Our Church and the Burning of our Books (Aramaic)Posted: Friday, June 15, 2012 at 09:06 PM UT
Ǧalabe naqlat mërli, aẖna ste xëd kul camo këtlan dardat, këtlan qatre l goran diḏan. Hani diḏanne, elan xëlqilan… Nošo ǧer mënayna, lë ẖaruwle w lë koḏec bënne w aşlan laybe d šurelën. U medano klozëm më zabno yarixo d maẖësinawo buwwe. Bas mën fayde i jahala d gaban lo ţrela d saymina mede. Ucdo i jahala bdela ëšmo b ëšmo knuqşo, bdelan kfëhmina ruẖan. Mawxa bdele nëqošo cal ǧalabe mëdone baynoṯan. Ḫa mam mëdonani hwele u lišono. Mënyo hano w qay ţrele šǧušyo baynoṯayna? Kobëc d uḏcinale. U rajayḏi më kul ẖa w më kul ẖḏo… mën fëker d këtxu, nëkfuṯo lëwalxu ebe, ẖatta d howe ǧalţo ste. Bas i naqla dë mnaqšina ţrowe nëqošo b gawe kit maḏco w lo caksiye w mqarrasiye. I naqla d howe caksiye w mqarrasiye kowe dcoro li xane qamayto. Stëfade aw mede ţawwo lë kowe. Hani 40 šne hawxa sëmlan maţina lu halak. I ẖalaṯe kobëc b maḏco d ruẖqina mena. Haka ǧalţono ameru haškara b foṯi ”Jan ǧalţo hat! As sababe ste këllën harke ẖa b ẖa rizene…” I naqlayo gëd nušaqno l caynayxun. Hawxa kobëc mëẖena ẖaşe di barbariye bi arco. Ḫaşe di siyase fašiste du Bacaṯ carabi bi arco! W dlo xalaş zaẖmeyo d huwelan. U lišonano kmëkṯëw b ẖarfat mšakle; sţrangeli, xabro yawnoyoyo, yacni mqarno aw cam qërnawoṯo. Ḫarf naştërnoyo, ẖarf kaldoyo… Hul lu doro daẖ 5, u lišono d Urhoy cayn xëd adyawma u madënẖoyo catiqowe. Yacni bi ẖarayto dax xabre u qolo A´we latwe O. I F ste P´wa, i B ste W w V mëqriyowa. Bu doro daẖ 5 hawi fliǧuṯo bi cito. Am macërboye këtwolën lišono i ẖarayto dax xabrayḏe latwe A, O´we, P latwo, F´wa, i W ste B´wa. Bëṯër këtwo qušoyo. Hano fayëš gab am madënẖoye bu ẖaṯo ste. Mor Yacqub Urhoyo bu cëlmo du yulfono kmiḏëc faylasuf rabo, more d maḏco w yaḏcoṯo, sëmle aẖ ẖarfat d serto, acmayye az zawce, hani mdaynile mi alfaba yawnayto. Hul l adyawma am macërboye kmëstacmëli i alfabaṯe. Acma ste sţrëngeli. Bas meqëm mi alfabaṯe, an abohoṯo mëstacmëliwo li kṯawto ẖarfat dab basmore. Zaẖmewën, mbadlënne l ẖarfat ẖaṯe. Hawxa mšawšët u lišono. Sim buwwe qiyëmto d marduṯo. Sahmo rabo mena lah haroše w sahmo mena ste lar riše di cito muqḏënne. U yqoḏo këmdawëm hul lay yawmoṯayḏan. Qayo? Klozëm dë bëcţina w mfatšina lašan d uḏcina lu sabab. Ëno hawxa sëmli w dlo u maḏcano mayko gëd manţenole? Gëd ubenolxun maṯlo cal u yuqḏono. Bi badaye dan 60´yat Yuẖanun Qašišo mtarjamle u kṯowo dë Fredrich Engels ”Kiyono d Diyalektiki” mu carabi lu urhoyo. Bu zabnano këtwo i cadaṯe bayn lak kaṯowayḏan, mën dë mtarjëmiwo aw d këṯwiwo, bas dë ţbic hawi kṯowo mšayciwo ẖa mene lu faţëryarxo lašan d maẖwalle mën šušoţo kito bu ẖaqlo di kṯiwuṯo. U kṯowo i naqla d maţi l iḏe d faţëryarxo Yacqub, ẖërle acle, ẖzele hawxa kṯowo latyo mëlayëq d howe b urhoyo. Kṯëwle maktub b ëšme mšayacle lac citawoṯo, buwwe mërle: Yawme d ẖëššabo bëṯër mu qërowo, l qul cayne di jamaca u kṯowano d mitawqëḏ b gawe d manqëlo d nuro. Mitaẖke lan noše d ẖaḏiri mëqqa ẖţiṯoyo d howe hawxa mede b lišono dë Mšiẖo Moran. Mawqëḏ w xalişi mene. Han naqqa haw nošo macbarle mede ẖaṯo l gawe du urhoyo. Bahe amţewo, dayroyo Callaf maẖëtwolën bi şoba. Hul d mayëṯ u karano sëmle. Mën yaqëḏ w mën lë yaqëḏ bi şobayo, maḏco latli. Aẖnone w Aẖwoṯo, Këtlan lišono d eman w d baban, cëmre ǧalabe catiqo. Yaḏoce kobën cëmre catëq mu urhoyo. Bas hul l adyawma nošo lë kṯëwle. Žǧëlina ebe w fayëš acmayna hul l adyawma dlo kṯawto. Kito ǧalabe aẖnone fahimi i masala be mënyo, bas krëẖmi d këṯwile baẖ ẖarfat catiqe. I širayḏi alle haṯeyo: Aẖnone kṯawu hawxa, ţër u camo yolëf u lišonayḏe. Haka yalëf bu darbano dëṯxu, ţroṯe bëṯrayxun w lo bëṯri. Ëno l bara! Hawxa bašyo? 13 ẖzirën 2012
|
Aẖe w Aẖwoṯo,
Assyrian Forums
Perspective: Editorials | Guest-Editorials | Letters