Saymina kritik, šafiro, Hano ţurenale b macna d howe madra.....

Saymina kritik, šafiro,
Hano ţurenale b macna d howe madrašto aw čačma?
Ayna kayisyo?

Më Jan Beṯ-Şawoce

In reply to message #0
 
1

Maṯlo komër: Abro, lo l jërẖo, l mëklo, hway malẖo

Ma aẖna aynana? Haka l nošo këtle fëkra, yabo kṯawulla, kubac ëno ste, cayn xëdwoṯayxun d yulafno. Haka lë kṯëwxun, ma aydarbo gëd yulafno? Këtla ëmkan!

***

Siyomo kritik, ẖaqyo, latyo abadan lo caybo w lo ẖţiṯo. Ma dlë saymina aydarbo kiban ẖuzena, nëquşe w ziyude d këtlan?! Kiban dlo kritik hani ẖuzenalle?

***

B masale d ëmṯo, man mënayna ẖţiṯo latle! Haka kit nošo dlo ẖţiṯo, maru!
Nëkfuṯo layt! Maru!
Nacum Fayëq, Yuẖanun Dolabani, Aǧa Pëţrës, Malik Qambar, Mor Šëmcën, Surma, Afrem Barşom, Alyas Xalaf, Xalaf Xalaf, Ascad Ascad, Gabriyel Afram, Asmar Xori, Cabdo Šaxxo, Šamcën Ğanno, Gawriye Use, Afram Cabbude, Bënyamën Be-Baššo, Ablaẖad Be-Gallo Šabo,.... kulle, kul ẖa b šëkël këtle ẖţiṯo.

Cal an nošani w ǧer man nošani, cwodo b cayno dë kritik, hul ucdo lawi. Mën cwodo d kit aclayye, kmaẖwelën këkwe bi šmayo. Wlo ẖa, ǧalţo xëd fëlso ste lë kmitaẖwe aclayye.
Qay?

***

Aẖnone, Aẖwoṯo,

Kulan qayimina b marduṯo d huwla cito. Hadomo b cito nasţërnayto, kritik lë kmaqbël acla. Hadomo b cito Yacqubayto, kritik lë kmaqbël acla, lašane mqadaštoyo. Marunoyo, Malkoyo, kaldoyo, katolik, pruţ, Yahowa,... kulle hawxa.

Harke cël mi adro d këtlan b Facebook, kmaẖtitu bolo, më tamona aṯoye. Hawxa yalëfina w ǧer mede, këtlan ẖawşalţo ǧalabe cëqto lašane.

E, bac šëryono?

Layt! Gëd mdawmina mşacrina w rayqina cal ẖḏoḏe...

Hawxa gëd şëfyo?

Ëno këmarno lo! Latla ëmkan b hawxa caqël d şëfyo, w l dëkṯo ste kayisto, layban mëţena.

Mdawmina cal şucre w ruqe, ëlla ẖuzenalan darbo d caqël w hawno...

Ayna ţawyo?

Kṯawu, lë minakfitu!

In reply to message #0
 
2

Maṯlo komër: Xabro, kibe mfarqëc šeno sţam.

Bu kritik, kulan këtlan ẖawşalţo ǧalabe cëqto, l fëkër d ǧer më ruẖayna, iqoro latlan... Aydarbo han naqla kibe howe kritik?

Aẖnone, Aẖwoṯo,

Haka kritik lawi, šuǧlo d kit b iḏayna cëmro karyo këtle. Haw kuwele šanş d malëx b darbo yarixo.

***

Nošena, ǧalabe mede ţabici, b meẖo gëd huwelan ẖëlme, fanţazi, xayal,... dlo ẖawruṯo, mahwo w šqolo, diyalog, lišono, qariwo-raẖuqo,... aydarbo gëd fërqina kit w kowe aw lo?!

Hani w ǧer mani, mede ǧalabe ţabici gëd howe b gawayye pozitiv, negativ, basimo, ẖalyo, mayiro, ẖamuşo, nacuţo, šaẖino, jamudo,... bu ţacmo. Nošena hawxa klozëm d huwelan! Hano latyo lo caybo w lo ẖţiṯo!

***

Haka kuḏcina lë tre xabre, i macnayḏa latna w lawina faylasufe. Gabayna hawxa samyuṯo b meẖo koṯe mi “olaf-beṯ” d yalëfina b cito. Madam nafšo kuḏco “olaf w acma beṯ” xalaş, ucdo hawxa nafšo kul mede kuḏco. Yacni Mgalyën, fanqiṯo, ẖësoyo, šẖimo, gudo, abo waẖid, abën d ba šmayo, bëroxo, cëmoḏo, lëwoyo, Mor Afrëm, Mor Bardayşan, Mor Nasţur, Mor Yacqub, Mor Marun, qadiše, šliẖe, faţëryarxe, ẖasye, kohne, dayroye, dayriyoṯo, šamoše, šamëšyoṯo,... bëṯër? Bëṯër law fayëš mede!

Haṯe w ǧer mena, nqolo ma 30’yo. Sofiko b daqno, kit acle ëšmo “baẖër al-cëlum”. Ayko qrele, nošo lë këmšayël. Mën qrele, nošo lë këmšayël. Mën koḏëc, nošo lë këmšayël.

Balki 30 naqlat qrele u kṯowo du Kačal, haṯeyo, zëd layt!
Gabayna ste cayni medeyo. Kohno qrele Mgalyën, nëqţo. Fahëmle, lë fahëmle? Nošo mënayna mtiẖan lë sëmle.

***

B Awruppa, yaḏoce kqorën cëmrayye kule b univarsita, b akademi, b madrašto clayto,... i naqla nošo d këmšayelën, mën yalëfitu? Mën kuḏcitu? Kmadcëri: Heš mede lë yalëfina!

Kmaẖtitu bolo lu farq!

W hanine, an nošanine dë xlëqqe u qëdomo d kit bu yëlfono du cëlmo. Mudu mu akonomi w slaqu w nẖatu b kul mede.

Ayna myaqrina!

Ad dugle ëlla u šrolo!

In reply to message #0
 
3

Maṯlo komër: Bi siyase cboro, mu wariḏo kowe.

Aẖe w Aẖwoṯo,

Harke kẖuzeno ǧalabe noše, këtte ẖiyërto negativ, qay kit ǧalabe ëšmone lu camayḏan? Qay këtlan ǧalabe gabe, tukose, šutose,....

Ëno latno mqabël d howe sidayna ǧalabe ëšmone (oromoyo, kaldoyo, aṯuroyo, ošuroyo, šuroyo, şuroyo, bëbloyo, ninwoyo,....) w ǧalabe ẖarakat siyasiye w falsafiye. Xwazi d huwelan xani ẖrene w heš zëd ste.

I naqla d howe ǧëlba, kowe zangane zëd bu fëkër, bi falsafe, bi qale w bu cwodo d këtlan lu mëstaqbël.

Bas harke kit mede: Hani asas d këtte, haka qimene cal caksiye, mqarrasiye, bcojo lë ẖḏoḏe, qšoco d cayne dë ẖḏoḏe, barbariye, dino, maḏhab, cito, saktariye,... bas lë ẖrowo d bayto, i naqlayo lo! Lë këbacno!

***

Awruppa bëṯër mu ẖarb da 2, b kul ẖaqlo, kritik sim asas. Adyawma layko maţyo, nëqošo lë kubacla. Ma marke dars layto d maydina?

Aṯina l sidayye, hawilan cël më 50 šne, mën yalëfina mënayye?
Gab qoḏe mazlo, këmarno lë klozëm: W lo mede kayiso mënayye lë yalëfina! Qay?

Naqla ẖreto kubacla nëqošo. Haka aẖna lë mnaqašlan, b dukṯayna man ţrë mnaqëš?

***

Këtlan ǧalabe dardat, šëwole, jurẖe, zaqţe w barbuţe b gëšmayna. Hani aydarbo kiban manëẖinalle?

Mjarablan, balki më qëm ruẖayye nayẖi, lë nayiẖi.
Ucdo ẖaṯo, bdelan ëšmo d maẖësina, hawxa lë kowe, klozëm d saymina mede!

Mën? Heš maḏco kamilo latlan!

***

Gëd ducarno lu rišo.

Ag gabayḏan w at tukose d këtlan. Naqla mede sëmlan maraq, Alo hani këtte falsafe d siyase (semolo, yamino, liberal,...), program, propoganda, taktik, strateji, caskari, diblomasi,... Alo hani mën këbci?

In reply to message #0
 
4

Maṯlo komër: Qale d qaţën w cëbëgro, kuḏcitulla?

Aẖe w Aẖwoṯo,

Bi siyase kit taktike mšakle, hani maclumyo këtte xabre ste mšakle. Hani cal dlë macwëdilan b lišono d këtlan, kẖëšwina b gawe latlan hawxa xabre.

Hano ǧalţoyo!

Maṯlo čaẖčakune, čëẖofo, gërgošo, zor, faẖo, tfoko, ẖës d dënnaga, dëbolo, mţoyo, qallës,...

Bu zabno ẖaroyano, hawi ǧalabe fëqoşo, şforo, hëworo, fiyoẖo d lebo,... l Putin, l Baššar, lë Trump,.. bëṯër hjomo, cënoto, kroho, ẖfoxo l gabe w l came,.....

Qamayto gëd bëdeno cam Trump...

Ac carabkayḏan, b lišono d Kačal, maclalle l parriyat di šmayo, i naqla d šamici Walid Farës, Gabriyel Şawme, simi mšawrone b waziruṯo barayto d Amarika l šëwole b Madënẖo.

Haṯe latyo awwël naqla haaa, i naqla bu Swed ste d hawiwo u Brahim Şalẖoyo (Baylan), waziro, cayni mede hawi. Mën ţlëblan mene d soyëm? Lo mede! Mën sëmlelan? Lo mede!

***

Aẖnone w Aẖwoṯo,

Cayn xëd 2-3 yawme d mëštuṯo d kowe, bi siyase hawxa fëşẖo l zabno karyo lë kowe. Han naqla dlo mede cal warqo kṯiwo w hano b lebo w meẖo zrico, mën kiban ţulbina më Walid w më Gabriyel?

Bu nëquşo l mëštuṯo, kulan rabe w nacime, cal lebayna kuḏcina mën kobëc w mën lë kobëc... b hawxa yawmo ste, kţurena fëşẖo d këtlan këkwe bë šmayo d šëmcile. Bëṯër mëd tayimo mëštuṯo ste, këmşacrina baţ ţacne, kyumene b alfo talaqat, mëštuṯo basëm mena b arco lawi!

Amma bi siyasi ẖëḏriye layt, mën këbcina layt, man mën kobëc layt, layt w layt!

Walid, Gabriyel,... më Amarika mën gëd uballan?

Haka b caqëlne, ma lo gëd mšayli mënayna: aẖuno këlla fayëto i damme l iḏayna mën saymina? Mën këbcitu?

Mën jawab këtlan? Harke nošo kibe mjawëb!? Gëd mëfşaẖno!
Gabriyel Şawme, u yawmawo nafëq bu talawizyon d “ẖayat” cam Rašid. Şwëcle u Madënẖo kule şëroyo, tamo huwwe ste koḏëc, safruno ste l darmono lë fayëš.

Mërle Kuwayt, Yaman,... šrëẖle be mën macna këtte, amma ţamo safruno şëroyo layt!

Aẖna ste harke b Awruppa lë këbcinalle xëd arco laẖna, e natije mën gëd howe?

Ma hani l man ţër fayši?

***

Bi qamayto bu Swed, bëṯër bad duwal ẖrene d Awruppa, tre mëdone mu lebo d këbcina hanine: b ëšme d ẖuḏro qaẖwe lë skambil, da tre cmara d cito.
Hani 50 šne hani qadërina d markëwina. Ucdo ste këbcina zëd d howën w kcëwdina d zaydi.

Mede ẖreno kubaclan? Haka kobëc, harke maru, lë minakfitu!
Be mën ǧer kobëc ruzulle harke, gëd mqadminale l Walid w l Gabriyel.

In reply to message #0
 
5

Maṯlo komër: Cabërina b ţaro ǧalabe ciqo, eee, w nfoqo mene!?

Aẖe w Aẖwoṯo,

Bas maṯlo gëd ëbeno lašan d howe fhomo l masale d këtyo ǧalabe muhim bi siyase...

Aẖna xëd camo, ẖëšwina camo rakiwona, kuḏcina mën këbcina... Baynoṯayna qaẖwe dë skambil, dugle, şucre, xëpoyo, smoyo b dino w maḏhab,... ǧalabe nëquşo. Amma mqabël d haṯe, krëẖmina arco, kubena qale, admo, damce, ẖaylo, kalla, tacbo,... lašan d maydinala mu dëžmën kolonyalist tërk, carab, 30,...

Kulan yaqiḏe d lišonan, këtlan kaṯowe w yaḏoce b ǧalabe ẖaqle; bu akonomi, bi siyase, bi caskariye, bu diblomasi, bu lobi, bu yëlfono, bu sër, bu stëxbarat,... b gawayna kmosëk iḏo d dëžmën bam mo %1.

***

Këtlan gabe mšakle: A, B, C, D, E, F,... kul ẖa b šëkël kobe qale lašan d maxlëş arco mu dëžmën kolonyalist. Amma latne “ẖa”. Kul ẖa këtle program lruẖe, ẖa kobëc dawle šriṯo, ẖa kobëc oţonomi, ẖa kobëc muxţariye, ẖa kobëc šarake cam came ẖrene,...

Kulle ẖzalle w maţën l qanaca kamëlto, hawxa fliǧe cal dëžmën laybën. Dëžmën qawyo këtle kul ëmkan; hawa, arco, maye, taknoloji, stëxbarat, şaţalite,...

Aẖna ste bas fëdawiye w gerilla cal arco. Acmayye kalašinkofat w silaẖ arconoyo ḏacif mqabël d ţiyara w ţanq.

Dëžmën dlo aţlahiye, man şëroyo knofël b iḏe dlo farq, bi dëkṯo kquţele. Sëmoqo, ẖëworo, komo, šacuṯo,... lë ẖarule. Muhim cal foṯo d arco şëroyo b ẖaye lë kobëc d ţore.

***

Ag gabe d lalcël ẖzalle, hënne w u camo b tahluka rabṯone, čara ǧer d howën “ẖa” latte. Ar riše mërre: Aẖnone! Mën qatre këtlan, hani adyawma ţurenalle l xaşra! Dëžmën fërşa l ẖa mënayna, lë kobe kqoţël.

Toxu saymina jabha! Mën caskar, fëdawi, gerilla këtlan, kulle sayminalle “ẖḏo” quwwe. Maẖtinalan program w malxina acle. Mën këmmitu cal hawxa?

Harke dlo farq gëd ëmmina: b šayno l kul ëšmo, gëšmo, gabo semoloyo, yaminoyo, ëmṯonoyo, citonoyo, oromoyo, oṯuroyo, kaldoyo, şëroyo,...

La’an i ḏarbo cal kulanyo! Hawxa d malxina gëd miẖëkina cal iḏe du ḏëžmën!

Mën këmmitu? Saymina ruẖayna “ẖa” aw lo!

Bu Sayfo Hazax w Ciwardo hawxa sëmme ruẖayye “ẖa” mqawamme qšëcce cayne du dëžmën, adyawma aẖna kiban saymina hawxa aw lo!

In reply to message #0
 
6

Maṯlo komër: Yabo hama d ëmmina: ëno, ëno w lo hat! Yalla, mëqšët marke! Cayni dlë ẖëzyolox!

Aw cayni maṯlo hawxa d howe: Yabo aẖna, aẖna... aẖnana du aşël! Hatu mayko layko, man kuḏacxu! Mayṯitu fëqër abre daf fëqër!

***

Aẖe w Aẖwoṯo,

Bu maṯlo d lalcël xabre d kit, këmarno nošo mënayxu, nëxroyo aclayye layt! Mëftakeru ëšmo bënne w ẖzawu hani mëqqa ḏarar huwallan bu tarix.

***

Gëd ducarno li masale d sëmme “jabha” l gabe d këtlan.

Ţrawu d ëmmina sëmme jabha w maẖëtte ëšma “ẖaylo d gabe b Beṯ-Nahrin”. Harke şëroye madënẖoye w macërboye mšarke. Maclumyo, ǧer maş şëroye kit came ẖrene kcayši b Beṯ-Nahrin. Maṯlo čalkoye, carab, kurmanj, şabiye, mẖalmoye,...

I jabha d Beṯ-Nahrin, mede ţabici gëd saymo calaqa cam am muxalëf d kit b gawayye mqabël du dëžmën. Yacni haka u dëžmën Tërkiya’yo, b gawayye man kit mqabël d Tërkiya kmisëm calaqa acme. Bi calaqa mede ţabici kowe, mahwo w šqolo cal masale d dëžmën aydarbo maḏcëfinale, ţëwrinale, maẖrëwina bayto d këtle.

Harke hawxa muxalëf, ya kmišarki b jabha w ya ste kmisëm acmayye taktike caskariye mqabël du dëžmën.

Maṯlo, haka harke calaqa cam mẖalmoyeyo.

Aẖuno hatu a mẖalmoye b qëryawoṯo d këtxu mẖawu baq qaraqole d këtte lat tërk, lë ţuretu caskar, pulëş, muxbërji sidayxun. Man kit sidayxun cam dawle noše, hani ste mkaferunne. Šanş d fayši cal raǧlo lëbetunne.

Hani cël më arco d Beṯ-Nahrin kmisomi.

Ğer mawxa, i jabha larwal du aṯro ksaymo diblomasi. Harke man kit dëžmën lu dëžmën d këtla li jabha, kmisëm acma mahwo w šqolo siyasi. Hawxa dawle kiba obo l jabha silaẖ, kalla, lojistik, darmone, yëlfono caskari, propoganda b radyo, talawizyon, bë mgale,... ẖşoro (ambargo) b akonomi, yacni haka kit calaqa cam u dëžmën b akonomi, hani kmëqţoci.

***

Ğer mawxa, l goran du program d këtla li jabha, yawmo d mëţyo li ǧaye d këtla ste, ucdo këmẖaḏrola yaḏoce bu akonomi, bi siyase, bu diblomasi, bu yëlfono,... ksaymo qëwolo cam duwal d këtne dëžmën lu dëžmën. Tamo kmaqriyo b univarsita, b akademi, b madrašto clayto,.... clayme, claymoṯo,... d këtla, lašan bu mëstaqbël d howën riše bi dawle ẖaṯto.

Hawxa jabha d gabe këmẖaḏro lu mëstaqbël camo d këtla.

***

Ma ucdo aẖna hawxana? Kmëftakrina b hawxa mede?

In reply to message #0
 
Last edited on Dec-10-2016 at 12:01 PM (UTC3 Nineveh, Assyria)