Aẖnone w Aẖwoṯo,Ceḏo d mawlodo d moran w šato ẖaṯto cal kulxun hëwyo, brixo! Ceda d yalda d maran w šita xatta, hawën brixa!
Aẖnone w Aẖwoṯo,
Quman heš kito darbo ǧalabe yarixo, d cuwdina cam ẖḏoḏe b fëhëm, b caqël, maclumyo u darbo gëd rowëẖ aclayna. Haka d saymina bu caks, zëd mu mede d këtyo ciqo, heš gëd macëq aclayna. Kmëtyaqanno, hani zawno, qadërina d xulqinalan ”Adro d siyase”. Harke kul šëkël fëkër dlo zëcṯo këmqadmina w këmnaqšina. Mëftakeru hano d qudrinawo d sayminawole heš baš 70´yat, bat 80´yat,.. cajaba ucdo u halxano mëqqa gëd malxinawole, aš šëwole muhim d këtlan, mëqqa šarye gëd huwanwo?
Kulan kuḏcina lawi!
Aẖnone w Aẖwoṯo,
Kmanţeno l bolayxun u maṯlo d komër ”Më falge du darbo ste dcoro latyo ǧalţo…” Kulan këtlan mëdone b lebayna talye l ramẖël du camayḏan. Hani haw ţurenalle talye, mëfqinalle w cuwdinalle, w dlo aydarbo hani gëd miḏoci? Kmëtyaqanno, ucdo cam ẖḏoḏe nafëqina lu halxo bu darbo. Lë ţucetu u darbano kibe qurfe, kefe, qatore, kube, faẖe, mayënaţ, mašlëẖone, qaţoce d darbo,… hani kulle kubacce cwodo. Dlo cwodo më qëm ruẖayye zaẖmeyo d mayli. Harke kubaclan noše d yëlfi li şënca du cwodano, kul şënca w kul şëncatkar kluzamlan… Lë kowe d mëlfina ruẖayna, hano klozëm w hawo lo! B dukṯe d haṯe ţurena u tarix d maẖwelan mënyo u lazëm w mënyo d latyo lazëm. Bu cwodano d qumayna tacbo gëd howe, amma ǧëbën ţër lowe! Ǧalabe cayboyo bi siyase! Barbariye ţër lowe, caqël ţrowe! Jahale ţër lowe, maḏco ţrowe! B samyuṯo l šëwolo lë mqadmina, qurena, yulfina w bëṯër mqarwina! Mawxa qurena, qurena, qurena w naqla ẖreto qurena. Yëlfina, yëlfina, yëlfina w naqla ẖreto yëlfina. Lišonan şurayt bi qamayto kobëc d yulfinale, kobëc b maḏco d ţurena mu lišono du Kačalo w d Kamalo. I dacwaṯe diḏan këtla qale, i qalaṯe qale b ẖaqyo w qale d camoyo… gëd howe damce d fëşẖo w gëd howe damce du ẖëzën, admo, qaţlo, ẖabis, cëḏobo,… w kul šëkël d ẖarbuṯo. Hani kulle lë kowe d madcërilan mu darbo d malaxlan acle. Hani kobëc d howën dayëm b gawe du ẖšowo d këtlan.
Haka camona w këbcina d fayšina camo, i naqlayo bu halxayḏan lë kowe d kulena, mdawmina.
Jan Beṯ-Şawoce
18 konun-qamoyo 2012
|
