cal at tërk,.... Ḫţiṯo, wlo ẖḏo manne tërki, carabi, armënoyo,... lëḏciwa. Bu cwodano, qašo Išoc cwëdle hul d azze l Amarika, lo matrakle. Mëqqa kalla mẖayşele? Maḏco latli! Aẖna b Mëḏyaḏ, bi sëbbe di tajara d samwa ban niše, rabe w nacime uḏciwaynale. Noquşo mëḏyoyo dlo koḏacle. Komarno b Ciwardo ste, noquşo nošo dlo koḏëc be mën samwa... Komaẖëtno bolo, kul nošo komoyëd bërkoṯo ma şlawoṯo d këtwole, ”.... şluṯe caman, miẖasena ba şlawoṯayḏe...” hano mën šëkël mšiẖoyena? Faqirkat da bnoṯo, hul adyawma, he l nošo abre d babo ste dlo mdafacle aclayye, hano haqqa mašiğena mi nošuṯo? Af faqirkatani, sahmo xëlle samo w mayiṯi, hëna mẖalaqqe ruẖayye bam maye dë Sţanbël w mayiṯi, hëna maţën li karxana d Qarakoy (Karaköy). Hëna lar randewuye bë Sţanbël w hëna ste lan utelat... Baynayye d hawëlle nacimkat, w an nacimkat mẖalqi qëm jamiyat bë Sţanbël. Hani, ğalabe ciwarnoye w ğer mac ciwarnoye ste kuḏcënne, qay lo komëžğolënne? Ma a bnoṯani latwayye şuroye abne d şuroye? Haka nošo këtle jawab, harke ţro dlo nëkfuṯo mjawable...
|
