Faţëryarxo Yacqub da III Aẖna gabayna, noše nëquşo d kuḏci ba fnasëkat d këtte lak kuhne. D kuḏci ste, yalifi këmkasën aclayye. Hano ğalţoyo, ẖzelan mene ğalabe ḏarar bu tarix. Bu aṯro, këtwolan sabab ëmmiwo: Hama i ţayuṯo dlë šëmco! Maṯle w mamre xëd hani li cito mëfqowalën, lašan d fayšo hiyya sarrëk b kul mede aclayna. Aẖnone, Aẖwoṯe, I naqla šex aw malla ţayo d samwo mede ẖarbo, ba mëqqa bësamwolan!... Bay yawme w baj jëvatat makrëxinawo ẖogërganat acla. Bas i naqla d huwewo cal kuhno, yumenawo b dugle alfo talaqat lašan dlë mibahdël. Cayni kuhno ducarwo w samwo cayni mede... Hedi aẖna ac cëlmoye ducrinawo w ëmminawo: Yabo nuro w nuhrone, bala dëṯṯe bë qḏolayye. Ksaymi ẖţiṯo, alleyo! I masale hawxa şuxrinawola. Faţëryarxo Yacqub, šato 1957 hawi faţëryarxo bëṯër më faţëryarxo Barşom. Meqëm mena ẖasyowe l marciṯo d Šam w Bayrud. Ga tamo w ga harke maqḏewo zabno. Bu zabno di ẖasyuṯo, yalëf d oḏac la bnoṯo ẖalye d Bayrud. Zlam cal bëng diḏewe, uxalwo w šutewo acmayye. Hawxa i masala maţyowa lu kef ste. Haṯe hawxa grëšla hul d hawi faţëryarxo. Aṯi yatëw b Ḫëmëş, ẖzele latyo dëkṯo d kibe coyëš eba. B riše dan 60’yat amţele i faţëryarxuṯo lu Šam w fayëš tamo b riša. Harke sëmlewole dayroyo Şaliba Šamcun sakratar l ruẖe. Be mën šuğlone këtwola li cito bimomo huwwe samwolle w mẖaḏarwolle. Bas d huwyowa i saca 6 aw 7 d caşriye, u dayroyo mëgrašwo li odakayḏe, mën d kowe bi faţëryarxuṯo, hedi haw ẖaruwwayle. Faţëryarxo Yacqub këtwole sakratar ẖreno, hano du lalyowe. Amţewo, kul lalye dë cruto claymoṯo šamiye li faţëryarxuṯo. Faţëryarxo Yacqub mawşewo lu sakratar du lalyo, “abri d oṯën, dlo šarwole ţër oṯën”. Hawxa zabno aṯën. Cajëz, dacër lu sakratar du lalyo, mërlele: Abri han naqla b šarwole ţroṯën! Han naqla huwwe b iḏe šëmaţwo w mašmaţwo aš šarwole dan abnoṯo šamiyat.
Faqiro du dayroyo, mšayliwole, bramšël “mën qalabalëğwa su faţëryarxo?” madcarwo: Yabo dayfe du lalyo wayne. Noše koṯën komaşlëwi qëm iḏe. Crutoyo, dukkane w šuğlo latte, koṯën!
| 
