Šamcën Bë-Kurke,
utel du Šamcënke b Mëḏyaḏ… Kumarno ğalabe noše kuḏacle. Këtwole utel. Lu utel, mu yawmo d yawma amţewo niše. Han naqqa bu utel, ag gawre b ẖaq dëṯṯe, blalyo w bimomo cëmliwo acmayye. Qamayto i dëkṯo du utel, hëwyowo harke cal feme du darbo Şliwo (Dörtyol), bab bote Bë-Cabdiyo. Tamo këtwo ǧaraj, du cammo Ëllo Bë-Hëšše. Hano u cammo Ëllo, hëwewo u babo d Jërjis Lolo. Heš ban ëštiyat (1960), ëmmiwole u “Ǧaraj” aw u “Utel du Šamcënke”. Koṯe l boli ǧalabe kayiso. Këtwole dërto rabṯo, macbëriwo a ţrëmbelat l gawa, misëmiwo parq, am more sëlqiwo lu dmoxo lu utel. Heš may yawmoṯo du Sayfo fayëšwo harke hayido.
B Mëḏyaḏ rabe w nacime, uḏciwo kmitacwëd niše bu utel. Këtwo b Mëḏyaḏ ğalabe gawre şëroye, hënne ste ëzzënwo, cëmliwo cam an nišani b ẖaq dëṯṯe. Bi harayto daẖ ẖamšiyat (1950), aṯi lu utel, niše ẖaṯe. Be mayko aṯënwo? B Mëḏyaḏ ag gawre šamici bënne, azzën blalyo sidayye, huwwe ẖaq dëṯṯe, cmalle acmayye w nafiqi. Hën mag gawrani, ţabi laḏici, qayëṯṯe kewo du zaẖmat-frangi (syfilis). Ḫa mani d qayëṯwole u kewo du zaẖmat-frangiyano, huwewo u cammo Aẖo Bë-Mešëke. Naẖodo dak kefewe. Ak kefe nẖide d nuẖadwo, macmëriwo bote bënne. Kayëwle, fayëš kayiwo, bëṯër ẖrim mi gawruṯo hul d mayëṯ ba 2008. Ag gawre ẖrene, këtwolën kalla, azzën xayifo laţ ţëxetër, maxlaşşe ruẖayye. Ḫa mënayye Cabdëlmasiẖ Bë-Qaţiro w u ẖreno ste u Bëro Bë-Murëke´we. Këtwo ǧer gawre ste, hani ëzzënwo l Mërde, l Omid, l Cëntab, l Urhoy,… tamo këtwo utelat rab w bëṯër niše zëd. Han naqla du ẖarbo, sahmo rabo man nišani, yatume d faliti mu Sayfo´wën. More latwolle, ẖţiṯo!… Kulle mëžǧëliwo tërki, kurmanji w carabi. At tërk, ak kurmanj, a mẖalmoye uḏciwo bënne. Bi šato dan 1993, sëmli qëbolo cam u cammo Malak Bë-Bësse, bu qëbolo maẖkele hawxa, omër: Jan, bu utel du Šamcën Bë-Kurke hawi hawxa, kayëwlan ba zlamat, bi cito d Mor Barşawmo, grëšlan u Šamcënke Bë-Kurke li šarica. Alo aṯi, kulan du mëjlës yatëwina, mëralle d matrëk i şëncaṯe. Kulan hawina ẖa femo acle. U Šamcën mjawable aclayna w mërle omër: Yabo, ëno u laẖmayḏi hawxa kmanfaqne, bas kito mede, haka kito nošo mënayxu d omër, macwadli niše şëroye ya ţreli mëštëri d ëzze cam niše şëroye, ahla w sahla, këtxu ẖaq! Bas hul ucdo hawxa mede lawi! An niše d koṯe l gabi kulle mani da tleṯine (30), hamši (50) w lo ẖḏo, layto! Haka naqla ẖreto lë kmaqbëlitu, maẖwawulli aw hawulli šuğlo, ramẖël gëd ţureno mu šuğlano. Xori Nëcman ste ẖaḏirowe. Bi qamayto u Xori, lë mtanele. Mşanaţle. Ay yatiwe mëralle: Xori ma hat mën këmmët, qay lë kmëžğolët? Cabër bi žğaliye omër: Ḫţiṯoyo! Hawxa aẖna lë kmalëqlan bi mšihuṯo. Këbcina d ţorët mu šuğlano. Hano latyo kar! Ḫţiṯoyo! Kulan këbcina d ţorët mu šuğlano. Hat ste xan noše kulle sëmlox šuğlo ẖreno. W kali, naţër jawab mu Šamcënke. U Šamcënke omër: Baba Xori, kul nošo e, bas hat lë nuţarnowo menox d ëmmatli u medano! Hat kmo naqlat mšadarlox abnoṯo l zëbono cam aš šëferin mërdënoye l Mërde? Mëqqa mẖayşelox kalla! Hat ẖa, qašo Išoc u ciwarnoyo tre, qašo Pëţrës u karborani tloṯo, w ğer. D bëneno an ëšmone, hul şafro lë ktaymitu. Hatu kuhne, këmzabnitu, bëṯër niše w abnoṯo şëroye! U zlam kali. Kulan mëralle ”Mdaglono! Hawxa kmaẖtët bebaxtiyat bë qḏole dak kuhne, iḏac ẖad diḏox!” U zlam omër: Yabo, haka yaqiniye latxu meni, gëd amţenolxu aš šëferin d mawballe an niše ba ţrëmbelat dëṯṯe. Hënne maẖkëllali w këllën sağne. Heš baẖ ẖayene. Ḫa mënayye ste kowe Kamal Čočo u mërdalli. Kito ǧer ste… Kulan jamëdina. Xabro mu Xori laṯi. Qayëm u Šamcën li rağlo omër: Ëno han naqqa kazzi l šuğli, ema d ubcitu, ema d rëẖmitu, ëno ẖaḏirono d amţeno an noše d mëralli, larke l foṯayxun. De b xaţër dëṯxu! 6 aylël 2009
|
