|
Cito, kuhne w madrašto = I qarna aydarboyo?
| Dino mšiẖuṯo hëḏoyuṯo ţayuṯo | 2 - 10 |
| Tarix mšiẖuṯo hëḏoyuṯo ţayuṯo | 1 - 10 |
| Joǧrafya mšiẖuṯo hëḏoyuṯo ţayuṯo | 1 - 10 |
| Axlaq mšiẖuṯo nošuṯo | 1 - |
| Tarbiya mšiẖuṯo nošuṯo | 1 - |
| Yëlfono siyasi barbariya siyase d carab siyase d cëlmo | 10 10 - |
| Carabi kṯawto w qrayto mamlo iqoro | 10 10 10 |
| Tërki kṯawto w qrayto mamlo iqoro | 7 6 10 |
| Urhoyo kṯawto w qrayto mamlo iqoro | 2 1 - |
| Şurayt kṯawto w qrayto mamlo iqoro | - 4 - |
| Maẖşul komo ẖëworo | 10 1 |
| Fëtono w fësodo | 10 |
| Sniquṯo du jëns talyo galyo | 10 - |
| Dabara cito bayto | 1 - |
| Ḫale ruẖonayto nafšonayto | - - |
 |
Cito, kuhne w madrašto = I qarna aydarboyo?
Më Jan Beṯ-Şawoce
23 tamëz 2011
Hawi zabno kkëṯwina, këmnaqšina, kubena w kšuqlina cam ẖḏoḏe bu šëklano baf forume dad dafe, lašan mën? W qay ksaymina hawxa? Hal u medano klozëm aw lo? Haka mërlan lë klozëm, nošena, kubaclan mede d saymina, i naqlayo mën? U ẖa d këtle fëkër abadan ţër lë minakëf, ţrë umarle.
Haka bu caks kmëftakritu w këmmitu ”Lo! U medano kluzamlan w kobëc zëd mawxa ste mnaqšina w ubena w šuqlina!” I naqlayo kobëc d mëftakrina, af fëkratani aydarbo kibën baẖ ẖaye mǧayrilan? Yacni, harke gëd kuṯawno: Sumu hawxa w ţrawu hawxa! Bas ëno ksamno bu caks w lë ẖaruli! Ma kowe hawxa?
Muhim, u mede dë kkëṯwina abadan latyo lašan šëfro d camo, aw xëd komër bal lišone du macërbo lašan ”populizim”. Cal polemik ste dard latli d kuraxno. Bac mënyo u sabab? Ḫa ëlla kuṯele hawxa šëwolo.
Aẖnone w aẖwoṯo,
Camona! Xëd kul camo, aẖna ste l goran d ruẖayna, këtlan dardat. Hën rabene w hën nacimene. Hul ucdo ste lo hanëk w lo hanëk, lë šrallan! Man gëd šurelën? Mowat d ëšne naţërina, balki noše šmayone oṯe w šuralle w aẖna ste gëd xulşina mab balawat dëṯṯe! Naţërina w naţërina,… dcelan, mşalelan w şayëmina,… lašan balki xayëf d oṯën, kẖuzena naqla ẖreto nošo laṯi lafelayna!
Ad dardat barimi w fatili, daciri naqla ẖreto, kalën qumayna. Këmmilan: Hatu gëd šuretullan! Nošo ǧer lë koḏëc bënne! Hatu hatu d kuḏcitullan kayës më kul nošo! Aẖna dëṯxuna, cal iḏayxu hawina! W ucdo hatu kobëc d šuretullan!
Knëţri šroyo?!
Aẖna xëd camo mën sëmlan? Ad dardatani dayëm tëfkilan lë qḏole di cito. I cadaṯe hawila zawno yarixo, bu tarix ste dayëm hawxa sëmlan w ţrallan b iḏe dak kuhne jehël dë mrabela li cito. Kẖuzetu, xëd camo xaşërina kul mede w samina cal kul mede d këtlan lu mëstaqbël.
Camowan, hawina grece. Bëṯër cam u zabno sëmina w hawina grece da grece. Lë makfela, han naqqa cwid d misëmina grece da grece da grece… W ucdo tam bi ẖalaṯena.
Ḫuru bi madrašto d këtla li cito, harke b Awruppa, hani tam 35 šne ak kuhne b ayna darsat hawën šahraza w b ayna latne šahraza? I qarna laltaẖyo. An noţat aw an nuqţe d kito b gawe di qarna, u darǧaṯṯe mu 1-10 (ẖa lac caşro)´yo. U cloyo d kulle 10´yo. U taẖtoyo d kulle u 1´yo. Kito šëxto (-) u darǧayḏe, yacni w lo medeyo.
Adyawma ak kuhne d këtlan bam %98 (mo tmënyo w tëšci) hawxa qarna këtte b kisayye. Haka ţreli mede nëquşo aw maẖëtli mede ziyudo, dlo nëkfuṯo, hatu ste marulli w kṯawulli. Dlë këṯwitu gëd foyiš u ray diḏi huwwe lẖuḏe, hano ste më ucdo këmarno latyo kayiso. Hano u ray diḏi lẖuḏeyo.
Adyawma i qarna dak kuhnayḏan
bi madrašto di cito hawxayo
Assyrian Forums
Perspective: Editorials | Guest-Editorials | Letters Archives
|
Guest Editorial Policy: We welcome guest editorials and letters sent via our contact system. We reserve the right to determine the relevance and publication of any Assyrian-related article received. Perspectives expressed in guest editorials (op-ed) and letters do not necessarily reflect this website's views. |